NUTS
NUTS (engelsk Nomenclature of Territorial Units for Statistics, opphavleg frå fransk nomenclature des unités territoriales statistiques) er ein standardkode for administrative understatlege einingar til bruk i Eurostat-statistikk. Standarden blei utvikla av EU, og dekkjer derfor berre medlemslanda i detalj. Eurostat har òg utvikla eit hierarki for alle søkjarland etter 1980, men denne delen av standarden er ikkje endeleg fastlagd. Kodane treng ikkje å samsvare med dei reelle administrative einingane i landa. Dette kjem mellom anna av at ein ved grenseendringer ofte held fast ved dei gamle einingane i statistisk samanheng, for å kunne samanlikne målingar over tid.
Oppbygnad
[endre | endre wikiteksten]- NUTS 0: To bokstavar som identifiserer landet. Denne delen av koden svarer til ISO 3166-1, bortsett frå at Storbritannia bruker UK i staden for GB.
- NUTS 1: Eitt siffer eller éin bokstav som identifiserer ei understatleg eining. Nummereringa startar med 1, og etter 9 held ein fram med bokstavar. Nivået dekkjer dei same einingane som ISO 3166-2, men med andre kodar.
- NUTS 2 / NUTS 3: Nivå under dette blir gitt med siffer. Der det er for mange einingar til å bruke eitt siffer, lagar ein kunstige samanslutningar av einingar. NUTS 2 vil derfor ofte ikkje referere til eksisterande administrative einingar.[1]
Døme
[endre | endre wikiteksten]Til dømes er koden for Portsmouth i England bygd opp slik:[2]
- UK: Storbritannia
- UKJ: Regionen Søraust-England
- UKJ3: Hampshire and Isle of Wight
- UKJ31: Portsmouth
Utanfor EU
[endre | endre wikiteksten]Den tilsvarande standarden i Sambandsstatane heiter FIPS.
Avvik
[endre | endre wikiteksten]Det er nokre avvik i koden:
- Gibraltar har koden E021, som syner at området ligg utanfor EU.
- Fransk Guyana er lista både som FR930 (under Frankrike) og som AS13 (under Sør-Amerika)
Norsk bruk
[endre | endre wikiteksten]I norsk statistikk svarer fylka til NUTS 3-nivået. Statistisk sentralbyrå har òg produsert statistikk på NUTS 2-nivå, med ei inndeling av Noreg i sju regionar.[2] SSB har òg gjort framlegg om ei inndeling på NUTS 4-nivå, med Noreg delt inn i 90 økonomiske regionar.[3] Eurostat opererer ikkje med NUTS 4, men har i staden to lokale inndelingar, LAU1 og LAU2 (frå engelsk Local Administrative Unit). Norske kommunar ville tilsvare NUTS 5-nivå, eller LAU2.[4]
Kjelder
[endre | endre wikiteksten]- ↑ «NUTS: Background». eurostat. Henta 16. mars 2022.
- ↑ 2,0 2,1 «NUTS 2021 classification». eurostat. 2021. Henta 16. mars 2022.
- ↑ «Standard for økonomiske regioner». SSB. oktober 2000. Henta 16. mars 2022.
- ↑ «Local Administrative Units (LAU)». eurostat. Henta 16. mars 2022.
- Denne artikkelen bygger på «NUTS» frå Wikipedia på bokmål, den 16. mars 2022.