出自維基百科，自由嘅百科全書
陳祖為（英文：Joseph Chan Cho Wai，1960年—）係香港政治哲學學者，喺香港大學政治與公共行政學系做過教授。
陳祖為早年居住喺九龍深水埗蘇屋邨，就讀鄧鏡波學校[1]。喺香港中文大學攞到社會科學士學位後，佢去咗倫敦政治經濟學院修讀理學碩士，再喺牛津大學攞埋哲學博士學位。之後，陳祖為加入香港大學政治與公共行政學系，主要教授政治理論，一教就教咗成三十年，直至2021年。佢近年嘅研究範疇包括：儒家政治哲學、比較政治哲學、當代自由主義同民主理論、致善主義、人權同埋公民社會等，論文見於唔同知名國際期刊[2]。1999-2000年，佢係哈佛大學哈佛燕京學社嘅訪問學人[3]。2019至2022年期間，佢喺美國普林斯頓大學嘅「人文價值中心」擔任訪問教授，教儒家政治哲學[4]。
陳祖為一般被視為溫和民主派人士。2006年公民黨成立嘅時候，陳祖為係創黨成員之一，2014年退出[5][6] 。2015年，佢聯同前公民黨成員湯家驊創辦智庫組織民主思路，並擔任民主思路聯席召集人，2017年8月退出。退出民主思路嗰陣，佢曾經公開批評湯家驊嘅言論太過針對民主派[7][8][9][10][11]。
