Su Hobbit
Articulu in nugoresu
![](https://upload.wikimedia.org/wikipedia/commons/thumb/e/e7/The_Hobbit_-_title_page_of_first_American_print.jpg/220px-The_Hobbit_-_title_page_of_first_American_print.jpg)
Su Hobbit (in limba orizinale The Hobbit o There and back again, ovverosiat "tucàda e torràda") est unu romantzu fantasy chi John Ronal Ruel Tolkien aìat iscrittu e prubicau pro sa prima bìa in su 1937. Su sichidore suo at a esser Su Sennore de sos Aneddos (The Lord of the Rings).
Su romantzu tenet unos cantos elementos de importu, chi si acatant in sos ateros traballos de Tolkien in supra de sa Terra de Mesu: s'Unicu Aneddu at a essere su tema tzentrale de Su Segnore de sos Aneddos, mentras chi sas ispadas elficas anticas de Gondolin nos torrant a ammentare su chi contat su Silmarillion. Su tema de s'eroismu est tzentrale, ca su romantzu in medas lu ant bìdu comente una metafora de sa Prima Gherra Mundiale, in ube massajos e zente de campagna in generale fit ghetada in su trintzeramentu nande chi sa gherra fit "atzione eroica".
Su Hobbit e sos ateros duos libros postos a pare fachent un'unicu contu chi addurat pro totus sas bator Eras chi Tolkien si aìat immazinau. In sa Prima Era, chi contat su Silmarillion, b'at sa cosmogonìa, sa genesi de sas ratzas (posta a banda cussa de sos Hobbit) e su chi zirat in tundu a su primu Segnore iscùru, Melkor; in sa de duas, chi nde contat s'appendice a Su Segnore de sos Aneddos e a s'Akallabêth (parte de su Silmarillion), b'at s'artziada e sa ruta de su regnu de sos Omines de Nùmenor e sa sestadura de sos Aneddos de sos Elfos, in ube los azuat Sauron, novu Segnore iscuru poi ispèrdiu chin s'alliantzia manna tra Omines e Elfos. In sa de tres, chi nde contant siat su Hobbit siat su Segnore de sos Aneddos, b'at sa reconchista de s'ascusòrju nanicu chi aìat furau Smaug e sa gherra de s'Aneddu, torra contr'a Sauron. In sa de bator, chi no nde contat perunu libru, sos Omines picant su podere in sa Terra de Mesu acabande a sas ateras ratzas.
Istoria
[modìfica | modìfica su còdighe de orìgine]Su maghiàrju Gandalf, paris chin trèichi nanos, fachet bìsita a Bilbo Baggins, unu hobbit chi vivet in Hobbiville, in sa Contea, e li ispiegat chi custos nanos, chi los cumandat Thorin Iscududechèrcu, bolent torrare a conchistare su regnu de Erebor, sa domo chi tando fit issoro in antis chi lìlla furèsit s'iscurtone Smaug. Gandalf lu arròlat che iscassinadore, ca est bravu a iscassinare, e sos cumpanzos li promittint su de batordichi de s'ascusorju chi est in sa muntagna. Bilbo, comente totus sos hobbit, est unu chi li piachet abbarrare in dommo fughinde su periculu, ma dorminde e pipande, ma a sa fine lu cumbinchent e tando tucat chin sos nanos. A pustis de unu muntone de avventuras, sos cumpanzos arribant a Erebor e la illìberant dae su iscurtone. Bilbo ch'at a torrare a domo ricu e chind unu aneddu de cabàle mannu.
Bibliografia
[modìfica | modìfica su còdighe de orìgine]- Stefania Carta e Ilaria Carta, S’Alfabetu de sos Hobbit, Cuartu Sant'Aleni, Alfa Editrice, 2021, ISBN 978-88-86167-29-1.