Paavvâl I

Paavvâl I

Paavvâl I (1. roovvâdmáánu 1754 Pietari, Ruošâ kiäisárkodde – 23. njuhčâmáánu 1801 Pietari, Ruošâ kiäisárkodde) lâi Ruošâ kiäisár iivij 1796–1801.

Paavvâl šoodâi roovvâdmáánu 1. peeivi 1754 Pietarist Piättâr III já Katariina Stuárrá vuosâpärnin. Paavvâl eeči morhedui, ko sun lâi tuše 8-ihásâš ige sun kuássin lamaš kieres enijnis. Kiäisárroonnig Elisabeth lâi suu válduášálâš šoddâdeijee. Ive 1773 Paavvâl naajâi Hessen-Darmstadt prinses Wilhelminain (ryeššilâš nommâ Natalia Aleksejevna), kii kuittâg jaamij vuosâpäärnis šoddâddijnis. Ive 1776 sun naajâi Württemberg prinses Sophia Dorotheain (ryeššilâš nommâ Maria Fjodorovna) já sunnui šoddii ohtsis love pärnid. Katariina Styeres ličij halijdâm, ete Paavvâl alge Aleksander šodâččij suu árbálâžžân Paavvâl saajeest. Katariina kuittâg jaamij ovdâl ko sun kiergânij virgálistiđ tom, já Paavvâl šoodâi kiäisárin skammâmáánu 17. peeivi 1796. Paavvâl ij lamaš pivnohis haldâšeijee já suu väldipaje paasij-uv uánihâžžân, ko sun morhedui njuhčâmáánu 23. peeivi 1801.