Nojabr'sk

Nojabr'sk
Ноябрьск
Lidnanznam;	Flag;
Valdkund	Venäma
Eläjiden lugu (2017)	106,879 ristitud
Pind	38,84 km²
Pämez'	Aleksei Romanov; (keväz'ku 2016—)
Telefonkod	+7−3496-xxx-xxx
Avtokod	89
Aigvö	UTC+5 (MSK+2)

Nojabr'sk (ven. i tot.: Ноябрьск, ukr.: Ноябрськ, venälaine virkand [nɐˈjabrʲsk], nenc.: Нюдя Пэвдей марˮ, sijaline nenc.: Нюча пэ”дя”й марˮ) om Venäman lidn da lidnümbrik Jamalan Nenciden avtonomižen ümbrikon suviröunanno. Se om ümbrikon kahtenz' lidn eläjiden lugun mödhe, om ümbärtud Puran rajonan territorijal.

Istorii

1975. voz' lugetas lidnan oficialižen alusenpanendan vodeks, sen voden sulakul ezmäine desant ištutihe Itujah-jogen (ven.: Итуяха) jäle otmaha Holmogoran kivivoin löudmižsijad kävutamižhe. Zavottihe eländpunktan i Nojabr'skai-raudtestancijan sauvondad vn 1976 kül'mkus (ven. ноябрь) kuti kivivoin samižen radnikoiden žilo. Nimitihe Nojabr'skii-žiloks sauvomižen zavodindan kun mödhe. Vn 1978 lopus lendimport (NOJ / НОЯ) radaškanzi 8 km päivlaskmha lidnaspäi.

Nojabr'sk sai lidnan statusad vn 1982 28. päiväl sulakud. Se šingotase kivivoin da sen gazan samižel («Gazprom») i Vingapuran gazanümbriradajal tegimel («SiburTümen'Gaz»), kivivoikompanijoiden holitusen edheotandoil i sauvondkompanijoil, Nojabr'skan purugazelektrostancijal, maižanduzkompleksal i sömtegimištol (leibän i pol'fabrikatoiden tehmine, veden pakuitez).

Geografijan andmused

Lidn sijadase Nankpöh-jogen randoil (ven.: Нанкпёх 32 km pitte, vanh. Pösl'-Nan Пёсль-Нана, Pur-jogen bassein), 115 m ü.m.t. keskmäižel korktusel, Obin i Puran vezijagandanno. Om taigad i penid järvid lidnan ümbrištos, kaikiš suremb om Tetu-Mamontotäi-järv (31 km²) 8 km suvipäivnouzmha. Matkad Hantin da Mansin avtonomižen ümbrikon röunhasai om 10 km suvhe, Salehardhasai om 557 km lodeheze orhal vai 1140 km avtotedme. Lähembaižed lidnad oma Muravlenko 80 km lodeheze orhal vai 119 km avtol, i Kogalim (Hantin da Mansin avtonomine ümbrik) 120 km suvhe orhal, raudtedme i avtotedme.

Klimat om ven terav kontinentaline. Voden keskmäine lämuz om −3,4 C°. Paneb sadegid 550 mm vodes, vähemba uhokus.

Nojabr'sk om lidnümbrikon üks'jäine eländpunkt. Se kogoneb znamoitud projektirujil mikrorajonišpäi (oz., Д-1, И-2, Ц-1, Е, К) i edahaižes Vingapurovskii-mikrorajonaspäi (žilo edel 2004 vot, 80 km päivnouzmha avtotedme pidust' ümbrikoiden röunad). Lidnümbrikon pind — 189,05 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 110 620 ristitud, se oli kaikiš suremb lidnan ristitišt. Ortodoksižen hristanuskondan kaks' jumalanpertid, baptizman pühäpert' i islaman pämečet' (vspäi 2004) oma olmas lidnas.

Rahvahad (enamba 0,4% vl 2010): venälaižed — 65,5%, ukrainalaižed — 12,3%, totarlaižed — 6,7%, azerbaidžanlaižed — 2,9%, baškiralaižed — 2,3%, vaugedvenälaižed — 1,5%, moldovalaižed — 1,1%, lezgilaižed — 0,6%, čuvašalaižed — 0,6%, uzbekad — 0,5%, tadžikalaižed — 0,4%, čečenalaižed — 0,4%, kirgizlaižed — 0,4%, kumikad — 0,4%, toižed rahvahad — 3,4%, rahvahuden ozutandata — 1,0%.

Nojabr'skan professionaližiden da informacižiden tehnologijoiden kolledž, Jamalan äiprofil'žen kolledžan (Salehard) filial, Nojabr'skan gumanitariž-ekologine institut (Tümenin valdkundaližen universitetan filial) i Nojabr'skan kivivoin da gazan institut Viktor Gorodilovan nimel nimitadud (Tümenin industrialižen universitetan filial) oma opendusen aluzkundoikš, mugažo üläopendusen nell' filialad (Moskv, Tomsk, Novosibirsk, Jekaterinburg). Viž sportkompleksad ratas lidnas.