Medecina

L Bordon de Sculápio ye l simblo de la medecina.

La medecina ye ua de las árias de l coincimiento houmano lhigada a la manutençon i restouraçon de la salude. Eilha trabalha, nun sentido amplo, cula prebençon i cura de las malinas houmanas nun cuntesto médico. Ye la ária de atuaçon de l porfessional formado an ua Faculdade de medecina.

Segundo la Ourganizaçon Mundial de la Salude, salude nun ye solo la falta de malinas. Ye l cumpleto bien star físico, mental, psicológico i social de l andebíduo. Ye un stado cumulatibo, que debe ser animado durante to la bida, de maneira a assigurar-se de que ls sous benefícios séian todos çfrutados an dies seguintes. Nesse cuntesto, diretrizes de ourganizaçones cumpuostas por eiminentes anteletuales de l mundo relacionados a la ária de salude stablecírun un nuobo paradigma de abordaige an medecina.

Cunceito de medecina

medecina, deribada de l latin ars medecina, quier dezir la arte de la cura.

L cunceito de medecina tradecional fala de la práticas, abordaiges i coincimientos, --- ancorporando cunceitos materiales i sprituales ---, técnicas manuales i eisercícios, aplicados andebidualmente ó cumbinados, a andebíduos ó a grupos, de modo a tratar, diagnosticar i prebenir malinas, ó percurando mantener l bien-star.

La atual prática de la medecina outeliza an sou fabor coincimientos oubtenidos por muitas ciéncias (ua beç que eilha própia nun ye ua ciéncia), por eisemplo, biologie, química, física, antropologie, eipidemiolgie. An buona berdade trata-se dun ramo de las ciéncias relacionadas a la salude. Nun cunceito streito, la medecina busca la salude houmana por meio de studos, diagnósticos i tratamientos, i ne l cunceito mais ancho, alebiar l sufrimiento houmano i mantener l sou bien-star global. De modo giral, la medecina angloba ls campos de clínica médica, cirurgie, pediatrie, tocoginecologie i salude pública.

Stória de la medecina

Ber artigo percipal: Stória de la medecina

Médico tratando un doente. Museu de l Loubre, Paris, Fráncia.

Heipócrates ye cunsidrado l pai de la medecina. Cunsidra-se que bibiu antre 460 a 377 a.C. i deixou un legado ético i moral bálido até hoije. Pioneiro de l pensamiento científico, percuraba detalhes nas malinas de ls sous doentes para chegar a un diagnóstico, outelizando splicaçones subrenaturales, debido a la lemitaçon de l coincimiento de la época. Inda antes de la era crestiana, Asclepíades de Bitínia tentou cunciliar l atomisto de Leucipo i Demócrito cula prática médica. Ne l purmeiro seclo de era crestiana, Cláudio Galeno, outro médico griego, dou grandes upas (baseado an disseçones de animales) pa l zambolbimiento de la medecina.

Na Eidade Média ls religiosos tomórun l cuntrole de la arte de curar atrabeç de medicamientos i deixórun pa ls barbeiros, que yá lidában cula nabalha, la arte de drenar abcessos i tirar pequeinhas amperfeiçones de la gaita. La formaçon de secreçones de pus era cunsidrada normal i saludable.

An 1865, Louis Pasteur teorizou que las anfeçones éran porbocadas por seres bibos. Fui el l ambentor de l porcesso de pasteurizaçon, mui outelizado ne l leite. Listener, an 1865, aplicou pula purmeira beç ua seluçon anti-ssética nun doente cun fraturas cumplexas, cun eifeito profilático na anfeçon. Ampeçou-se ua nuoba era. An 1928 Alexander Fleming çcubriu la penicilina al ber que las quelónias de batérias nun crecian cerca al mofo de alguas placas de cultura. Aparece ua nuoba era: la de l antibióticos, que premitiu als médicos curar anfeçones cunsidradas mortales. La eiboluçon zde anton nun parou. La eiterna lhuita de l home cuntra la muorte antrou an ua nuoba etapa, cada beç mais moderna i cara.

