Cartlanna stairiúla BCE
Is mór againn ár stair!
Bunaíodh cartlanna stairiúla an Bhainc Ceannais Eorpaigh chun cuimhne institiúideach BCE a chaomhnú, chun tacú le trédhearcacht agus chun eolas ar stair an Aontais Eacnamaíoch agus Airgeadaíochta, an Chórais Eorpaigh Banc Ceannais (CEBC) agus an Eurochórais a fheabhsú.
Tá an Banc Ceannais Eorpach tiomanta doiciméid a bhfuil luach stairiúil ag baint leo a chaomhnú agus iad a chur ar fáil don phobal. Mar gheall ar struchtúr comhtháite CEBC, an Eurochórais agus na gcartlann lena mbaineann, oibrímid i gcomhar le bainc cheannais náisiúnta Bhallstáit an Aontais chun an sprioc sin a bhaint amach.
An bhfuil suim agat tuilleadh a fhoghlaim faoi ról BCE agus a réamhtheachtaithe? Ar mhaith leat tuilleadh eolais a fháil faoi na céimeanna a glacadh chun bailchríoch a chur ar an Aontas Eacnamaíoch agus Airgeadaíochta, agus faoin tionchar a bhíonn ag cinntí a rinneadh roimhe seo ar do shaol laethúil go fóill?
Dá mba mhaith, is féidir leat rochtain a fháil i gcartlanna stairiúla BCE ar dhoiciméid atá i seilbh BCE agus atá níos sine ná 30 bliain agus atá dí-rúnaicmithe i gcomhréir le Cinneadh BCE/2023/17.
Eolas faoi chartlanna stairiúla BCE
I gcartlanna stairiúla BCE is féidir leat teacht ar dhoiciméid:
ó Choiste Gobharnóirí Bhainc Cheannais Bhallstáit Chomhphobal Eacnamaíochta na hEorpa (1964-93) ón gCiste Eorpach um Chomhar Airgeadaíochta (1973-93) ó Choiste Delors (1988-89) ón Institiúid Eorpach Airgeadaíochta (1994-98) ón mBanc Ceannais Eorpach (1998-inniu)Tá ábhar closamhairc agus déantáin fhisiceacha i gcartlanna stairiúla BCE freisin.
Brabhsáil gach rannán chun tuilleadh eolais a fháil faoi chartlanna an Bhainc Ceannais Eorpaigh agus chun rochtain a fháil ar dhoiciméid dhí-rúnaicmithe a cuireadh ar fáil ar líne.
Seirbhísí d’úsáideoirí
Má theastaíonn cabhair uait chun doiciméid a fháil ó chartlanna stairiúla BCE chun críocha do chuid taighde, seol ríomhphost nó litir (i gceann de theangacha oifigiúla an Aontais Eorpaigh) chuig:
archives@ecb.europa.eunó:
Cartlanna BCE
An Banc Ceannais Eorpach
An Rannán Rialachais Faisnéise
Sonnemannstrasse 22
60314 Frankfurt am Main
An Ghearmáin
Tá fáilte romhat féachaint ar dhoiciméid ó chartlanna stairiúla an Bhainc Ceannais Eorpaigh sa seomra léitheoireachta i bPríomhfhoirgneamh BCE le linn uaireanta oibre trí choinne a dhéanamh roimh ré.