Bikin

Bikin
Бикин
	Lidnanznam;
Valdkund	Venäma
Eläjiden lugu (2023)	15,875 ristitud
Pind	85,74 km²
Pämez'	Väčeslav Novikov; (uhoku 2022—)
Telefonkod	+7−42 155-xx-xxx
Aigvö	UTC+10 (MSK+7)

Bikin (ven.: Бики́н) om Venäman lidn da lidnankund Habarovskan randas. Se om randan kaikiš suvemb lidn, Bikinan rajonan administrativine keskuz.

Istorii

Eländpunktan aluz om pandud vl 1895 kuti kozakoiden Bikinskai-stanic (ven.: станица Бикинская), sid' Bikin-žilo, elänzoitmaha Venäman imperijan tahoid, om nimitadud jogen mödhe. Jogen nimi om sündnu udeg.: бикини-sanaspäi «akan veik». Žilo sai lidnan statusad vn 1938 9. päiväl kül'mkud. Šingotihe mecan ümbriradmižen keskuseks nevondkundaližen aigan.

Bikinan ižandusen päsarakod oma sömtegimišt da meblin tehmine, mugažo trikotegesiden fabrik om saudud lidnas.

Geografijan andmused

Lidn sijadase randan suvižes čogas, rajonan suvipalas, Bikin-jogen oiktal randal tobjimalaz (Ussurin oiged ližajogi), Ussurin alangištos, 70 m ü.m.t. keskmäižel korktusel. Sihote-Alin'-mägisel'gan sarakod 300..600 m kortte ümbärtas lidnad päivnouzmpolespäi.

Matkad Habarovskhasai om 195 km pohjoižpäivnouzmha orhal vai 215 km «Ussuri»-avtotedme. Lähembaižed lidnad oma Väzemskii 98 km pohjoižpäivnouzmha «Ussuri»-avtotedme (A-370) i kitajine Žaohe 20 km päivlaskmha orhal vai 40 km Pokrovk-külän kal't (röunpäličmänendtaho).

Tobmuz

Bikin om lidnankundan üks'jäižeks eländpunktaks.

Lidnankundan pämez' om sen Administracijan pämez'. Dmitrii Osadčuk radoi lidnan pämehen velgusentäutajan vn 2021 elokuspäi vn 2022 uhokuhusai. Edeline lidnankundan pämez' om Marina Manuilova (reduku 2017 — eloku 2021). Lidnan Deputatoiden nevondkundan ezimez' om Marianna Rudnickaja vn 2018 sulakuspäi. Edeline nevondkundan ezimez' om Marina Manuilova, radoi vn 2018 sulakuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 17 154 ristitud, rajonan ristitišton seičeme kümnendest, vn 2021 — 16 240 ristitud. Kaik 15 928 eläjad oli lidnas vl 2017. Kaikiš suremb ristitišt oli enamba 19 tuhad eläjid koumes pordos: vozil 1959, 1989−1992 i 2002−2008 (19 641 rist. vl 2002).

Rahvahad (vl 2010, enamba 1 %): venälaižed — 89,6 %, ukrainalaižed — 2,6 %, totarlaižed — 1,3 %, toižed rahvahad — 6,5 %.

Ortodoksižen hristanuskondan Jumalanmaman Kazanin jumalaižen jumalanpert'^[1] om sätud vll 1992−2009.

Lapsiden opendusen aluzkundad oma severz'-se päivkodid, keskškol. Profškol i Habarovskan tegimištoiž-ekonomižen tehnikuman filial oma lidnan professionaližen opendusen aluzkundoikš.

Transport

Avtobusad oma kundaližeks transportaks lidnas da sen ümbrištos. «Ussuri»-avtote ümbärdab lidnad päivnouzmas. Bikin-raudtestancii radab Transsiban Habarovsk — Ussuriisk jonol vspäi 1895.

Raudte- da avtotesildad oma lidnan suves Bikin-joges päliči.