Ernst Röhm
![](https://upload.wikimedia.org/wikipedia/commons/thumb/d/d7/Bundesarchiv_Bild_102-15282A%2C_Ernst_R%C3%B6hm.jpg/220px-Bundesarchiv_Bild_102-15282A%2C_Ernst_R%C3%B6hm.jpg)
Ernst Röhm (28 de novembre de 1887, Munic - 2 de julhet de 1934, Munic) èra un oficier e un òme politic alemand nazi. Fondator e cap dei Sturmabteilung (SA), representava lo corrent socializant dau NSDAP avans son assassinat durant la Nuech dei Lòngs Cotèus.
Oficier alemand durant la Premiera Guèrra Mondiala, jonhèt lei Còrs Francs cargats de la repression dei movements comunistas après lo conflicte. Faguèt lo rescòntre d'Adolf Hitler en 1919 e lo jonhèt au sen dau DAP (que venguèt lo NSDAP en 1920). Röhm foguèt alora cargat de la creacion d'una fòrça paramilitara dicha Sturmabteilung (« Seccions d'Assaut » en occitan). Après la revirada dau putsch de la braçariá en 1923 e la dissolucion provisòria dau NSDAP, foguèt elegit deputat d'un partit antisemita e s'exilèt en Bolívia en 1928.
En setembre de 1930, après la victòria electorala dau partit nazi, Hitler li demandèt de tornar venir per reprendre la direccion dei SA. En 1932, lei Seccions tenián 400 000 òmes mai sei metòdes brutaus començavan de venir un problema per lo partit. De mai, leis ambicions de Röhm, que voliá integrar l'armada alemanda au sen dei SA, e seis idèas en partida socialistas inquietavan lei conservadors aliats au NSDAP e la borgesiá. Favorable a un raprochament ambé lei mitans d'afaires, Adolf Hitler, vengut cancelier un an aperavans, decidèt donc de liquidar lo corrent representat per Röhm dins la nuech dau 29 au 30 de junh de 1934. Brèvament arrestat, foguèt executat dins sa cellula lo 2 de julhet seguent.