ברוך אַתה, זינגט דער טאַטע
פון אברהם רייזן
ברוך אַתה, זינגט דער טאַטע
![](https://upload.wikimedia.org/wikisource/yi/b/b5/%D7%90%D7%91%D7%A8%D7%94%D7%9D_%D7%A8%D7%99%D7%99%D7%96%D7%9F.jpg)
- ברוך אַתה, זינגט דער טאַטע,
- און ער צינדט די ליכט.
- און די שטראַלן, מילדע פאַלן,
- אויף זיין בלאַס געזיכט.
- און אַ פייער, הייליק טייער,
- פון די אויגן לייכט.
- און דער מידער, מיט די גלידער,
- האָט זיך אויסגעגלייכט.
- און עס דאַכט זיך, און עס טראַכט זיך,
- ס'איז נאָך עפעס דאָ!
- ס'איז געבליבן, וואָס צו ליבן,
- הייליק איז די שעה!
- אַלטע קלאַנגען, לאַנג פאַרגאַנגען,
- ניין, עס קלינגט נאָך אַצינד!
- זינג מיר, טאַטע, ברוך אַתה,
- און איך בלייב דיין קינד!