Ciéncias médicas i porfissones médicas

Pa se formar médico l aluno debe studar an ua Faculdade de medecina, a tiempo antegral, durante seis anhos. Apuis de se formar médico, puode-se fazer specializaçon, sendo la mais amportante la residéncia médica, cun duraçon de dous anhos ó más, dependendo de la specialidade i sub-specialidade. Para antrar nun porgrama de residéncia médica, l médico debe ser aprobado i classeficado an cuncurso de ámbito nacional i, por causa de l grande númaro de médicos que se fórman cada anho, ben oumentando l númaro de porfissionales que nun son capazes de ser aporbados neste cuncurso. Estes médicos acában por scolher por fazer specializaçon an curso normal de pus-graduaçon, que muitas bezes nun aperséntan l mesmo nible de calidade eisigido para un porgrama de Residéncia. La medecina ten dous aspetos: ye ua ária de coincimiento (esto ye, ua ciéncia) i ye ua ária de aplicaçon desse coincimiento (las porfissones médicas). Na medecina, podemos çtacar la Oudontologie, que an Pertual custitui un curso andependiente.

La medecina baseada an eibidéncias ye ua tentatiba de lhigar esses dous aspetos (ciéncia i prática) atrabeç de l uso de l método científico, percurando atrabeç de técnicas i pesquisas científicas l melhor tratamiento para un doente.

A las bezes, puode ser defícele çtinguir antre ciéncia i porfisson an medecina. Ls bários ramos specializados de la medecina son studados por ciéncias básicas specializadas i por correspundientes porfissones médicas, eigualmente specializadas, que lídan cun uorganos, sistemas ourgánicos i sues malinas. Las ciéncias básicas de la medecina muitas bezes son las mesmas d'outras árias de la ciéncia cumo la biologie, la física, la ciéncia beterinária i la química.
Eisisten bárias árias lhigadas a la salude: oudontologie, psicologie, anfermaige (l cuidado cul doente), framácia, biomedecina, terapia de la fala i de la lenguaige, eiducaçon física fisioterapia, terapia acupacional, nutriçon, protética i bioengenharie.

Puode-se ancluir tamien muitas porfissones auxiliares (de nible médio) ne l Brasil antre estas çtacan-se ls Agentes Quemunitários de Salude, funçon eiquibalente als Médicos de pies çcalços na China, ls Agentes de Cuntrole de Andemias ó Zonoses; Ls Auxiliares de Saneamiento i Anspetores Sanitários; Ls Auxiliares de Laboratório (bioquímica) , Auxiliares de anfermaige, Auxiliares de Nutriçon i Oudontologie ó Técnicos de Heigiene Dental. Nalguas regiones inda se ancóntran parteiras capacitadas i superbesionadas por centros de oustetrícia. Specialistas de Salude Pública ten chamado la atençon pa la amportáncia dessas porfissones specialmente por sue capacidade de resolber ls agrabos mais frequentes de la populaçon i percipalmente por rializar serbícios de prebençon (medecina prebentiba) i dibulgaçon de la salude ne l modelo de atençon a la salude de la família.

L médico, quando ne ls redadeiros anhos de la Faculdade de medecina, faç anternato spitalar an dibersas árias cumo clínica médica, cirurgie giral, pediatria i ginecologie i oustetrícia.

Las specialidades médicas, las subspecializaçones i las árias de atuaçon

Ber artigo percipal: Aneixo:Lista de specialidades médicas

La medecina ténen muitas specializaçones possibles, alguas subspecializaçones i las chamadas "árias de atuaçon".

Alguas deciplinas menistradas durante l curso de medecina:

