Umhlanga (Lisiko)

Umhlanga noma umkhosi wemhlanga, ngumcimbi lolisiko lemaSwati logujwa minyaka yonkhe. Uba njalo ekupheleni kwenyanga Ingci nome ekucaleni kwenyanga yeNyoni. Tinkhulungwane temantfombatane netintfombi letisuka emiphakatsini leyehlukahlukene eveni lakaNgwane tita esigodlweni eLudzidzini kutongenela lomcimbi lotsatsa emalanga lasiphohlongo. Emantfombatana lamancane nalamadzala lasengakendzi futsi langakatali kutsiwa libutfo lembali. Ngubona ke labageca umhlanga. Emantfombatane nome tintfombi letikhulelwe tingakendzi nome tingakatsatfwa tona atiyi emhlangeni.

Umlandvo

Umhlanga wacala ngemnyaka wa 1940 Eswatini ngaphansi kwekubusa kwenkhosi Sobhuza II, ususelwa emkhosini lomdzala weMcwasho. Lelisiko lemhlanga solo lisagcinwa nalamuhla Eswatini. Eveni laseNingizimi Afrikha (South Africa) khona lelisiko noma umcimbi wemhlanga wacalwa nga-1991, acalwa yiNkhosi yemaZulu Goodwill Zwelithini. Khona lomcimbi ugujelwa kaNongoma, esibayeni semakhosi akaZulu.

INingizimu Afrika

ENingizimu Afrika, lomcimbi watiwa ngekutsi nguMkhosi weMhlanga, futsi ugujwa minyaka yonkhe, njalo ngenyanga yeNyoni eSigodlweni saseNyokeni kaNongoma Enyokeni, KaZulu. Emantfombatana aphuma kuto tonkhe tikhalu takaZulu, kusukela eminyakeni lemibalwa leyendlulile sekukhona emacenjwana lasuka Eswatini, kanye nasetindzaweni letikhashane letifana naboBotswana nePondoland.

Onkhe emantfombatana langenela lomkhosi kudzingeka kutsi ahlolwe kutsi asetintfombi ntfo yini ngaphambi kwekutsi avunyelwe kuba yincenye yalomcimbu. Eminyakeni lemibalwa leyendlulile lomkhuba wekuhlola uke wahlangabetana nekuphikiswa lokutsite.

Lamantfombatana avunula imvunulo yesintfu, kufaka ekhatsi i-beadwork, i-zigege, i-izinculuba kanye ne-imintsha letikhombisa imikhono yawo. Baphindze bagcoke emacakala, emasongo, imigexo, kanye nemabhande lanemibala lemihle. Libhande ngalinye linemibala leyehlukene, lokukhombisa kutsi lentfombatana iyatsembisiswa yini noma cha.

Eswatini

Eswatini, emantfombatana acala lomcimbi esigodlweni sendlovukati, lesikaLobamba eLudzidzini . Tintfombi tifika tibhalise, tilale, bese ngelilanga lelilandzelako bayaphuma bayakuyogeca umhlanga labaphindze babuye nawo khona esigodlweni eLudzidzini. Ngelilanga lelilandzelako tivuka tikhishwe ngiyo Indlovukati tichubekele esigodlweni seNkhosi eNkabezweni kaLozitha lapho libutfo latiswa khona kutsi litawugeca kuphi umhlanga ngekwehlukana kwalo bese liyaphuma. Ngelilanga lesitsatfu ke, tintfombi tivuka ekuseni tiyogeca umhlanga etidzidzini (wetlands). Lomhlanga ubese ulayishwa maloli uya esigodlweni eLudzidzini. Ngelilanga lesine imbali iyashuca seyibuyela emuva, itsi ngekushuca igibele emabhasi iye esigodlweni seNkhosi kaLozitha lapho ifike iphumule khona ngaphambi kwekutsi ibuyele esigodlweni E

eLudzidzini.

Ngelilanga lesihlanu, libutfo lembali liyaphumula liphindze liwashe nome lilungise imvunulo. Imvunulo yembali ifa ekhatsi emagcebesha (traditional necklace), emafahlawane (traditional anklets), indlamu (traditional skirts), emacandza (waist beads), umgaco kanye nemahiya. Ngelilanga lesitfupha tintfombi tilahla noma tetfula umhlanga embikweNkhosi kanye neNdlovukati. Ngelilanga lesikhombisa ke, kuba liholide lapho khona sive semaSwati kanye netivakashi letichamuka emaveni abomakhelwane kanye nangesheya kwetilwandle tihlanganyela nemakhosi esive saseSwatini kubukela umhlanga.

Ngalelilanga lemhlanga, libutfo lembali nome tintfombi tigidza embikwe makhosi, tivakashi nesive ngeticheme tato enkhundleni khona eLudzidzini. Titsi tingacedza kundlula enkhundleni bese titsatsa Inkhundla tigiya embikwesive tichayisa ngebugabazi bato. Bantfwabenkhosi, tinkhosatane nato tibayincenye yalomcimbi nekugidza, bona babonakala ngekufaka emaGwalagwala enhloko.

Ngalelilanga, iNkhosi nayo ingena enkhundleni idlalisele. Ngalesinye sikhatsi, iNkhosi iyaye ikhetse umfati khona etintfombini ngekutsi ifike imufake ligwalagwala enhlo lokusho kutsi sewuliphovela (engaged), noma loku kungenteki minyaka yonkhe.

Lelisiko noma umcimbi weMhlanga waacala ngemnyaka wa-1940 lususelwa esikweni lweMcwasho (Umcwasho) lapho khona emantfombate lamancane abehlukunaswa emacembu ngekweminyaka yawo afake insontfo lengumbala lotsite. Lamantfombatane abengavumeleki kuhlangana nebafana nome amitse loko bekulicala. Uma kwentekile intfombi yakhulelwa, tintfombi letikulelicembu layout betiya kubo kuyobabeka licala lokwakubitwa ngekutsi 'kudla tekondza'. Letintfombi nasetifike esigabeni sekutsatfwa betibitwa yindlovukati tentelwe umcimbi wekushisa umcwasho. Inhloso yalelisiko kwaku kukhutsata emantfombatane kutsi agcine buntfombi bawo.