出自維基百科，自由嘅百科全書
滑翔機
滑翔機一般嚟講都係冇動力、細細隻、好簡單嘅飛行工具。亦都有啲貴啲嘅滑翔機，有引擎，喺滑行高度唔夠高嗰陣點火飛高啲，熄火再滑過。啲引擎馬力同燃料方面係同飛機冇得比嘅。滑翔機主要係靠對翼嚟飛，所以翼好重要。大多數滑翔機嘅翼都特別大特別長，噉樣可以獲得更加大嘅昇力。而機身方面就盡量細，成部機嘅材料要盡量輕，亦要夠堅固。
滑到幾高幾遠視乎天氣同開滑翔機嘅人嘅技巧。滑翔機嘅結構亦都有影響。啲高級嘅滑翔機，翼好闊好長，就算冇風都可以每降低1米向前滑行50米咁遠。
好耐以前啲人就識放紙鷂。查實滑翔機就係大紙鷂，不過唔使線。響飛機發明之前就經已有滑翔機。1809年英國人佐治·茄利試驗咗第一架滑翔機，不過飛唔高亦都飛唔遠，唔算真正意義飛起過。1847年佢先至成功用佢嘅滑翔機帶住個10歲細路飛到10米咁高。1851年，佢改進嘅大型滑翔機載住四個人，成功脫離拉索滑行500米咁遠。
奧拖·哩連他爾試驗佢嘅滑翔機。
1891年德國工程師奧拖·哩連他爾用竹同藤做架，蒙布做機翼，做咗第一架固定翼嘅滑翔機。成部機得4斤重，翼有7米咁長。佢自己吊響兩塊翼下便，喺15米高嘅山坡上便飆落嚟，扭轉身體控制飛行，滑咗90米按安全落地。之後，直到1896年8月9日佢飛行遇大風出事，佢做過5挺唔同翼嘅滑翔機，試驗2000幾次。最後尾嗰次飛出事嘅第二日佢就死咗。
1903年懷特兄弟發明嘅飛機亦係滑翔機嘅先驅。飛機係由滑翔機嘅基礎上便改造出嚟嘅。第一次世界大戰完咗之後，德國同美國都有人做滑翔機嚟搞滑翔體育運動。1930年代體育用嘅滑翔機發展好快。性能改進，啲靚嘅滑翔機一日可以滑行幾百至到成千公里。第二次世界大戰嗰陣好多國家開始製造軍用滑翔機，用做軍隊空降。
滑翔機個架同飛機差唔多，固定嘅翼、機身、腳架、轆，重有一啲附加結構。滑翔機翼大機身細，同飛機唔同。個機身亦要盡量輕、結實。
有好多唔同嘅起飛方式。因為冇動力，起飛方式就同飛機唔同。
- 要一條索拉住，如果喺地面，就用車之類嘅嘢拉部機，好似放紙鷂噉放飛。等飛到差唔多高嗰陣時除低條索。亦有啲人用飛機拉住滑翔機起飛，然之後除低條索等滑翔機自己飛。
- 用啲彈性發射裝置，猛噉彈部機出去。
- 啲細同輕嘅滑翔機可以運去山頂，人拎起部機猛噉衝，然之後吊喺部機下便飛出去。
滑翔機嘅降落同飛機冇乜唔同。降落嗰陣時飛行員要好準確噉把握同控制好下降滑行嘅速度同姿態，因為冇動力，唔似飛機下降速度同姿態唔啱可以飛高再嚟，滑翔機得一次機會。噉就要求飛行員特別小心至得，一下唔覺意嘅話就弊傢伙。
