Estève VI (papa)
![](https://upload.wikimedia.org/wikipedia/commons/c/c0/Stephen_V_%28VI%29.jpg)
Estève VI (mòrt en aost de 897) foguèt lo 113en papa de la Glèisa Catolica Romana de mai de 896 a aost de 897. Succediguèt a Bonifaci VI (11-26 d'abriu de 896) e foguèt remplaçat per Roman (aost-novembre de 897).
Fiu d'un prèire dich Adrian, foguèt sacrat evesque per lo papa Formòsi (891-896) e elegit au tròne pontificau après lo pontificat efemèr de Bonifaci VI. Son rèine foguèt agitat car Formòsi aviá implicat la papautat dins un conflicte entre l'Ostau de Spoleto e Arnulf de Caríntia coronat emperaire a Roma en febrier de 896. Pasmens, dempuei aquela ceremònia, lei Spoleto avián enregistrat plusors succès e ocupat Roma. Per annular lo títol imperiau de son adversari, obliguèron Estève VI de reünir un sinòde per jutjar Formòsi e lo declarar indigne de la papautat. Dich concili cadaveric car l'accusat foguèt lo cadabre exumat de Formòsi, aqueu procès entraïnèt la condamnacion de l'ancian papa que son cadabre foguèt gitat dins Tibre. Pasmens, coma Formòsi èra popular en Roma, lo sinòde entraïnèt pereu d'esmogudas grèvas dins la vila. Estève VI i foguèt capturat e executat per leis insurgents.