Erkki Antila
Erkki Lauri Johannes Antila (* 14. Juli 1954 in Jurva; † 28. Oktober 2023) weer en finnisch Biathlet. In de Johren um 1980 hörr he to de internatschonale Weltspitze in’n Biathlon.
Erkki Antila sien Vereen weer Jurvan Urheilijat. Bi de Juniorenweltmeesterschapen 1974 in Minsk wunn he in’n Sprint achter Steffen Thierfelder de Sülvermedaille un wurr mit de finnisch Staffel Weltmeester. Een Johr later wunn he gemeensam mit Keijo Kuntola un Arto Sutinen in Antholz Staffel-Bronze. Tüschen 1977 un 1983 hett he an all Grootereignissen vun de jewielig Johren in’n Biathlonsport deelnommen. All glieks bi sien eerst Deelnahm an de Biathlon-Weltmeesterschapen 1977 in Vingrom wunn he mit Raimo Seppänen, Simo Halonen un Heikki Ikola in dat Staffelrennen de Sülvermedaille. Een Johr later weer in Hochfilzen en achte Platz in’t Eenzel sien best Ergevnis. 1979 wunn he in Ruhpolding gemeensam mit Halonen, Seppänen un Ikola nochmals Sülver in dat Staffelrennn.
Hööchtpunkt vun sien Loopbahn wurrn de Olympisch Winterspelen 1980 in Lake Placid. Antila wurr 12. in’n Sprint, Fieft in’t Eenzel un an de Siet vun Keijo Kuntola, Kari Saarela un Raimo Seppänen keem he mit de Staffel up Rang 7. Sien spoodriekst Johr wurr 1981. In dat finnisch Lahti wunn he in dat Sprintrennen achter Frank Ullrich, aber vör Yvon Mougel un Kjell Søbak de Sülver-, in‘t Eenzel achter sien Landsmann Heikki Ikola un Ullrich de Bronzemedaille. 1982 verpass he in Minsk in‘t Eenzel mit Platz 5 knapp en wiedere Medaille. Sien internatschonale Loopbahn hett Antila in Antholz bi de Weltmeesterschapen 1983 afslooten, wo he mit de Staffel an de Siet vun Tapio Piipponen, Risto Punkka un Toivo Mäkykyro up Rang 5 keem.
Antila weer Vader vun den finnischen Biathleten Timo Antila un Cousin vun de Skilanglöpersche Hilkka Riihivuori.