Виктор Добрянскый
Виктор Добрянскый | |
---|---|
Чинность | каноник, секретарь Пряшовской епархии, школный иншпектор, публициста |
Горожанство | Австрійска імперія |
Уроджѣня | марца 30., 1816 |
Рудльов, жупа Земплин, Австрийска империя | |
Упокоеня | юна 12., 1860 (44 р.) |
Пряшов, Австро-Мадярщина | |
Причина смерти | хворомыселность, проба самогубства |
Брат, сестра | Адолф Добряньскый |
Ту можуть быти податкы з Wikidata, не контролованы авторами статѣ |
Виктор Добрянскый — грекокатолицкый священик, педагог, културный и политичный дѣятель русинофилской ориентации, публициста и организатор школства, старшый брат Адолфа Добрянского.
Образованя
[едітовати | едітовати жрідло]Родив ся 3.марца 1816 в Рудльовѣ, Врановскый округ, жупа Земплин, Австрийска империя в родинѣ грекокатолицкого священика Ивана Добрянского и Шарлотты Сепешгазиовой,[1] котра походила з нѣмецкых колонистох,[2] циже про него нѣмецкый язык и русинскый были материнскыма. В Левочи выходив гимназию, пак абсолвовав теологию и филозофию на высшой школѣ во Вѣдню.[3][4]
Културно-политична активность
[едітовати | едітовати жрідло]Працовав яко префект интерната про дѣтей схудобнѣлого земянства (1840-1847), а од року 1847 — секретарь епископа Пряшовской грекокатолицкой епархии, радник и нотарь конзистории.[2] В часѣ револуции рр. 1848-1849 быв вплывным каноником Пряшовской грекокатолицкой епархии[5] и быв меджи тыма немногыма числом русинскыма интелигентами, котры прияли револуцию з великыма надѣями на то, же ей идеалы и цѣли послужать на хосен и народностным меншинам Мадярщины. Од представительох мадярской векшины вшакже не находив порозумѣня, а его усилованя о розвой русинского школства и културы были означованы як «панславизм». Про то он и его сполочници гледали порозумѣня во Вѣдню: 13. октобра[5] 1849 быв на челѣ русинской делегации,[2] сповномочненой епископом Осифом Гаганцьом,[6] котра была прията императором Францом Йозефом І. и передала му Меморандум Русинох угорскых, быв ай едным з авторох того меморандума. Меморандум обсяговав 10 пунктох, в котрых были жаданя о ровны права Русинох з иншыма народностями, вытворѣня окремого Русинского округа з урядниками русинской народности, або овладаючыма русинску бесѣду, заведжѣня русинского языка як языка школной выукы и администрации в Русинском окрузѣ, вытворѣня гимназии и русинской академии в Ужгородѣ, выданя Русинского Вѣстника во Вѣдню, русинскы капланы в тых военскых еднотках, де вояци восточного обряда чинять векшину, ровна платня про русинскых урядникох, учительох, священикох и канторох, як в иншых частях монархии.[5]
Дакотры з тых жадань были зреализованы. Уж 15. октобра 1849 быв вытвореный Ужгородскый цивилный округ, а другым окружным референтом и управительом канцеларнѣ округа быв менованый Адолф Добрянскый.[6] Были менованы русинскы урядникы, заведеный «руськый» язык до административы, выписаны триязычны надписы в публичных просторах: мадярскы, нѣмецкы и «руськы», а «руськый» язык быв заведеный яко предмет до середных школ.[5] Хоть тот «руськый» язык подля представ Добрянского мав быти чистый великорусскый, але не быв уж з той простой причины, же урядници, учителе, священици знали лем свой мѣстный язык. Школным инспектором округа быв менованый Виктор Добрянскый.
Русины Земплина, Шариша и Спѣша жадали, обы были припоены к Ужгородскому цивилному округу.[5] Але по неповных пятьох мѣсяцях, 3. марца 1850 быв Адолф Добрянскый одволаный и повѣреный иншыма функциями, а новоствореный округ де факто перестав фунговати. Виктор Добрянскый быв менованый Школным радником до Кошиць (1850-1852). В Кошицкой гимназии организовав выуку «руського» языка и читав там курс грецкого языка. Продовжовав выступовати з публицистичныма статьями на политичны, културны и просвѣтны темы в Вѣстнику для Русиновъ Австрійской державы, выдаваном во Вѣдню.
Конець живота
[едітовати | едітовати жрідло]Мадярска слобода е милша неж русска деспотия, а приемна атмосфера Мадярщины е притяжливѣйша неж сибирска зима.[7]
Виктор Добрянскый быв локал-патриотом, не быв согласный з крайным панславизмом свого брата.
Од зачатку револуции вѣровав в ей идеалы и в то, же будуть они еднако служити и Русинам.
В новинцѣ Budapesti Híradó з дня 27. юна 1848 писав:
О то вецей быв скламаный политиков державы, психично захворѣв и 3. марца 1860 пробовав застрѣлити ся з пиштолѣ.[3][2][4] Умер 12. юна 1860, 44-рочный. Покоить ся в криптѣ Пряшовского катедралного храма, около А. Духновича.[2]
Выхоснованы жерела и одказы
[едітовати | едітовати жрідло]- Magocsi, Paul Robert. Chrbtom k horam. Dejiny Karpatskej Rusi a karpatských Rusínov. UNIVERSUM. Prešov, 2016. ISBN 978-80-89046-97-3. Сс. 154–159. сл.
- Добрянський Віктор. //Алмашій, Михайло. Русинська педагогічна енциклопедія. Ужгород, 2005. ISBN 966-2674-43-X. Сс. 87–86. укр.
- Аристовъ Ф. Ф. Карпато-русскіе писатели. Изслѣдованіе по неизданнымъ источникамъ. Томъ первый. Москва, 1916. С. 149.
- Добрянскый Адолф. Добрянський Віктор. //Ковач Ф. и др. Краєзнавчий словник русинів-українців. Пряшівщина. СРУСР. Пряшів, 1999. ISBN 80-85137-15-1. Сс. 116–117. укр.
- Добрянский Виктор. //Поп, Иван. Энциклопедия Подкарпатской Руси. Ужгород: Изд-во В.Падяка, 2001. 431 с. ISBN 966-7838-23-4. С. 158.
- Виктор Добрянскый на сайтѣ Rodovid. Вычитане 17.12.2017 русс.
Додаточны жерела
[едітовати | едітовати жрідло]- Заклинський К. Віктор Добрянський. Дукля, 1967, ч. 4. укр.
- Добрянський Віктор Іванович. //Павленко Г. В. Діячі історії, науки і культури Закарпаття. Малий енциклопедичний словник. Ужгород, 1999. ISBN 966-7242-10-2. укр.
- Рудловчак О. Справжній слов’янин. //Народний календар 1991. Братіслава-Пряшів-Ужгород. 1990. Сс. 58–60. укр.
Референции
[едітовати | едітовати жрідло]- ↑ Rodovid.
- ↑ 2,0 2,1 2,2 2,3 2,4 Ковач, Федор.
- ↑ 3,0 3,1 Алмашій, Михайло.
- ↑ 4,0 4,1 Поп, Иван.
- ↑ 5,0 5,1 5,2 5,3 5,4 Magocsi, Paul Robert.
- ↑ 6,0 6,1 Аристовъ Ф. Ф.
- ↑ Цитуе Magocsi, Paul Robert подля: Haraksim, Ľudovit. K sociálnym a kultúrnym dejinam Ukrajincov na Slovensku do roku 1867. Bratislava: Veda, 1961.