• Anatomie ye l studo de la strutura macroscópica física de l ourganismos. Studa las grandes struturas, l scaleto, la musculatura, ls basos sanguíneos arteriales i benosos, bien cumo ls basos linfáticos i nérbios, uorganos i struturas aneixas.
• Bioética ye l studo de l relacionamiento antre biologie, medecina i filosofie, specialmente de la deciplina ética i metafísica.
• Cirurgie cardiobascular atua na cirurgie de l coraçon.
• Citologie ye l studo de las células andebiduales i de sues struturas anternas.
• Ambriologie ye l studo de l zambolbimiento de ls Ourganismos zde la ounion de l gametas, las células sexuales parentales, que dan ourige al uobo ó zigoto que, por sue beç, se zambolbe ne l ambrion.
• Eipidemiologie ye l studo cantitatibo de ls porcessos de malinas nas populaçones houmanas. Anclui l studo de las eipidemies, de las andemies, de la biostatística, de ls fatores de risco relacionados a las malinas antre outros tópicos.
• Farmacologie ye l studo de las drogas, zde sue oubtençon até sues açones benéficas i perjudeciales als Ourganismo.
• Fisiatrie ye la ária de la medecina que studa i trata de las cunsequéncias de las malinas alredror de la ancapacidade física.
• Fisiologie ye l studo de l funcionamiento normal de l ourganismo.
• Neurociéncia ye un termo que ajunta las deciplinas biológicas que studan l sistema nerboso, specialmente la anatomie i la fisiologie de l cérebro houmano.
• Ouftalmologie ye l studo de las patologies oculares, cun sue aplicaçon ne l diagnóstico i tratamiento clínico-cirúrgico.
• Salude Pública ye la aplicaçon de ls coincimientos médicos, porcessados puls eipidemiólogos, cul oubjetibo de ampedir las malinas nas populaçones.

Specialidades diagnósticas i de eimaige

• Anatomie Patológica: Ye ua specialidade médica respunsable pula rializaçon de diagnósticos de bárias malinas, anclusibe de l cáncaro, por meio de studo al microscópio de amostras de células ó tecidos. Ls médicos patologistas son ls porfessionales respunsables puls diagnósticos, que ourientan tratamientos, stablécen prognósticos, garánten la calidade de l atendimiento médico i son ançpensables a las campanhas i aciones prebentibas. Ne l Laboratório de Patologie ó de Anatomie Patológica todos ls porcedimientos son feitos por médicos patologistas i puls sous ajudantes. Estes porfissionales ténen coincimiento mui specializado pa l diagnóstico de malinas, ancluindo l cáncaro, a cobrar de studo de materiales oubtenidos por aspiraçones, sfregaços, biópsias i cirurgies. An cada eisame l médico patologista seleciona, de forma andebidual, las amostras para studo microscópico, nun habendo la possiblidade de outomatizaçon por máquinas. Eisames anatomopatológicos (biópsias, pieças cirúrgicas), Eisames eimunoheistoquímicos i Eisames citopatológicos (prebentibos, punçones, líquidos ourgánicos) son procedimientos médicos i dében ser rigorosamente analisados por médicos patologistas ó por médicos citopatologistas, para que séian eisecutados de forma cunfiable.
• Bioestatística ye la aplicaçon de statística al campo biológico i médico. Eilha ye eissencial al planeamiento, abaluaçon i anterpretaçon de todos ls dados oubtenidos an pesquisa na ária biológica i médica. Ye fundamental a la eipidemiologie i a la medecina baseada an eibidéncias.
• Bioquímica ye l studo de las reaçones químicas que acuntécen drento de ls Ourganismos bibos i, lebando an cunta la strutura i la funçon de ls cumponentes celulares i de la célula cumo un todo.
• Física médica - outeliza de coincimientos de la Física para chegar la diagnósticos, bien cumo auxilia ne l zambolbimiento de nuobos eiquipamientos.
• Stologie ye studo de cumo las células i l material antercelular se ajunta para criar ls tecidos, cumo l uosso, l muscular, l cunjuntibo etc.
• Eimunologie ye l studo de las células i moléculas que cumpónen l sistema eimunitário i de l sou funcionamiento na defesa de l Ourganismo cuntra agentes anfeciosos i células cancerígenas.
• Anformática médica ye l campo de studo relacionado a la basta gama de recursos que puoden ser aplicados na geston i outelizaçon de la anformaçon biomédica, ancluindo la cumputaçon médica i l própio studo de la natureza de la anformaçon médica.
• Microbiologie ye l studo de l microrganismos (protozoários, batérias, fungos i bírus).
• Toxicologie ye l studo de ls eifeitos de ls benenos begetales, animales i minerales.
• Ultrassonografie - Studo de l cuorpo houmano atrabeç de l ultra-sonido, que forma selombras i retombos nas struturas de l cuorpo houmano.

Lhigaçones sternas

• PubMed - Biblioteca de medecina i salude (an anglés)