出自維基百科，自由嘅百科全書
母親節蛋糕
母親節係一個感謝阿媽嘅節日。喺美國、加拿大同埋一啲其他嘅國家，每年5月嘅第二個禮拜日就係母親節。喺其他一啲國家日子就唔一樣。做母親嘅喺呢一日通常會收到禮物。康乃馨被視為送畀阿媽嘅花。
母親節係起源於古希臘。喺呢一日，古希臘人會向希臘眾神之母蓋亞致敬。之後去到17世紀中，呢個節日就傳到去英國。喺呢一日，出咗外面嘅後生仔會返屋企，送一啲小禮物畀阿媽。
而家嘅母親節係起源於美國，由安娜·賈維斯（Anna Jarvis，1864－1948）發起。佢成世人都冇結婚，一路陪喺佢阿媽身邊。安娜·賈維斯阿媽心地好，又好有同情心，佢話應該搞一個紀念日嚟紀念靜雞雞付出嘅阿媽，但係呢個願望重未實現佢就過咗身。
安娜·賈維斯喺1907年開始搞活動，申請母親節做法定嘅節日。節日喺1908年5月10號喺美國嘅西維珍尼亞同埋賓夕凡尼亞州正式開始。1913年，美國國會確定改每年5月嘅第二個禮拜日做法定嘅母親節，重規定呢一日家家戶戶都要掛國旗，表達對阿媽嘅尊敬。安娜·賈維斯阿媽生前最鍾意嘅康乃馨，就做咗母親節嘅象徵。
