Meter over havet
Meter over havet (forkorta moh.) vert brukt for å definere høgda til eit punkt i høve til havnivået, målt i meter. Nemninga meter under havet vert på liknande vis nytta om stader som ligg lågare enn havnivået. I somme land er det vanleg å oppgi måla i fot istaden for meter.
![](https://upload.wikimedia.org/wikipedia/commons/thumb/b/b3/DEMAlpesEW.png/220px-DEMAlpesEW.png)
![](https://upload.wikimedia.org/wikipedia/commons/thumb/6/6b/Map_amutka.gif/220px-Map_amutka.gif)
![](https://upload.wikimedia.org/wikipedia/commons/thumb/c/c9/Pierre-Niton-Geneva-1.jpg/220px-Pierre-Niton-Geneva-1.jpg)
På kart er høgda over havet gjerne markert med fargar eller kotar. Høgda til innsjøar, fjell, åsar, søkk i terrenget og andre topografisk interessante punkt kan òg bli markerte med tal.
Høgda vert rekna frå middelvasstanden langs kysten på eit fastsett tidspunkt, ein normalnull, som for det nasjonale høgdemålingssystemet i Noreg er året 1954 og knytt til eit fastmerke som finst ved Tregde vasstandsmålar i nærleiken av Mandal. Den høgda dette fastmerket er plassert i, er fastsett i 1954 på grunnlag av ei utjamning av utrekningar av middelvasstanden for vasstandsmålingar gjort frå 18 til 53 år i Oslo, Nevlunghavn, Tregde, Stavanger, Bergen, Kjølsdal og Heimsjø.
Hypsografi er skildringa av høgdeforholda på jorda. Ei hypsografisk kurve er ei grafisk framstilling av korleis arealet på jordoverflata i middel er fordelt på dei ulike høgdenivåa.[1]
Kjelder
endre- ↑ «Hypsografisk kurve». Store norske leksikon. 14. februar 2009. Henta 21. november 2013.