Al-Hakam II
Al-Hakam II (13 de genier de 915, Còrdoa - 1èr d'octòbre de 976, Còrdoa) es un califa omeia de Còrdoa que reinèt de 961 a 976. Succediguèt a son paire Abd-ar-Rahman III (929-961) e foguèt remplaçat per son fiu Hisham II (976-1013). Amb lo rèine de son paire, son periòde es considerat coma l'apogèu de la poissança aràbia dins la peninsula Iberica.
Biografia
[modificar | Modificar lo còdi]Designat successor en 923, recebèt una educacion fòrça avançada e foguèt rapidament associat a la gestion politic e militar dau Califat. A la mòrt d'Abd-ar-Rahman III, li succediguèt donc sensa dificultat. Son rèine foguèt marcat per la perseguida de la politica de son paire. En Magrèb, aprofichèt lo transferiment dau poder fatimida en Egipte per tornar estendre l'influéncia cordoana dins la region e obtenguèt la somission deis Idrissidas, una dinastia installada en Marròc, en 974. Còntra lei reiaumes crestians dau nòrd de la peninsula Iberica, aprofichèt lei guèrras civilas entre crestians per reconquistar divèrsei territòris e impausar una patz favorabla a seis interès en 966. Pasmens, a partir d'aquela annada, deguèt luchar còntra d'incursions vikingas. Aquò menèt a plusors combats navaus que s'acabèron per una victòria cordoana en 971.
En parallèl, Al-Hakam II contunièt de desvolopar Còrdoa. Acabèt lei trabalhs de construccion dau palais de Madinat al-Zahra e dirigiguèt de trabalhs d'agrandiment de la Granda Mosqueta de Còrdoa. Ordonèt tanben la construccion de plusors infrastructuras importantas dins sa capitala e fortifiquèt plusors vilas d'Al Andalós. La patz e lo contraròtle de l'extremitat nòrd-oèst dau comèrci transsaharian li permetèron d'assegurar lo bòn foncionament de l'economia. Lo Califat aviá ainsi un accès privilegiat a l'aur de Ghana e de batre una moneda reputada. A sa mòrt, Còrdoa èra la metropòli pus importanta d'Euròpa Occidentala e un centre artistic e scientific major amb de personalitats coma Recemund, Hasdaï ibn Shaprut, Abu Abdallah es-Siqili, Ibn Juljul e Lubna de Còrdoa.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Reinhart Dozy, Histoire des musulmans d'Espagne, Leyde, E. J. Brill, 1861.
- (en) Richard A. Fletcher, Moorish Spain, Berkeley e Los Angeles, University of California Press, 2006.