Nassau
Lidnanznam![]() | |
Valdkund | Bagaman Sared |
Eläjiden lugu (2016) | 274,400 ristitud |
Pind | 200 km² |
![]() | |
Telefonkod | +1−242 |
Aigvö | tal'vel UTC−5, kezal UTC−4 |
![](https://upload.wikimedia.org/wikipedia/commons/thumb/8/83/NewProvidence2021OSM.png/250px-NewProvidence2021OSM.png)
Nassau (mugažo anglijan kelel, virktas [ˈnæsɔː]) om Bagaman Sariden pälidn da kaikiš suremb lidn. Se om valdkundan opendusen, medijan i kommertine keskuz, mugažo Nju Providens-ümbrikon administrativine keskuz.
Istorii
Eländpunktan aluz om pandud anglijalaižil kuti Čarl'staun (angl.: Charles Towne) 17. voz'sadan keskes i om udesnimitadud vl 1695 nügüdläižikš Anglijan da Šotlandijan Uil'jam III-kunigahan augotižlibundan mödhe (Vil'hel'm III, 1689−1702, Oranjen-Nassaun tobmuzkodi).
20. voz'sadal Nassau šingotaškanzihe lidnaks kaitud kožujanno merikaranno. Vspäi 1920 äi rahoid tuliba lidnha, vahvištadud lähižiš AÜV:oiš «kuiv käskuz» kändi britaništ territorijad alkogoližeks bazaks, roman varažomaks kontrabandistoiden täht. AÜV:oiden laivišt kävuti sidä Toižen mail'man sodan aigan. Vn 1963 Kuban revolücijan jäl'ghe amerikaižiden turistoiden valu sirdi Bagamihe, i niiden pälidn kändihe lebukeskuseks. Britanižen kolonialižen arhitekturan äjüz vedab ičezennoks turistoid. Vspäi 1973 Nassau om ripmatoman valdkundan pälidnaks.
Nassau šingotase valdkundaližil aluzkundoil, lebuturizmal, tervhudenkaičendal (kuz' klinikad), meriportal.
Geografijan andmused
![](https://upload.wikimedia.org/wikipedia/commons/thumb/b/bf/Newprovidencenasa.jpg/250px-Newprovidencenasa.jpg)
Lidn sijadase Atlantižen valdmeren päivlaskmas, otab Nju Providens-sart täuzin (207 km²), sen kaikiš korktemb londuseline čokkoim om viž metrad ülemb meren tazopindad. Nassaun keskuz om saudud saren pohjoižpäivnouzmaiženno randanno. Matkad lähembaižhe järedha Majami-lidnhasai (Florid, AÜV) om 290 km päivlaskmha orhal. Lähembaine järed sar' om Andros 50 km päivlaskmha i suvipäivlaskmha.
Klimat om subekvatorialine päivoikaz, tropine mussonine savannan röunal. Voden keskmäine lämuz om +25,6 C°, kuidme +22,2..+28,9 C°. Ekstremumad oma +7,9 C° i +36,5 C°. Paneb sadegid 1426 mm vodes, enamba kezakus-redukus (151..220 mm kus), vähemba tal'vkus-keväz'kus (43..54 mm kus). Meriveden lämuz vajehtase +24..+29 C° röunoiš voden aigan.
Eläjad
Vn 2000 valdkundan rahvahanlugemižen mödhe Nassaun (kaiken Nju Providens-saren) kaikenaigaižiden eläjiden lugu oli 210 832 ristitud, vn 2010 — 246 329 ristitud, vn 2022 (eziandmused) — 296 522 ristitud. Kaikiš suremb lidnan ristitišt om nügüd'. Valdkundan ristitišton läz koumed nelländest eläb lidnas. Bagamiden ristitišt keskitase pälidnan teravan šingotesen tagut.
Transport
Avtobusad, taksid i avtoiden kortom oma kundaližeks transportaks lidnas. Avtotelikund om hurapol'ne AÜV:oiden erineden. Ehtatimed ühtenzoittas toižidenke elänzoittud saridenke. Džordž-princan valdmad oma meriportaks matkadajiden laivoiden täht.
Rahvahidenkeskeine civiline lendimport Linden Pindling nimed[1] (NAS / MYNN, 3,2 mln passažiroid vl 2014) sijadase sil-žo sarel 16 km päivlaskmha lidnan keskusespäi Killarni-järven päivlaskmaižel randal. AÜV:oiden muitkontrol' om siš, tehtas reisid AÜV:oidme, Kanadan lidnoihe i Kariban meren maihe, mugažo Bagamiden saridme.
Homaičendad
Irdkosketused
- Valdkundan da sen pälidnan ohjastusen oficialine sait (bahamas.gov.bs). (angl.)
- Nassau-lidnan penen Paradiz-saren turistine sait (nassauparadiseisland.com). (angl.) (+ äikel'ne känduz)
![]() |
Nassau Vikiaitas |
Pohjoižamerikan pälidnad | ||
Baster | Bel'mopan | Bridžtaun | Gvatemal-lidn | Havan | Kastri | Kingstaun | Kingston | Managua | Mehiko | Nassau | Ottav | Panam-lidn | Port-o-Prens | Port of Spein | | Rozo | San Hose | San Sal'vador | Santo Domingo | Sent Džons | Sent Džordžes | Tegusigal'p | Vašington | ||