बियोन्से: लेमनेड

मुख्य लेख: लेमनेड

बियोन्से: लेमनेड
निर्देशक	बियोन्से खलिल जोसेफ डाइकेल रिम्याश टड टूर्सो जोनस एकरलन्ड मेलिना मात्सूकस मार्क रोमानेक
लेखक	वार्सन शायर
आधारित	लेमनेड (सन् २०१६)
निर्माता	बियोन्से (कार्यकारी निर्माता) ओन्ये आन्यान्वु थोमस बेन्स्की एड बर्क (कार्यकारी निर्माता) कीरा कार्स्टेनसन
मुख्य कलाकार	बियोन्से
छायाङ्कन	खालिक अल्लाह
सम्पादन	बिल युकिच
सङ्गीत	बियोन्से
वितरक कम्पनीहरू	पार्कवुड इन्टरटेनमेन्ट गुड कम्पनी
वितरक	एचबीओ
प्रदर्शन मिति	अप्रिल २३, २०१६
अवधि	६५ मिनेट
देश	संयुक्त राज्य
भाषा	अङ्ग्रेजी

बियोन्से: लेमनेड (अङ्ग्रेजी: Beyoncé: Lemonade) अमेरिकी गायिका बियोन्सेद्वारा कार्यकारी रूपमा निर्मित साङ्गीतिक चलचित्र हो । अप्रिल २३, २०१६ मा एचबीओमा प्रसारित यस चलचित्रले सन् २०१६ मा सार्वजनिक गरिएको लेमनेड नामक एल्बमको भिडियोको काम गर्छ ।

पृष्ठभूमि

यो चलचित्र "इन्टुइशन" (अनुवाद: "अन्तर्ज्ञान"), "डिनायल" (अनुवाद: "अस्वीकार"), "एङ्गर" (अनुवाद: "क्रोध"), "एपथी" (अनुवाद: "भावशून्यता"), "एम्टीनेस" (अनुवाद: "खालीपन"), "अकाउन्टेबिलिटी" (अनुवाद: "उत्तरदायित्त्व"), "रिफोर्मेशन" (अनुवाद: "सुधार"), "फर्गिभनेस" (अनुवाद: "क्षमा"), "रिजरेक्शन" (अनुवाद: "पुनरुत्थान"), "होप" (अनुवाद: "आशा") र "रिडेम्शन" (अनुवाद: "मुक्ति") गरी एघार खण्डमा विभाजन गरिएको छ । यस चलचित्रमा बेलायती सोमाली कवयित्री वार्सन शायरद्वारा लेखिएका "दी अनबेयरेबल वेट अफ स्टेयिङ" (अनुवाद: "यहीँ रहिरहनुको असहनीय भार"), "डियर मून" (अनुवाद: "प्रिय चन्द्र"), "हाउ टू वेयर योर मदर्स लिपस्टिक" (अनुवाद: "आफ्नी आमाको लिपस्टिक कसरी लगाउने"), "नेल टेकनिशियन एज अ पाम रीडर" (अनुवाद: "ज्योतिषको रूपमा सौन्दर्यविद") र "फर विमेन हू आर डिफिकल्ट टू लभ" (अनुवाद: "माया गर्न गाह्रो महिलाका लागि") कविताहरूका पङ्क्तिको प्रयोग गरिएको थियो ।

कलाकार

यस चलचित्रमा इबेई, लाओलु सेनबान्जो, अम्यान्ड्ला स्टेनबर्ग, क्वभ्यानजने वालिस, क्लोई x ह्याली, जेन्डेया र सरीना विलियम्सको विशेष उपस्थिति रहेको छ । "फर्वर्ड" गीतको भिडियोमा ट्रेभन मार्टिनकी आमा सब्रिना फुल्टन, माइकल ब्राउनकी आमा लेस्ली म्याकफ्याडेन र एरिक गार्नरकी आमा ग्वेन कारले आ-आफ्ना छोराहरूको तस्वीर समातेको दृश्य समावेश गरिएको छ । जे-जी र बियोन्सेकी छोरी ब्लू आइभी, जे-जीकी हजुरआमा ह्याटी ह्वाइट र बियोन्सेकी आमा टिना नोल्स आफ्नो दोस्रो पति रिचार्ड लसनको साथमा यस चलचित्रमा देखिन्छन् ।

प्रतिक्रिया

आलोचनात्मक प्रतिक्रिया

बिलबोर्डका मिरियम बेलले "स्वतन्त्र र शक्तिशाली अफ्रिकी मूलकी महिलाले अन्य अफ्रिकी मूलका महिलाहरूलाई समावेश गरी बनाएको चलचित्र" लेमनेडलाई "कालो जातिको लागि नारीवादको क्रान्तिकारी कृति" भनी वर्णन गरिन् । बियोन्से र उनको पतिको कथामा अमेरिकी समाजमा अफ्रिकी मूलका व्यक्तिहरू प्रति गरिने व्यवहारलाई जोडी बियोन्सेले यस चलचित्र र एल्बमको मध्यमबाट अफ्रिकी-अमेरिकी समुदायका मानिसहरूलाई एकताबद्ध रहने आह्वान गर्छिन् । अफ्रिकी मूलका महिलाहरूको आवाज दबाउने र उनीहरूलाई अन्य व्यक्तिहरू जस्तै अवसर प्रदान नगर्ने अमेरिकी समाजमा बियोन्सेको लेमनेडले अरू कुनै मिडियामा नदेखिएको तरिकाले अफ्रिकी मूलका महिलाहरूको प्रतिनिधित्व गर्दै कठिनाइमा पनि हार नमान्ने क्षमतालाई मनाएकी छिन् । जून २०१६ मा म्याथ्यू फल्क्सले लेमनेडको ट्रेलरमा नक्कल उनको लघु चलचित्र प्यालीनोइयाका नौ तत्त्वहरूलाई गरेको आरोपमा बियोन्से, सोनी म्यूजिक, कोलम्बिया रेकर्ड्स र पार्कवुड इन्टरटेनमेन्टलाई मुद्दा हालेका थिए । यद्यपि, न्यू योर्कका न्यायाधीश जेड एस. र्याकअफले सो मुद्दालाई खारेज गरिदिए ।

पुरस्कार तथा नामाङ्कन

वर्ष	पुरस्कार	श्रेणी	नामाङ्कित	परिणाम	सन्दर्भ
सन् २०१६	अफ्रिकन-अमेरिकन फिल्म क्रिटिक्स असोसिएसन	सर्वोत्कृष्ट टेलिभिजन कार्यक्रम - विशेष वा सीमित शृङ्खला	बियोन्से: लेमनेड	विजयी
सन् २०१६	प्राइमटाइम एमी पुरस्कार	सर्वोत्कृष्ट विविधता, सङ्गीत वा हास्य विशेष		मनोनित
सन् २०१६	प्राइमटाइम एमी पुरस्कार	विविध विशेषमा सर्वोत्कृष्ट निर्देशन		मनोनित
सन् २०१७	ब्ल्याक रील टेलिभिजन पुरस्कार	सर्वोत्कृष्ट टेलिभिजन वृत्तचित्र वा विशेष		विजयी

बाह्य कडी

• इन्टरनेट चलचित्र डेटाबेसमा बियोन्से: लेमनेड