Anselmus Adornes
![](https://upload.wikimedia.org/wikipedia/commons/thumb/e/ef/Portraits_d%27Anselme_Adornes_et_de_sa_femme.jpg/220px-Portraits_d%27Anselme_Adornes_et_de_sa_femme.jpg)
Anselmus Adornes (Brugge, 8 december 1424 - Schotland, 23 januoari 1483) was een Brugsche marchang, moakeloare, diplomoat, politieker, bedevoarder en mecenas. Je was de zeune van Pieter Adornes, een ofstammelink van een ryke marchang uut Genua die bevriend was met de groaf van Vloandern, Gwyde van Dampierre. Eén van under vôorvoaders was doge van Genua en de familie kwam in 1307 in Brugge weunn.
Anselmus Adornes was marchang in wulle, loakn en aluun. Je weunde in een grôot uus an de Verversdyk in Brugge. Je deed goeie zoakn met Schotse commercantn in wulle en met de loaknververs in den omtrek. Langst de Verversdyk loagn d’r vele ververyen. Schotse wulle wierd g’importeerd en o.a. in Brugge verwerkt tout loakn. An de ververyen leverde Adornes aluun, een fixeermiddel da nôdig was by ’t kleurn van stoffn.
Anselmus Adornes aad ook verschillige belangryke functies in ’t stadsbestier van Brugge. J’ is zelfs een ende burgemêester gewist.
In 1470 gink Adornes tegoare met zyn zeune Jan ip bedevoart noa Jerusalem. Achter dat de paus under gezegend aad in Rome, vertokkn ze met een grôot Genuees schip. Os ze were thuus woarn en ze de privé-kapelle, die Anselmus zyn voader bouwde in 1429 in Brugge, ofgewerkt tout de Jerusalemkerke, noar een kopie van d’Eilig Grafkapelle in Jerusalem.
Anselmus Adornes wierd deur de Bourgondische ertoogn geregeld belast met diplomatieke missies in ‘t Ôostn en Schotland. Je bemiddelde vo Genese commercantn en Spoansche marchangs in Schotland.
In 1468 wierd ’n deur Karel den Stoutn noa Schotland gezoundn ols ofgevoardigde van de stad Brugge.
Achter da zyn politieke rolle in Brugge uutgespeeld was krêeg Adornes in Schotland ’t vertrouwn van keunink James III en je wierd z’n roadgever.
Ip 7 december 1482 makte Adornes een nieuw testament omdat ’n vrêesde vo z’n leevn. Je wilde begroavn wordn in de Sint-Michaelkerke neffest ’t kastêel van Linlithgow. Kort doarip wierd ’n in een klôoster vermôord binst een pelgrimstocht deur Schotland.
Ip 3 moarte 1483 wast er een uutvoartdienst vo Anselmus Adornes in de Jerusalemkerke in Brugge. Z’n erte wierd in een kiste uut Schotland overgebrocht en bygezet in ’t graf by z’n vrouwe Margareta van der Banck (gestorvn round 1463). Da grafmonument stoat centroal in de kerke. Adornes stoat ook ofgebeeld tegoare me z’n vrouwe ip een veister in gebrandschilderd glas.