Baba Reshati
![]() |
|
Haxhi Dede Reshat Bardhi | |
Emri | Reshat |
Mbiemri | Bardhi |
Lindur më | 4 mars, 1935 |
Lindur në | ![]() |
Vdiq më | 2 prill 2011 |
Vdiq në | Tiranë, Shqipëri |
Kombësia | Shqiptare |
Profesioni | Kryegjysh i Krygjshatës Botërore Bektashiane |
Haxhi Dede Reshat Bardhi (Lusën, 4 mars 1935 – Tiranë, 2 prill 2011), ka qenë klerik i lartë bektashi, kryegjysh botëror i bektashinjve nga 1993 deri kur ndërroi jetë.
Biografia
[Redakto | Redakto nëpërmjet kodit]U lind më 4 mars 1935 në fshatin Lusën të prefekturës së Kosovës, në krahinën e Lumës (sot qarku i Kukësit).
Mësimet e para fetare i ka marrë tek hoxha i fshatit. Më pas ka ndjekur një kurs formimi në Medrese të Tiranës. Përdor gjuhën arabe për nevoja të predikimit e të ritualëve fetare. Më 1954 u dorëzua dervish tek Kryegjyshi Botëror i asaj kohe, Dede Ahmet Ahmataj. Gjatë viteve 1958–1967 ka qënë i internuar së bashku me Dede Ahmetin në Drizar të Mallakastrës. Pas viteve 1967 ka punuar për 23 vjet me radhë, punëtor në Ndërrmarjen Bujqësore „Gjergj Dimitrov“ në Tiranë.
![](https://upload.wikimedia.org/wikipedia/sq/thumb/b/b2/Foto10.jpg/300px-Foto10.jpg)
Më 1991, bën peligrinazhin tradicional islam (Haxhillëku) në qytetin e shenjtë të Mekës dhe fiton titullin Haxhi. Po atë vit, me ndihmën dhe bashkëpunimin e Nënë Terezës, rihap Kryegjyshatën Botërore Bektashiane. Më 20 korrik 1993 organizon dhe drejton Kongresin e Gjashtë bektashian, ku shpallet Kryegjysh Botëror i Bektashinjve. Shtatë vjet më vonë, në shtator të vitit 2000, organizon Kongresin e Shtatë të bektashizmit dhe shtator 2005, Kongresin e tetë bektashian. Këto 14 vitet e fundit pas përmbysjes së regjimit komunist, nën kujdesin personal të Dede Reshatit janë hapur e vënë në shërbim të besimtarëve bektashianë rreth 120 objekte kulti, duke realizuar kështu një ringjallje të vërtetë e të fuqishme të besimit bektashian në vendin tonë. Ka marrë pjesë aktive në konferenca e takime ndërkombëtare kushtuar problemeve të mprehta të kohës, si në Gjermani, Itali, Iran, Turqi, Azerbaixhan, Maqedoni, Kosovë etj. Ka luajtur rol të dorës së parë në ruajtjen e mardhënieve tradicionalisht të mira midis komuniteteve e besimeve të ndryshme fetare në Shqipëri, duke e vështruar tolerancën fetare si domosdoshmëri jetike dhe porsi hyjnore. Ai është nderuar me titullin "Pishtar i Demokracisë", është vlerësuar edhe nga Presidenti i Shteteve të Bashkuara të Amerikës, Xhorxh W. Bush, në lidhje me qëndrimin e prerë kundër aktit barbar të 11 shtatorit 2001, është nderuar edhe nga Papa Gjon Pali II gjatë Konferencës Botërore për një dialog ndërkombëtar për të mirën e Paqes. Në këto vite është nderuar në vendin tonë me tituj të ndryshëm si: Qytetar Nderi i Qarkut të Beratit, Kukësit, të Krujës, të Bulqizës, të Martaneshit dhe në mars të vitit 2005, me rastin e 70 vjetorit të ditëlindjes nga Presidenti i Republikës iu dha Urdhëri "Naim Frashëri i artë".[1]
Lidhje të jashtme
[Redakto | Redakto nëpërmjet kodit]- Haxhi Reshat Bardhi Dede Baba (Kryegjyshata Botërore Bektashiane)
Referime
[Redakto | Redakto nëpërmjet kodit]- ^ Fjalor Enciklopedik i Viktimave të Terrorit Komunist. Tiranë: Instituti i Studimit të Krimeve dhe Pasojave të Komunizmit. 2012. fq. 155–156. ISBN 978-9928-168-01-6.
{{cite book}}
: Mungon ose është bosh parametri|language=
(Ndihmë!)