Fagai

Fanura sura da'a ba gangolita ngawua wehede moroi yöu (dialek Nias Utara)

Fagai, sambua halöŵö sino ara la falua ira ono niha ba danö niha tenga halöŵö sibohou. Fagai andre, ba tola möi fangalui ba zangodödö ya'ia. Ba danö niha, fagai tenga ha ba nidanö sebua, niha sifagai la khamö nasa sabakha ba sebolo ba wangalui i'a. Fagai andre, ba oya zoguna tanö bö'ö zi lö tola lö'ö la henagö, simane, gai, lakhö, batanö bö'ö nia.Niha si fagai ba danö niha, ba ato sibai zino mangalui i'a sebua böli tenga sa'ae ha i'a si to'ölö la gaini. Si fagai ba danö niha sito'ölönia ya'ira siso ma sahatö bangai nasi. Na siso ba hili, ya'ira to'ölö mamili wangalui soguna ero ma'ökhö simane, mangai (mogai) gitö, molaza, mananö sinanö, mo'urifö simane: manguri bawi, manu, bebe, sogöi zangahaogö tabe gi'a, ba halöŵö siso fa'onekhe ba danga simane: fatuka, fa beke kureta faoma hondra, so göi wagaŵe ba tanöbö'ö sitola möi fangalui.

Fakake Ni Oguna'ö

Na möi fagai, ba tatu manö moguna la'ohe ngawalö zoguna. Simane: gai, naha gahulua, lakhö, ba soguna ma balazo zifagai. He nano oya zoguna, banalö tundrahara, ba tebai mofanö ba wagaisa. Duho si'oföna sibai ba halöŵö wagaisa andre, ya'ia dundraha. Ba danö niha löhadöi nasa samake fakake sabölö baga ba wagaisa, tenga simane ni ilada ba mbanua tanöbö'ö.

Lakhö Gi'a

Na fagai niha, ba lakhö zi lö tola lö'ö la ohe ba wagaisa. Si to'ölö sino la falua ba wagaisa, lakhö gai la'alui simane eleŵazi (na fagai ba nidanö side-ide ma ba tabe gi'a), na ba nasi, ba lakhö simane uro, ba i'a sigide-ide.

Ngawalö Gi'a

Si fagai, tenga ha asala möi ba nasi, hiza sifagai göi so khönia wangi'ila inötö si sökhi ba wagaisa sino itema khö ndra amania sagatua moroi khönia. Inötö silö tola lö'ö i'ila ya'ia da'ö, hauga wa alawa mbawa ba dalu mbanua, so nifotöi tesa'a, akhömita, (tenga baŵa so balau, obalau mbaŵa) börö ba wamaigi hadia mo bade ma lö'ö. Ba danö niha so nifotöi i'a sauri. I'a sauri andre, i'a samena lagaini ira niha sifagai, ba la amawa. So wöli gi'a andrö ia ni'ölinia la kaoni ma latötöi döinia i'a sauri, I'a sauri tenga ngawalö döi gi'a, fefu gi'a sibohou la gaini ba la'amawa, da'ö niwa'ö i'a sa'uri. Na ngawalö nia, so : i'a hambu-hambu, i'a hiu, i'a toda, i'a buru lewua, ono hambu-hambu, kalökö, mugu, uro, hambae, ba tanö bö'ö nia.

I'a Ni'unagö

Moroi ba wagaisa ndra so halöŵö ba nasi, ba ahulua ma i'a sino lagaini, so ni amawa, so ni'oguna'ö labali'ö diwo, ba so göi ni'unagö. Simane ba mbanua ba Nias Utara, ba no sambua bagia ni odödögö wamareta ba wamohi'a dödö nono mbanua ba wangodödögö halöŵö wangalui i'a andre. Ba hiza ba Nias Utara andre no so gi'a ni'unagö ba no tola la'öli niha ba naha gowöliŵa, simane ba harimbale, fasa, ba tanöbö'önia.

Sifakhai ba Wagaisa

Fagai, ya'ia sa'ae sino tefatunö moroi yaŵa ba zura andre, wa sifagai, ha sambua dani nia ba nasi, ya'ia da'ö wangalui i'a. Ba so göi zangulia i'a lö lafake simane tundraha, ya'ira möi ba luaha (falukhasa nidanö ba asi) ba ni'ohera ya'ia da'ö diala, ndriala,fadiala ba nano larugi luaha ba lafazaumba ndriala ra ba amena ladöni yawa. Na fadiala lö moguna lakhö. Aefe da'ö so göi nifotöi mangembua, embua, fakake wanga'i i'a da'a fagölö-gölö mangoguna'ö u'ö. Fa'afabö'ö nia ha ba wamalua. Diala, ndriala, fadiala fake döla-döla, zololohe gu'ö ma neti, na embua, lö fake döla-döla, lala wamake ya'ia, nifazumba ba naha somasi lafa'u'u gi'a. Baero lala wanga'i, he fangembua ma fadiala, so göi zamalua nifotöi fatufa. Fatufa andre, ba wanga'i uro, ba i'a sigide-ide ba mbewe ngöfi nidanö ma asi. Aefa da'ö so göi zolau ma samalua fatuwa, famönö, mamönö. Da'a nilau ba nidanö tengan ba nasi.