Për amprende a dovré 'l sistema dle parlà locaj ch'a varda sì.
Teresa Luisa Rosa Vercellana, stranomà la bela Rosin, a nass a Nissa Marìtima j'11 ëd giugn dël 1833, fija ëd Giovanni Battista e ëd Francesca Griglio.
Ant l'istà 1847 a rëncontra a Racunis ël duca Vitòrio Emanuel, ardité al tròno, ch'a l'era marià con Marìa Adelàide d'Àostria dal 1842, e a na dventa la morosa preferìa.
A-j darà doe masnà, dont la prima a nass ël 1 dë dzèmber dël 1848, batesà Maria Vittoria Rosa Francesca Adelaide Guerrieri.
La sconda masnà a nass ij 4 d'otóber dël 1851: a l'é un mas-cc e a l'é ciamà Emanuele Alberto Francesco Ferdinando, stranomà Manuflo; për un boro ëd trascrission ansima a l'at, sò cognòm a resta Guerriero, nopà che Guerrieri.
Vitòrio Emanuel a resta vidov ant ël 1855.
J'11 d'avril dël 1859 Rosin a ven nominà contëssa ëd Mirafior e 'd Fontanafrèida.
Cand la capital dël regn a tramuda a Firense, Rosin a-j va dapress a Vitòrio e për chila a l'é prontà un palass a na desen-a 'd chilòmeter d'la sità.
Dël 1869 Vitòrio a maria Rosin con nòsse morganàtiche.
A l'ancamin dël 1872, Rosin a tramuda con ij sò fieuj a Roma, che antramentre a l'era dventà la capital dlë stat.
Dapress esse restà vidoa, Rosin a dev arnonsié a vàire dle soe residense, ma dël 1879 a torna 'd soa proprietà la residensa ëd Somariva.
Vers la fin dël 1885, antramentre ch'a l'era a Firense òspit ëd soa fija Vittoria, a ven malavia e a meuir ij 27 dë dzèmber ëd col ann.
Sò còrp a l'é portà a Mirafior, anté ch'a l'ero già sotrà ij sò.