Βοστώνη

Ηいーた Βοστώνη έν τたうοおみくろん τρανύτερον πολιτείαν κかっぱαあるふぁιいおた ηいーた πρωτεύουσα τたうηいーた Μασσαχουσέττης. Ονομάζουμε 'ατεν κかっぱαあるふぁιいおた "Αθήναν τたうηいーた Αμερικής" γιατί εいぷしろんχかい' τたうαあるふぁ περισσότερα πανεπιστήμια αあるふぁσしぐま'όλια τたう'άλλα πολιτείας τたうηいーた Αμερικής.

Σしぐまηいーたνにゅー Βοστώνην εいぷしろんιいおたνにゅー' πολλοί Πόντιοι Έλληνες αあるふぁσしぐま' όλια τたうαあるふぁ μερέας τたうηいーた Ελλάδας, αμάν οおみくろんιいおた πλείονες είν' ασή Μακεδονίας τたうαあるふぁ νομούς, όπως τたうηいーたνにゅー Κοζάνην, Ημαθίαν, Σαλονίκην, Φλώριναν, Κέστεραν κかっぱ,αあるふぁ.

Έχομε δύο Ποντιακούς Συλλόγους κかっぱαあるふぁιいおた είναι πολλά δυνατοί, τたうηいーたνにゅー «Παναΐαν Σουμελάν Βοστώνης» κかっぱαあるふぁιいおた τたうηいーたνにゅー «Ποντιακήν Εστίαν». Είναι αあるふぁσしぐま' ολίγους Συλλόγους πぱいοおみくろんυうぷしろん έχ'νにゅーεいぷしろん τたう'ατεινέτερα κτίρια απέ σしぐまηいーたνにゅー καρδίαν τたうηいーた Βοστώνης.

Εいぷしろんχかい'νにゅーεいぷしろん χορευτικά συγκροτήματα, μικρά κかっぱαあるふぁιいおた τρανά. Ηいーた Παναΐα Σουμελά εいぷしろんχかい' πολλά δυνατόν νεολαίαν. Ηいーた νεολαία μみゅーοおみくろんυうぷしろんνにゅー είν' οおみくろんλらむだ' γεννεμέν αδά σしぐまηいーたνにゅー Αμερικήν, αμάν έμαθαν νにゅーαあるふぁ παίζνε τたうηいーたνにゅー κεμεντζέν κかっぱαあるふぁιいおた νにゅーεいぷしろん τραωδούν, άμον νにゅーτたう'εγεννέθαν, γがんまιいおたαあるふぁ σしぐまοおみくろんνにゅー Πόντον γがんまιいおたαあるふぁ σしぐまηいーたνにゅー Ελλάδαν.

Ασό 2008, ερχίνεσεν νにゅーαあるふぁ έχ' Σκολείον Ελλενικής κかっぱαあるふぁιいおた Ποντιακής γλώσσας εντάμαν, όθεν μαθάνε τたうηいーたνにゅー Ιστορίαν, Πολιτισμόν, Παράδοσην, ήθη, έθιμα.

Τたうαあるふぁ τραωδίας βοηθούν πολλά τたうαあるふぁ μωρά νにゅーαあるふぁ μαθάνε τたうηいーたνにゅー γλώσσαν γがんまιいおたαあるふぁ τたう' ατό εμείς μみゅーεいぷしろん τたうηいーたνにゅー νεολαίαν έμουν, χορεύομε κかっぱαあるふぁιいおた τραωδούμε όθεν κかっぱαあるふぁιいおた νにゅーαあるふぁ ευρίουμες.