Otaku

Articulu in nugoresu

Otaku fachende fotografìas a trenos ind unu eventu de istatziones (Tokyo).

Unu otaku (おたく), foras de su Giapone, est connotu pro èsser una pessone chind unu interessu marcàu pro anime e manga. In Giapone etotu, peròe, su favèddu tènet connotassiòne negativa meda e bolet inditare a una pessone chi pro s'interessu suo bi tenet una vera e pròpria ossessione e pro chi bi andat macu: bi podet èssere s'otaku de sas màchinas, de sa mùsica, de sos computer e gai sichinde. Su vocàbulu a Ponente, imbetzes, est colau a bòler narrer "amantiosu de manga/anime" e bo'. In Giapone su faveddu est prus chi àteru negativu ma oje in die, sicomente an dau bida a una subcurtura chi est a fundamentu de su mercau de intertenimentu giaponesu, bi at zènte in cughe puru chi si narat "otaku" chin fieresa. A Ponente sa paràgula podet esser bona o mala, a secundu de chie la impreat.

"Otaku" benit dae su giaponesu お (o, una partichedda onorìfica) + 宅たく (taku, dommo): si impreabat comente pronùmene de secunda pessone singulare tra amantiosos de fotografia, chi sa zente bidiat semper sotzialmente "pacu abbistos", reservaos e ossessionaos dae s'interessu issoro: dae cughe, chin cussu sinnìficu negativu, sa paràgula est in impreu pro calesisiat tenzat unu carchi interessu pacu sanu. Unu istereòtipu de otaku est s'òmine chi est semper in dommo, isfainau de su totu, e non tenet perunu amicu chi non siat otaku che a issu. A commo, pro distingher su sinnìficu modernu dae cussu anticu, sa paràgula est iscrita o in hiragana (おたく) o katakana (オタク).