Lamata
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- As formas «a Mata» y «la Mata» rendrezan ta iste articlo. Ta atros usos de «Mata» se veiga La Mata (desambigación).
| Lamata | |
| Lugar d'Aragón | |
 A sola carrera de Lamata, en o lateral de a plaza. | |
| Entidat • País • Provincia • Comarca • Municipio |
Lugar Aragón.svg){kind=small} UescaSobrarbe L'Abizanda |
| Partiu chudicial | Boltanya |
| Población • Total |
27 hab. (2010) |
| Altaria • Meyana |
572 m. |
| Distancia • 93 km • 19 km • 7,2 km |
enta Uesca enta L'Aínsa enta L'Abizanda |
| Codigo postal | 22393 |
| Chentilicio | lamatino/-a |
| Fiestas | 28 d'agosto |
| Patrons | Sant Agostín d'Hipona |
| Parroquial • Diocesi • Arcipestrau • Parroquia |
Uesca Semontano-Sobrarbe Santos Acisclo y Victoria |
| Ríos | Susía |
| Coordenadas | |
Lamata[1] ye un lugar aragonés d'o municipio de l'Abizanda, en a provincia de Uesca y a comarca de Sobrarbe. A suya población ye de 27 habitants (2010[2]).
En chunto con Escaniella formón un municipio, plegaus, dende 1834[3] (que en o censo de 1845 se deciba «Escanilla y Lamata») dica la suya absorción en l'Abizanda en 1857.[4]
Cheografía
[editar | modificar o codigo]Lamata se troba en una planeta, que cheolochicament corresponde con una terraza fluvial, en a ribera dreita d'a valle d'o río Susía, en a subcomarca sobrarbenca que se conoix como Viello Sobrarbe.
Se i arriba por una pista asfaltada que naix en a carretera autonomica A-138, a bels 150 m d'antes de o Mesón de Ligüerre (tot circulando en sentiu Balbastro→l'Aínsa). A pista, que esnaviesa por o lugar en tornando-se a sola carrera que Lamata tiene, conduce dimpués ta o Elsón y Chabierre, Mondot y, en ixe sentiu, se'n va a morir ta la carretera local A-2205 (Alquezra-Guaso, por Lecina, Barcabo y l'Arcusa) en o corazón de o Viello Sobrarbe. Bel par de callizos confluyen en a carrera principal dende propiedaz privadas.
Estructura urbana
[editar | modificar o codigo]O nuclio urbano careix de a estructura condensada de belaltras poblacions, y as diferents casas se troban distanciadas bels metros as unas d'as atras, arredol de a sola carrera que recorre a población, y que, en realidat, ye a carretereta que puya ta o Elsón y Mondot.
Lamata destaca por o numer de casas nobles que i ha, con cualques edificios de grans dimensions, y con elementos arquitectonicos que cal destacar, como as finestras de piedra picada que i ha en casa Arasanz, u os puzos d'augua que cuasi todas as casas tienen.
Pareix que o numer de casas de Lamata ha bailau, en os zaguers cincocientos anyos, d'entre os 6 fuegos con que o contón en o fogache de 1488 y as diez casas que i ha en l'actualidat, en pasando por as doce que teneba en 1626, cuan que cualques d'os infanzons que i veviban asistión a las Corz de Balbastro.
A ilesia ye consagrada a Sant Icisclo y Santa Victoria de Cordoba[5] y ye una construcción d'o sieglo XVI.[3] En a placeta que queda adebant de a ilesia, d'entre ixa, casa Cosculluela y una grancha adhibida por dezaga d'ista zaguera, i ha o crucero de Lamata, que ye declarau Bien d'Intrés Cultural (codigo SIPCA 1-INM-HUE-003-002-052).
Historia
[editar | modificar o codigo]A historia de Lamata se conoix, mas que mas, por a divulgación que n'ha feito o suyo vecín Jesús Cardiel Lalueza, responsable d'o Museu Paleontolochico de Sobrarbe y autor d'un blog y numbrosos articlos sobre historia y chenealochía en cualques publicacions de a comarca.
Teneba un castiello, anque en l'actualidat no se'n ha guardau restas, porque se'n sabe que Remiro lo Monche les ne cedió a os canonches de a seu de Uesca en 1137.[3] En l'anyo 1290, o rei Alifonso lo Franco dio Lamata en sinyoría a un noble, de nombre Sancho d'Antillón.[3]
En 1626, cualques vecins, infanzons, de Lamata fuen ta las Corz de Balbastro. Si bien diz que Lamata no ye o lugar que mas infanzons alportó a ixas corz, sí que pareix que d'entre os lugars d'a on que en i fué yera o que mas en teneba en proporción, pos en i fuen cuatorce[6] d'un total de doce casas.
