Orient Meyo
![](https://upload.wikimedia.org/wikipedia/commons/thumb/e/ee/Map_world_middle_east.svg/550px-Map_world_middle_east.svg.png)
L'Orient Meyo (arabe: الشرق الأوسط, hebreu: המזרח התיכון) sinyala una rechión d'Asia dende Siria dica la muga entre Irán y Afganistán, pasando por a peninsula Arabica.
Sindembargo, as mugas d'a rechión no son clarament definidas y a vegatas se diz Orient Proximo a la parti d'a rechión mas amanada a la mar Mediterrania.
Cheneralment o termin fa referencia a lo conchunto formato por os siguients países:
- Arabia Saudita.
- Bahrein.
- Chordania.
- Echipto.
- Emiratos Arabes Unius.
- Irán.
- Iraq.
- Israel.
- Kuwait.
- Liban.
- Omán.
- Qatar.
- Siria.
- Yemen.
- asinas como a los territorios de Cischordania y a Francha de Gaza.
Os países d'o Maghreb (Alcheria, Libia, Marruecos y Tunicia) son a ormino enrastraus a lo Meyo Orient debito a la cerenya relación cultural y historica d'istos países con a rechión. Atros países como Sudán, Mauritania y Somalia tamién tienen relación con ista rechión. Turquía y Chipre, aunque cheograficament son amán d'ista rechión, se consideran parti d'Europa. A l'este, Afganistán ye a vegatas relacionau con o Meyo Orient.