Christoph Sumann
.jpg)
Christoph Sumann (* 19. Januar 1976 in Judenburg) is en ehmalger öösterrieksch Biathlet un Skilanglöper.
Karriere
[ännern | Bornkood ännern]To’n Anfang vun sien sportlich Karriere weer Sumann en spoodoriek Skilanglöper, de Midden vun de 1990er Johren to dat Juniorenteam vun Öösterriek keem un sück dor ok hollen kunn. In’n Weltcup keem he tweemal ünner de best Teihn un bi de Winter-Universiade 1999 in Štrbské Pleso hett he över 10 km klassisch un in de Verfolgung jewiels de Goldmedaille wunnen. 1999 hett he sück för den Biathlonsport entscheeden.
Sien eerste Biathlon-Saison 2000/01 verleep sportlich ehrder unspektakulär. Bi de Nordische Skiweltmeesterschap 2001 reck he Rang 9 in’n Sprint. In de Biathlon-Saison 2001/02 wunn he in’n Dezember den Staffelwettbewarf in Pokljuka un bi de nächsten Rennen in Osrblie reck he an’n 21. Dezember 2001 in den 10-km-Sprint sien eersten Eenzelsieg in’n Biathlon-Weltcup (vör Henrik Forsberg un Andrij Derysemlja). De Saison hett he mit en 18. Platz in‘n Gesamtweltcup afslooten.
In de Tiet dornah reck he in’n Weltcup woll eenige Top-10-Platzeeren, den Sprung up dat Podest hett he aber eerst weer in’n Januar 2007 bi den Weltcup in Ruhpolding schafft. An’n 20. Januar 2007 in Pokljuka reck he sien tweeten Weltcupsieg in de 12,5-km-Verfolgung (vör [[Alexander Wolf (Biathlet]|Alexander Wolf]] un Vincent Defrasne. Een Dag later wunn he den 15-km-Massenstart-Wettbewarf (vör Defrasne und Andreas Birnbacher). In de Gesamtwertung vun den Weltcup keem he in de Saison up Rang 9, in den Massenstart-Weltcup sogor up den 2. Platz.
Mit sien 1. Platz in dat Eenzel vun Pokljuka in de Saison 2009/2010 hörrt Sumann to de wenig Biathleten de in jeder Disziplin en Weltcup-Sieg reckt hemm. De Steirer weer ok de eerste Öösterrieker in de Biathlonhistorie, de dat Trikot vun den Gesamtführenden in‘n Weltcup övertrecken drüff. Nah Dominik Landertinger (Massenstartweltcup 2008/09) weer Sumann in‘n Weltcup 2009/10 de tweet Öösterrieker, de en Spezialweltcup – den Eenzelweltcup – för sück entscheeden kunn. In den Gesamtweltcup keem he an’t Enn’n up Rang 2 achter Emil Hegle Svendsen.
Bi de Olympisch Winterspelen 2010 in Vancouver wunn he achter Björn Ferry aber vör Vincent Jay in de Verfolgung de Sülvermedaille. In den Sprint-Wettbewarf harr he tovör den 12. Platz beleggt. Bi den 15-km-Massenstartkeem he up den veerten Platz, nahdem he bi dat darte Scheeten Probleme mit sien Gewehr harr. Bi den afsluuten Staffel-Bewarf hett he gemeensam mit Daniel Mesotitsch, Simon Eder un Dominik Landertinger sien tweete Sülvermedaille haalt.
De nächst Saison leep dat nicht ganz so goot mit. He weer woll weer de beste Öösterrieker, keem faken in de Punkteränge, aber blots eenmal up dat Podest un reck in de Gesamtwertung Platz 8.
In de Saison 2011/12 keem he blots noch up den 35 Rang. In de folgend Saison keem he up den 34. Rang, weer aber nich bi all Rennen an’n Start. Glieks to Anfang bi den Sprint in Östersund keem he up den darten Platz un bi dat tweetletzt Rennen vun de Saison in Chanty-Mansijsk wunn he den Verfolger sogor vör Simon Fourcade, Michal Šlesingr un Martin Fourcade.
Bi de Olympisch Winterspelen 2014 in Sotschi wunn he – weer mit Mesotitsch, Eder un Landertinger – de Bronzemedaille in‘n Staffelwettkamp. Ansluutend geev he bekannt, sien Karriere nah de loopend Saison 2013/14, de he denn up Rang 29 afsluuten dee, to beenn’n.
Ok nah dat Enn’n vun sien Loopbahn bleev he sportlich aktiv. So hett he 2014 den Ironman Austria bestreeden un nehm gemeensam mit Andreas Goldberger, Benjamin Karl un Axel Naglich an den Race Around Austria deel. De Staffel keem up den 4. Platz.
