出自維基百科,自由嘅百科全書
二月革命 (俄文:Февральская революция,拉丁化:Fevralskaya revolyutsiya) ,又叫做“三月革命”[a],喺蘇聯歷史叫做“二月資產階級革命”[2], 係喺1917年俄國革命期間嘅第一次革命,成功折斷沙皇喺俄羅斯嘅統治,成立咗短期嘅共和國。
俄羅斯自從16世紀,已經係由沙皇統治。自從俄羅斯加入咗一次大戰以嚟,俄國嘅經濟不進則退,造成嚴重嘅社會矛盾。除此之外,雖然用咗國庫嘅唔少錢,但係俄國依然喺東方戰線輸緊俾德意志帝國,令俄羅斯人更加唔妥。喺儒略曆1917年2月23號[3],聖彼得堡出現大型嘅反政府示威,一般都認為係冇事先計劃嘅[4]。本來城市嘅警察同示威者衝突得好犀利,但係佢哋期間又改為支持示威者。喺示威持續咗8日之後,尼古拉二世宣佈退位,俄羅斯帝國正式滅亡。
喺革命贏咗之後,利和夫成為咗俄國臨時政府嘅總統,但係因爲佢決定繼續打仗,而變成咗非常之唔受歡迎。與此同時,社會主義嘅團體喺聖彼得堡成立咗自己嘅政府,實際上同臨時政府一齊管治俄羅斯。到7月發生嘅一次警民衝突之後,奇倫斯基成爲咗總統。但係,臨時政府由始至終都唔能夠解決到人民嘅憂慮,例如打仗、糧食不足、同高失業率等等。呢啲問題令臨時政府喺只係管治咗8個月之後,已經因爲十月革命發起而滅亡。
歷史學家對於二月革命嘅起因都有爭議。蘇聯時期嘅學家認為係無產階級針對資產階級嘅緣故,西方學家主要相信係因爲俄羅斯加入一次大戰而造成,而有其他亦覺得係農奴制造成嘅土地問題所引致。依家,大部分學家一般都同意,呢啲所有其實都助長咗革命爆發。
- ↑ 當時俄羅斯未轉用新曆,仲係用緊儒略曆,所以日期有差距