Caselle Landi
Caselle Landi (i Casèli en dialect lodigian)[1] è ina vischnanca taliana cun 1658 avdants en la provinza da Lodi en Lumbardia.
Geografia
[modifitgar | modifitgar il code]Il vitg sa chatta 35 km al sid da Lodi e 15 km al nord da Piacenza, a la riva sanestra dal Po.
Fracziuns e culegnas
[modifitgar | modifitgar il code]Tenor l'Institut naziunal da statistica (ISTAT) cumpiglia il territori communal il lieu principal Caselle Landi, la fracziun Gerrone e las culegnas Bruzzelle, Cascina Oratorio, Isola e Piardello.[2]
Vischnancas limitrofas
[modifitgar | modifitgar il code]Caselle Landi cunfina cun la vischnancas da Castelnuovo Bocca d'Adda, Corno Giovine, Cornovecchio, Meleti, Santo Stefano Lodigiano ch'appartegnan medemamain a la provinza da Lodi sco era cun las vischnancas da Caorso e Piacenza en la provinza da Piacenza.
Istorgia
[modifitgar | modifitgar il code]Avant che daventar in feud dals marches Landi il 1262 aveva la vischnanca num Caselle Vecchie e pli tard Caselle del Po. Suenter questa perioda ha ella obtegnida ses num dad oz. Enfin l'onn 1797 ha la vischnanca cumpartì la sort da Piacenza. Enfin la fin dal 16avel tschientaner sa chattava il lieu a la riva dretga dal Po. Suenter han ins fatg ina deviaziun dal flum uschia che Caselle ha midà a la riva sanestra. Malgrà quai è Caselle restà part da la diocesa da Piacenza e dal Ducadi di Parma e Piecenza.
Pir cun la stgaffiziun da la Republica Cisalpina il 1797 è Caselle Landi definitavamain daventà territori lumbard.
Monuments e lieus d'interess
[modifitgar | modifitgar il code]- Il chastè medieval è vegnì transfurmà dals Landi en in palazi (numnà Palazzo Vecchio (palazi vegl), per al distinguer dad in auter ch'appartegneva a la medema famiglia), che conserva fitg paucas fastizs dal bajetg oriund en furma quadratica. Igl exista anc ina da las quatter turs angularas.
- L'auter chastè, sper l'emprim, vegn numnà Palazzo Nuovo (palazi nov) u simplamain Palàsi (tenor il dialect da lieu) ed è vgnì surlaschà dal marches Manfredi Landi ad intginas famiglias. Enfin ils onns 1980 ha el alloschà la suletta apoteca dal lieu che sa chatta uss a la Via Garetti.
- Il Pozzuolo, in pitschen lai cun aua da funtauna en vischinanza dal Po, che s'emplescha cun aua da lez, filtrà tras sablun. Durant la stad serva el sco lieu da bogn.
- En la vischnanca datti er ina sala da kino che la vischnanca ha acquistà e restructurà cumplettamain. Ella vegn duvrada per eveniments, cunferenzas e represchentaziuns.
Populaziun
[modifitgar | modifitgar il code]Svilup demografic
[modifitgar | modifitgar il code]![](https://upload.wikimedia.org/wikipedia/rm/timeline/efb4nhe5xmsx16he1a1juqr89snpe9e.png)
Etnias
[modifitgar | modifitgar il code]Ils 31 da december 2008 dumbrava la vischnanca da Caselle Landi in total 102 esters,[3] quai che correspunda a 5,92 % da la populaziun. Tranter las naziuns las pli preschentas sa chattan:
Pajais | Avdants (2008) |
---|---|
Albania | 23 |
Marocco | 20 |
India | 18 |
Festas e fieras
[modifitgar | modifitgar il code]La festa principala ha lieu la quarta dumengia d'october, cur ch'i vegn festegià il patron dal lieu, Savino, uvestg da Piacenza.
Ina fiera da l'agricultura, da l'artisanadi e da muvel vegn organisada mintg'onn l'entschatta october.
Economia
[modifitgar | modifitgar il code]Il territori da la vischnanca occupescha ina zona planivada ch'il flum Po ha dà liber cun sa spustar plaun a plaun vers sid. Là sa chattan pliras culegnas e fracziuns sparpagliadas en la cuntrada che dipendan da l'agricultura. Lezza è era l'activitad economica principala e consista surtut en la cultivaziun da mais e da pavel per muvel che furnescha carn e latg ed en l'allevament da portgs sin nivel industrial. Il maletg economic vegn cumplettà dad interpresas artigianas en ils secturs construcziun, textilias e mechanica. Ultra da quai datti in tschert dumber da persunas che penduleschan a Piacenza, Codogno e Milaun.
Galaria
[modifitgar | modifitgar il code]-
Baselgia parocchiala
-
Chasa-cumin
-
Castello vecchio
(chastè vegl) -
Castello nuovo
(chastè nov)
Colliaziuns
[modifitgar | modifitgar il code]Notas
[modifitgar | modifitgar il code]- ↑ AA. VV., Dizionario di toponomastica. Storia e significato dei nomi geografici italiani, Milano, Garzanti, 1996, p. 156.
- ↑ ISTAT - Dettaglio località abitate
- ↑ Dati demografici ISTAT