Eilat

Eilat
אֵילַת

Lidnanznam	Flag
Valdkund	Izrail'
Eläjiden lugu (2022)	53,151 ristitud
Pind	84,79 km²
Pämez'	Meir Ichak Halevi (2003—, מאיר יצחק-הלוי‎)
Telefonkod	+972−8
Aigvö	tal'vel UTC+2, kezal UTC+3

Eilat (evr.: אֵילַת [eˈlat], arab.: إِيلَات Īlāt) om lidn-kurort Izrailin suvičogas. Mülüb Suviümbrikho.

Istorii

Amuine Ecion Gever-meriport oli olmas 1. voz'tuhal EME, sen jändused oma löutud kaivandusil. Amuižen Riman aigan nimitihe lidnad Ail:aks (latin.: Aila, Aelana), sodagarnizon sijazihe täs. Vl 1949 arabine Umm Rašraš-sodapost oli anastadud Izrailil sodan ripmatomudes aigan. Nügüdläižen eländpunktan aluz om pandud vl 1951, sai lidnan statusad vl 1959.

Eilat šingotase turizmal, meriportal (Umbemeren mineraloiden eksport), kivivoinveimen kävutamižel, šoll'oiden kazvatamižen tegim radab.

Geografijan andmused

Lidn sijadase Rusttan meren Akab-lahten randal, 16 m ü.m.t. keskmäižel korktusel. Otab Izrailin 12-kilometrišt randad täuzin. Om korktoid mägid ani lodeheze lidnaspäi. Röunatab Jordanijanke päivnouzmas i Egiptanke päivlaskmas.

Klimat om räk kuiv letetazangišton, päivoikaz lujas vodes läbi. Voden keskmäine lämuz om +25,4 C°, kezakun-sügüz'kun keskmäine päivän lämuz om +31,3..+33,8 C°, tal'vkun-uhokun +15,8..+17,4 C°. Absolütine minimum oleskeli +0,9 C° (viluku, uhoku), maksimum +48,3 C° (heinku, eloku). Il'man lämuz voib ülitada +32 C° miččel taht kul, i voib olda alemba mi +10 C° redukus-sulakus. Paneb sadegid 24 mm vodes, vihmub 10 päiväd vodes. Ei olele sadegid ani kezakus-sügüz'kus, paneb 1..5 mm toižiš kuiš. Meriveden lämuz vajehtase +21 C° (uhoku-keväz'ku) .. +28 C° (heinku-sügüz'ku) röunoiš. Kun keskmäine relätivine nepsuz vajehtase 15..19 % röunoiš sulakus-elokus, 27..33 % redukus-uhokus.

Eläjad

Vl 2008 lidnan kaikenaigaižiden eläjiden lugu oli 47 300 ristitud, vl 2017 — 50 724 ristitud. Kaikiš suremb lidnan ristitišt om nügüd'.

Evrejalaižed ottas lujad enambust lidnas, arabalaižed — 4 %. Läz kümned tuhad radnikoid tuldas lidnha lähižiš valdkundoišpäi kezaližen sezonan aigan.

Vspäi 2012 jäpert'kulu radab.

Lapsiden opendusen aluzkundad oma kahesa päivholen keskust, 67 ezipäivkodid i päivkodid, kümne aluzškolad. Professionaližen opendusen aluzkundad oma koume kuz'vottušt üläškolad, om specialižen opendusen školoid i religiiškoloid. Negevan universitetan Ben Gurionan nimed (Beer Šev) kampus radab Eilatas, läz 1100 üläopenikoid om siš, koume nelländest tuldas ezilidnoišpäi.

Transport

Avtobusad oma kundaližeks transportaks lidnas da sen ümbrištos. Kaks' avtoted ühtenzoittas valdkundan keskuzpalanke: nomer 12 i nomer 90. Lähembaine raudtestancii sijadase Dimon-lidnudes 35 km suvipäivnouzmha Beer Šev-lidnaspäi. Eilatan port laskeb matkoid mertme. Kontrol'punktad röunmaidenno oma Ichak Rabinan nimed (arab. Vadi Araba) Jordanijan röunal i Tab (Taba) Egiptan röunal.

Uz' rahvahidenkeskeine civiline Ramon-lendimport Ilan i Asaf Ramonan nimed (ETM / LLER, 1,9 mln passažiroid vl 2019) om avaitud Timn-alangištos vn 2019 sulakus. Se om kahtenz' surtte valdkundas, vajehti vanhad Eilat-lendimportad lidnan keskuses, sijadase 18 km pohjoižhe lidnan keskuzpalaspäi.

Irdkosketused

• Lidnan tobmuden oficialine sait (eilat.muni.il). (evr.)
• Lidnan turizman sait (eilat.city). (evr.) (angl.) (ven.) (fr.) (saks.)