出自維基百科，自由嘅百科全書
下環街市重建前嘅大門口
重建前嘅下環街市內部環境
2009年重建後嘅下環街市
下環街市，全稱下環街市市政綜合大樓（葡文：Complexo Municipal do Mercado de S. Lourenço）係位於澳門半島下環區李加祿街同貨倉街以及下環街交界處嘅街市。
原本街市起初設立下環小市街，小販就喺街道嘅兩邊擺檔。之後又喺下環小市街同下環街交界起咗一座兩層高嘅建築物，樓上開咗一間海鏡戲院，樓下就闢作街市，名為下環街市，而街坊就會叫佢做海鏡街市。海鏡戲院執笠之後，直到1950年代初，由於原本嘅街市不敷應用，市政當局就搵咗李加祿街被棄置嘅爛花園興建新街市。
下環街市喺1954年8月竣工啟用，名為下環市場，但係啲人都重係習慣叫做下環街市。佢由澳門建築師陳焜培設計、土生葡人工程師左歐治嘅現代主義風格平房建築，個街市營運至2006年7月18號傍晚正式關閉，原本各個小販搬到去附近臨時街市繼續營業。
原來管理街市嘅民政總署喺2004年建議拆卸下環街市，改為一間附有社區中心同泊車樓層嘅現代化街市，文化界雖然表示反對。但係民政總署已經喺2006年7月18日將街市關閉，並喺2006年8月開始動工重建，工程為期兩年，總造價預算為一億一千四百萬葡幣。
新街市命名為下環街市市政綜合大樓，喺下環街市嘅原址興建；總建築面積13,120平方米，總樓高八層，另外有三層地庫做卸貨區同停車場；地面第一、二層係街市，街市嘅衛生狀況良好，三樓係圖書館，四樓就係社區活動中心，天臺係露天綠化區，設有羽毛球場。新街市於2009年11月26號啟用，而民政總署位於司打口嘅服務站亦於11月30號搬入街市四樓，並改名做「下環服務站」。[1]
- 街市部分開放時間：朝早7:30至夜晚7:30
- ↑ 〈新下環街市啟用反應佳 民署司打口服務站下周一遷入〉。澳門日報。2009年11月26日。頁 B3。
