Guerras Napoleónicas

Guerras Napoleónicas ye la zeignaçon de l cunflito armado que se stendiu de 1799 la 1815, oupondo la quaije totalidade de las naciones de la Ouropa a Napoleon Bonaparte, hardeiro de la Reboluçon Francesa i ditador melitar.

Napoleon chegou al poder cumo 1 °Cónsul (1799) benido a ser coronado amperador de la Fráncia, an 1804, sob l títalo de Napoleon I. A partir de 1807 cunduziu l goberno sin atender als Cuorpos Lhegislatibos i cun caratelísticas outoritárias, amperiales i spansionistas.

Las guerras, la percípio lhocalizadas cumo cunflitos antre soberanos, tornórun-se guerras nacionales a partir de la resisténcia popular de Spanha i Pertual (Guerra Peninsular) als ambasores napoleónicos. Cul apoio de la Grana-Bretanha, las naciones ouropeias, derrotadas an sucessibas coligaçones, acabórun por se ampor la Napoleon na Batailha de Waterloo (1815).

Precedentes

A seguir a las guerras de la Purmeira i Segunda Coligaçones contra la Fráncia, durante i lhougo apuis de la Reboluçon Francesa, formou-se ua Terceira Coligaçon an 1804. La eideia desta coligaçon era tentar detener las crecentes ambiçones de l gobernante francés, Napoleon Bonaparte, que an Maio de 1804 recebira l títalo de amperador. Las açones de Napoleon porbocórun ua nuoba antrada de la Grana-Bretanha na guerra, lhougo seguida pula Áustria, Nápoles, Rússia i Suécia. La Spanha era anton aliada de la Fráncia.

La guerra ne l mar

Napoleon ourganizou ua einorme frota para atacar la Anglaterra, mas an Outubre de 1805 ua squadra británica comandada por Horácio Nelson çtruiu ua fuorça cumbinada franco-spanhola an Trafalgar, acabando cula amenaça francesa.

Ouropa central

Napoleon lhançou ls sous eisércitos nun ataque a la Áustria, derrotando-la na Batailha de Austerlitz an Dezembre de 1805. Ne l anho seguinte ambadiu la Prússia i derrotou-la nas batailhas de Jena i Auerstadt. An 1807 fui la beç de ls Russos na batailha de Friedlándia. An 1809, la Áustria boltou a la lhuita, mas fui outra beç derrotada i oubrigada a fazer la paç.

Península Eibérica

Modelo:Stória de la Fráncia

Na península Eibérica, an 1807, Napoleon atacou Pertual i, an 1808, la Spanha, nomeando l sou armano José Bonaparte cumo rei de Spanha. Ls pobos eibéricos reboltórun-se i las tropas británicas zambarcórun an Pertual. Napoleon forçou-las a ua retirada para la Corunha, ne l norte de Spanha. Arthur Wellesley, más tarde duque de Wellington, tomou anton l comando aliado na Guerra Peninsular. Anquanto las fuorças de guerrilha i ls eisércitos spanholes çgastában ls franceses i oubrigában Napoleon a mantener un einorme eisército na Spanha, l eisército pertués, recustituído i aliado als británicos sob l comando de Wellington, cuncentrou la defesa de Pertual nas Linhas de Torres, cunduzindo a la bitória subre ls franceses ne l Buçaco, Albuera, Salamanca, Badajoz, Ciudad Rodrigo. An Maio de 1813, l eisército anglo-pertués ampeçou la lhibartaçon de Spanha, oubtenida nas batailhas de Bitória i de l Pirinéus. Apuis de la chimpa de Pamplona i San Sabastian, l eisército anglo-pertués atrabessou la frunteira francesa i alcançou sucessibas bitórias an Nivelle, Nive i, finalmente, Toulouse, la 10 de Abril.

La Quinta Coligaçon

Rússia

Napoleon staba decedido la smagar la Rússia, que ambadiu cun seicientos mil homes an Júnio de 1812. L que el nun sabie ye que ls russos habien abandonado sue própia capital, lhebando decumientos gobernamentales amportantes, para alhá de la família rial. L oubjetibo desso era criar ua armadilha para Napoleon, que caiu neilha. Aquestumados a saquear cidades i usar ls alimentos persentes neilhas, l eisército francés se deparou cula scassa porduçon agrícola i rigoroso ambierno russo. Chegando an Moscobo, Napoleon speraba ancuntrar l czar para poder oubrigá-lo a coroar Napoleon rei, mas ancontrou la cidade an chamas, bazie. Anton, tomou Moscobo, mas ancuntrou-se cun falta de mantimientos i an pleno Ambierno russo. Tubo de retirar, an meio la muorte de sous suldados por heipotermie, fame i ataques de cossacos, perdendo la maiorie smagadora de ls sous suldados. La Áustria, Prússia i outros stados almanes recomeçórun la guerra, i an Outubre de 1813 ua fuorça cumbinada de russos, prussianos i austríacos derrotou Napoleon na Batailha de Leipzig. Este abdicou an Abril de 1814 i fui eisilado para la ilha de Elba.

Brasil

Las Guerras Napoleónicas repercutiran-se ne l Brasil a partir de la ambason de la península Eibérica zde 1807.

Cula chegada de la Família Rial pertuesa al Brasil (1808), i la trasferéncia de la Admenistraçon pa l Riu de Janeiro, l Príncepe Regente eimite l Decreto de Abiertura de ls Portos a las Naciones Amigas, assinando-se an seguida ls tratados de 1810: l Tratado de Aliança i Amisade i l Tratado de Comércio i Nabegaçon, cula Anglaterra, cunsulidando la chubida daqueilha poténcia subre Pertual i sous domínios ultramarinos.

An represália a la acupaçon de l território de Pertual cuntinental, las fuorças pertuesas ambáden i acupan la Guiana Francesa (1809-1817), i ancorpóran la Banda Ouriental (atual Uruguai) de l riu de la Prata.

An 1815, l Brasil fui eilebado a la cundiçon de "Reino Ounido la Pertual i Algarbes", na antidade chamada Reino Ounido de Pertual, Brasil i Algarbes.

Ls cien dies

An Márcio de 1815 Napoleon scapou-se de la ilha de Elba i regressou a la Fráncia. L rei francés, Luís XVIII, fugiu i Napoleon biu-se de nuobo ne l poder. Reuniu-se a la priessa un eisército aliado, sob l comando de Wellington i de l marechal prussiano Gebhard von Blücher, que derrotou Napoleon na Bélgica, an Waterloo, an Júnio. Napoleon fui outra beç eisilado, agora para la ilha de Santa Heilena, ne l Atlántico Sul, adonde morriu an 1821.