出自維基百科，自由嘅百科全書
羅經
羅經（經讀耕；英文：compass），又叫指南針、羅盤、羅庚，亦有地方叫指北針，係搵方向嘅架生，通常配地圖一齊用。最初指南針用磁石做，借地磁辨向。家陣有電子指南針，借助人造衞星訊號修正磁偏。羅經指最早響中國出現，研究中國工藝嘅李約瑟，視佢爲中國四大發明之一。
依賴羅經嘅行業，如風水同行船，會叫羅經。一啲少用羅經嘅人，因敎科書緣故，會叫佢指南針。
羅經南北向，南北無分上下。唐人通常以南爲準，叫指南、司南。近代泰西各國，則以北爲準，指針上，北紅南白。
未有羅經之前，人要辨方位，會靠日月星辰，斗轉星移判別。但呢個要靠長時觀察，先可以用。由於地磁南北，同地球南北，大致相同，羅經可以隨時隨地咁用。
傳說中國三皇五帝，黃帝有指南車，由迷霧中辨得方向，打敗敵人。不過可能係僞托都唔定，已不可考。後世人亦曾造指南車，唔係靠地磁，而係以機械原理，保持指向不變。
漢時製得司南。好似隻鐵羹放喺鐵板上。
真正用於戰事行船，已係大宋之時。
方位歸納方向。自宋以來，羅經係用廿四方位。而西洋就以十六或卅二方位。不過家下多數用度數，以求準確。
唔同用途，有唔同羅經。有啲專爲行船用，行啲方便行山用，有啲爲行軍用。有啲純粹靠地磁，故此內含磁鐵，帶動指向。而電子羅經用電磁感應，以及通訊訊號，以電子畫面顯示。
風水羅經
風水羅經，通常方形，中爲指針，盤內刻有種種風水提示。傳聞遇到妖物，指針會亂轉。
行船羅經
舊時中式羅經，都無人用。轉用西式羅經。行船用嘅羅經，顧及船會上下左右擺動，以及揸船會望前而行，刻度以打直表示。
電話羅經
現代電子儀器發達，通訊器材及電腦微細，亦有人造衞星協助，連手提電話都可以收集訊號，計算方向，作羅經之用。
