Latinarkvarteret
Latinarkvarteret i Paris i Frankrike, fransk: Quartier latin, er eit strok på venstre breidda av elva Seinen, i det femte arrondissementet og nord og aust i det sjette arrondissementet, med universitetsbygningen la Sorbonne som historisk sentrum. Namnet på stroket har sin bakgrunn i at det viktige og vidgjetne universitets- og skulemiljøet i dette området i mellomalderen nytta latin som det einaste godtekne undervisningsspråket. Fleire universitet og høgskular ligg i Latinarkvarteret den dag idag.
Latinarkvarteret er eit av dei mange kvartera i Paris som ikkje er administrative einingar innanfor arrondissementa dei ligg i, og grensene for stroket er ikkje klart definerte. Mykje av stroket ligg på det låge høgdedraget Montagne Sainte-Geneviève.