Demografía
[editar | modificar o codigo]
| ||||||||||||||||||
| ||||||||||||||||||
| ||||||||||||||||||
| ||||||||||||||||||
| 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE. | ||||||||||||||||||
Imáchens
[editar | modificar o codigo]-
O crucero de Lamata (BIC). -
Cualques casas de Lamata destacan por a suya mida y por o pasau nobiliario. -
Casa Buil de Lamata -
O Museu Paleontolochico de Sobrarbe, en Lamata. -
Finestra de casa Arasanz, con inscripción de 1793. -
Casa Arasanz -
Detalle d'a fuent de a plaza, adebant de casa Arasanz
Fiestas
[editar | modificar o codigo]
- 29 d'abril, romería ta la cruz de San Pero,[7] fendo-le honras a Sant Per Mártir.
- 28 d'agosto, Fiesta Mayor fendo-le honras a Sant Agostín.[7]
- 4 d'octubre, fiesta menor fendo-le honras a la Virchen de o Rosario.[7]
- 4 d'aviento, romería ta la cruz de Santa Barbara, fendo-le honras a ixa santa.
Toponimia
[editar | modificar o codigo]Pareix que o toponimo no s'ha documentau nunca como «a Mata», con a primer silaba emplegada como articlo.[1] De forma bien significativa, en o marco de l'estudio que Chabier Tomás fizo sobre a parla d'o Viello Sobrarbe en a segunda metat d'os anyos 90, os habitants de Lamata refusaban de plano, debant de a pregunta explicita,[1] que nunca se l'hise dito «A Mata» ni en a localidat ni en a resta de nuclios d'a redolada.
En o estudio de Ch. Tomás se menciona, tamién, a unanimidat d'os naturals de Lamata en dicindo que o nombre de lugar no ye garra forma lexicalizada d'un substantivo con articlo, y que se refusa as formas d'escribir-lo «a Mata» y «la Mata» (a segunda, por estar conforme con o castellano, anque amaneix a sobén en publicacions y en toponimias no oficials, estaría erronia tamién).
Por contra, pareix que a palabra dimana de o latín <*LANDA,[1] que significa «lanya» u «puesto con praus», y como «Lamata» se troba en toz os documentos a on que se menciona a'l nuclio, dende os primers que datan d'o sieglo XII, dica l'actualidat. En iste sentiu, M. Benito Moliner tamién apuntaba a la necesidat d'escribir-lo en chunto, anque él atorgaba la suya etimolochía a la radiz prerromana <*MATTA,[8] que gosa significar «selva» u «matical».
Referencias
[editar | modificar o codigo]- ↑ 1,0 1,1 1,2 1,3 (es) TOMÁS ARIAS, Chabier. El aragonés de Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
- ↑ (es) «Lamata» en a subpachina «Relación de unidades poblacionales» d'o Insituto Nacional de Estadística; consultada o 23 de chunio de 2011.
- ↑ 3,0 3,1 3,2 3,3 (es) «Lamata» en a web de l'achuntamiento de l'Abizanda; consultada o 24 de chunio de 2011.
- ↑ (es) «Escanilla» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 24 de chunio de 2011.
- ↑ (es) Parroquias de l'arcipestrau de Semontano y Sobrarbe, en a pachina d'a Diocesi de Uesca; consultada o 26 de chunio de 2011.
- ↑ (es) Dentrada «Infanzones de Lamata en el año 1626», en Casas e Infanzones de Sobrarbe; consultada o 24 de chunio de 2011.
- ↑ 7,0 7,1 7,2 (es) «Calendario festivo» en a pachina oficial d'a Comarca de Sobrarbe; consultada o 23 de chunio de 2011.
- ↑ (es) Índice de pueblos del Alto Aragón, el orígen de sus nombres. Por Manuel Benito Moliner. Consultau o 24 de chunio de 2011.
Vinclos externos
[editar | modificar o codigo]
| Lugars d'o municipio de l'Abizanda | |
|---|---|
| L'Abizanda | Escaniella | Lamata | Ligüerre d'a Cinca | Mesón de Ligüerre |
