Batalhon (unitat militara)
-_Infantry_(NATO_APP-6).svg)
Una batalhon es una unitat militara que gropa entre 300 e 1 200 soudats e qu'es generalament comandada per un comandant. Es devesit en companhiás. Segon leis armadas, lei batalhons son gropats per formar un regiment o una bregada. Dins certanei cas especiaus coma un batalhon especializat dins una arma rara au sen d'una fòrça armada, lo batalhon pòu demorar independent.
Definicion
[modificar | Modificar lo còdi]La definicion d'un batalhon varia segon leis Estats, lei tradicions e lei doctrinas militaras en vigor. Per l'OTAN, es una unitat intermediària entre la companhiá e lo regiment qu'es compausada d'au mens doas sosunitats equivalentas a una companhiá e d'un comandament pròpri[1][2]. Seis efectius normaus varian de 300 a 1 200 òmes. De critèris suplementaris pòdon èsser aponduts en d'autrei país coma la preséncia d'una unitat de sostèn pròpria. Dins aqueu cas, lo batalhon es l'unitat pus pichona capabla de menar una operacion militara d'un biais autonòm.
Istòria
[modificar | Modificar lo còdi]
Lo batalhon es probablament l'eiretier de la batalha, un grop de combat utilizat dins la cavalariá medievala europèa. A l'origina, èra un gropament de fòrças divèrsas. Pasmens, au sègle XVI, dins leis armadas aguent adoptat lo regiment coma unitat organizacionala, lo batalhon (comandant per un comandant) venguèt una subdivision tactica dau regiment (comandat per un coronèu) e la companhiá (comandada per un capitani) una subdivision dau batalhon. En mai d'aquò, lo batalhon venguèt una caracteristica de l'infantariá car la cavalariá preferiguèt adoptar lo modèl de l'escadron. L'armada francesa, especialament durant lo rèine de Loís XIV (1643-1715), aguèt un ròtle important dins la difusion d'aquela organizacion.
Dins leis armadas pauc nombrosas, lo batalhon èra de còps equivalent au regiment tradicionau. Aqueu modèl èra frequent dins lei colonias britanicas onte lei tèrmes « batalhon » e « regiment » designavan d'unitats similaras formadas de companhiás. Après la Segonda Guèrra Mondiala, la demenicion regulara deis efectius dei fòrças terrèstras menèt a una difusion d'aqueu modèl dins mai d'un país, compres en França onte lei batalhons dispareguèron durant la segonda mitat dau sègle XX[3]. Uei, dins lo mond, lo modèl classic de la relacion entre regiments, batalhons e companhiás es estat gardat dins leis armadas importantas (Estats Units, Russia, Índia, China...). Quauqueis Estats, desirós de gardar de batalhons, an adoptat d'organizacions mixtas amb de regiments compausats d'un batalhon unic e amb quauquei regiments pus pesucs formats de plusors batalhons (Reiaume Unit, Canadà...).
Pasmens, dempuei la fin dau sègle XX, lo concèpte de gropament tactic interarmas (GTIA[4]) a donat una vigor novèla au concèpte de batalhon. D'efiech, aqueu tipe d'unitat gropan generalament un minimom de tres companhiás e dispausan d'una gama larga d'armas que li permèton d'assegurar una gròssa diversitat de missions amb un efectiu de quauquei centenaus d'òmes.
Exemples istorics
[modificar | Modificar lo còdi]Lo 22en batalhon de marcha nòrd-african
[modificar | Modificar lo còdi]Leis unitats de marcha son d'unitats provisòrias de l'armada francesa creada a partir d'unitats divèrsas. Lo 22en batalhon de marcha nòrd-african es ansin una unitat formada per la França Liura a partir de tiralhaires maugrabins (60 % deis efectius), de colons, de Francés metropolitans e de Còrses. Participèt a la batalah de Bir Hakheim, ai batalhas d'El Alamein, a la campanha d'Itàlia e ai combats en França en 1944-1945.
En abriu de 1944, teniá 870 òmes e èra plaçat sota la direccion dau comandant Pierre Lequesne. Èra compausat :
- d'un Estat-Major.
- d'una companhiá de comandament dirigida per un capitani.
- de tres companhiás de tiralhaires comandadas per un capitani e dos luòctenents.
- d'una companhiá « pesuca » formada d'una seccion de mitralhièras de 12,7 mm, d'una seccion de mortiers e d'una seccion anticarri de 75 mm (que dispausava de 5 jeeps).
L'unitat èra donc pas autonòma en causa de l'abséncia de supòrts materiaus ò d'engèni mai aviá una capacitat de fuòc relativament diversificada.
Lo batalhon de fusiliers motorizats sovietic
[modificar | Modificar lo còdi].png)
Lei fusiliers motorizats èran lo còr dei formacions d'infantariá mecanizada dei fòrças terrèstras sovieticas. Son organizacion èra donc estada l'objècte d'una atencion particulara e d'un nivèu d'estandardizacion destinada a assegurar son eficacitat au sen d'una armada numericament fòrça importanta. Dins leis ans 1980, un batalhon de fusiliers motorizats dispausava ansin de mejans relativament complèts :
- una companhiá dedicada au comandament de 12 personas.
- tres companhiás de 110 òmes combatent a partir de veïculs BTR ò BMP-1.
- una batariá alinhant 8 mortiers 120-PM-43 de 120 mm ò de canons-mortiers automatics 2B9 Vasilek de 82 mm.
- una seccion de defensa antiaeriana equipada de missils antiaerians leugiers (SA-7 Grail, SA-14 Gremlin ò SA-16 Gimlet).
- una seccion anticarri equipada de quatre lança-missils anticarri (AT-3 Sagger ò AT-4 Spigot) e de dos canons anticarri SPG-9 de 73 mm.
- una seccion dotada de sièis de lançaires de granadas AGS-17.
- una seccion logistica.
- una seccion de transmissions.
- un obrador de reparacions mecanicas.
- un pòste medicau.
L'efectiu totau èra de 525 òmes se lo batalhon èra equipat de BTR ò de 497 òmes s'èra dotat de BMP-1. Lei capacitats logisticas e mecanicas asseguravan una certana autonòmia a l'unitat.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]Nòtas e referéncias
[modificar | Modificar lo còdi]- ↑ (en) APP-6D NATO Joint Military Symbology. NATO Standardization Office, version d'octòbre de 2017, pp. 3–67.
- ↑ Un exemple d'unitat equivalenta a la companhiá pòu èsser la batariá d'artilhariá.
- ↑ D'unitats militaras dichas « batalhons » existisson encara dins l'armada francesa mai son en realitat equivalentas a de regiments. L'apelacion « batalhon » i es unicament gardada per de rasons istoricas.
- ↑ GTIA es un tèrme militar francés. Un tèrme equivalent dins una autra armada es lo grop tactic de batalhon dins leis armadas basadas sus lo modèl sovietic (Russia, Ucraïna...). Leis Estats Units an un concèpte similar mai organizat au nivèu de la bregada (la « Brigade combat team »).