Agapet I

Agapet I^èr foguèt lo 57^en papa de la Glèisa Catolica Romana dau 13 de mai de 535 au 22 d'abriu de 536. Succediguèt a Joan II (533-535) e foguèt remplaçat per Silvèri (536-537).

Son pontificat foguèt brèu mai marcat per unei decisions importantas. D'efèct, Agapet I^èr confirmèt lei decisions dau concili de Cartage reünit a la fin dau pontificat de son predecessor. Puei, en causa de la guèrra entre bizantins e ostrogòts en Itàlia, foguèt mandat a Constantinòble per lo rèi ostrogòt Teodat a la tèsta d'una ambaissada cargada de negociar una patz. Aquò mau capitèt car l'emperaire Justinian I^èr refusèt d'arrestar sa politica de conquista sistematica de la peninsula. En revènge, en Constantinòble, Agapet I^èr capitèt de reglar la question dau patriarca d'Antim qu'èra contestat per la màger part deis evesques orientaus en causa de son sostèn au monofisisme. D'efèct, capitèt de demostrar l'eresia d'Antim a Justinian I^èr. Antim foguèt alora despausat e Agapet sacrèt lo patriarca novèu. Enfin, accetèt una profession de fe escricha de l'emperaire que voliá pas èsser associat ambé lei tèsis d'Antim.