Ultramontanismus

Mit em Begriff Ultramontanismus wird e politischi Haltig vom Katholizismus in dütschsprochige Länder und de Niiderlande bezeichnet, wo d Lüüt ihri Wiisige usschliesslig vo dr päpstlige Kurie bezoge hai, aso vom Vatikan, wo „über de Bärg“ (latiinisch ultra montes - gmeint si d Alpe) liit. Die Haltig isch au gege liberali Tendänze gsi und het sich im früehje 19. Johrhundert duuregsetzt, vor allem im Verlauf vom Kölner Chillestriit, im Gegesatz zu de Johrhundert drvor, wo s dütsche Episkopat si Eigeständigkeit Rom gegenüber bedont het. Im 19. Johrhundert isch dr Ultramontanismus die herrschendi Strömig im Katholizismus im dütschsprochige Ruum gsi.

Dr Begriff isch as Schlagwort im so genannten Kulturkampf in dr zweite Helfti vom 19. Johrhundert bruucht worde. D Zentrumspartei het sit 1870 die politischi Richdig verdrätte—churz noch ihrer Gründig het d Usenandersetzig zwüschen em Dütsche Riich under em Riichskanzler Otto von Bismarck und dr katholische Chille agfange. Noch dr Gründig vo dr CDU, wo sich nit konfessionell usgrichtet het, het dr Ultramontanismus sehr vil politische Iifluss verlore.

Au z Frankriich und z Belgie isch dr Begriff bruucht worde. Do het er aber ehnder e Haltig gegen e Liberalismus gmeint, wo sich au in dr Chille und dr Religion het afo breit mache.

Litratur

• Victor Conzemius: Art. Ultramontanismus. In: Theologische Realenzyklopädie 34 (2002), S. 253-263
• Gisela Fleckenstein, Joachim Schmiedl (Hrsg.): Ultramontanismus. Tendenzen der Forschung. Einblicke 8. Bonifatius, Paderborn 2005 ISBN 3-89710-306-0
• Jürgen Strötz: Der Fels der Kirche. Ultramontane Kirchenlehre im 19. Jahrhundert, dargestellt am Beispiel des Eichstätter Bischofs Franz Leopold Freiherrn von Leonrod (1827 - 1905). Studien zu Religionspädagogik und Pastoralgeschichte 4. Kovač, Hamburg 2003 ISBN 3-8300-1108-3