(Translated by https://www.hiragana.jp/)
بيتكوين - ويكيپيديا انتقل إلى المحتوى

بيتكوين

بدل ليانات
من ويكيپيديا
بيتكوين
بيتكوين
معلومات عامة
تاريخ د لبدية 3 يناير 2009
رّمز ₿
تيكر BTC و XBT
بلايص د لبيع ؤ شرا بتفينكس، كراكين، بينانس، هوبي، BitBay، GDAX و KuCoin Exchange
شكون طورو ساطوشي ناكاموطو
طيكنولوجيا إثبات العمل، SHA-256، خوارزمية التوقيع الرقمي منحنى إهليلجي، Schnorr digital signature scheme و secp256k1
تّرخيص رخصة إم آي تي
أعلا قيمة 67778 دولار ميريكاني
مشاريع مبازية عليه لايتكوين، پيركوين، بيتكوين كاش، بيكوين ڭولد و Bitcoin Private
لموقع رّسمي https://bitcoin.org/



لبيتكوين (ب نݣليزية Bitcoin، رّمز ديالو ₿، تّيكر ديالو BTC ؤلا XBT) ؤ كتنطق ب"لبِيتْكُويْن" ؤ ماشي "لبِتْكْوِينْ". ؤ هيّا كريپطوعوملة لامركزية مبنية علا سوفتوير ب مصدر محلول، تختارعات ف 2008.[1] لّي ختارع لبيتكوين مامعروفش ؤ سمّا راسو ساطوشي ناكاموطو (يقدر يكون واحد ؤلا بزاف د نّاس). تّخدام ديال بيتكوين بدا ف 2009، و من ديك لوقت بداو تيخدّموها بزّاف د نّاس ؤ طلعات لقيمة ديالها. أعلا قيمة وصل ليها بيتكوين ل حد سّاعة هيّا 67,778 دولار ميريكاني، ف 9 نونبر 2021.[2]

لبيتكوين ماتاتحتاجش وسيط ف لخدمة ديالها ؤ ماعندهاش شي بنكة مركزية تاتحكم فيها. تاتخدم نيشان ما بين نّاس ؤ كولشي لمعاملات لّي كيدوزو فيها كيتقيدو ف واحد لكناش موزّع سميتو بلوكتشيين. طّريقة باش تاتخدم لبيتكوين تيخليها فيها لأمان و ماعمرو ما وقع بلي بزطام ديال لبيتكوين تّختارق ؤلا تقرصن (حيت لبيتكوين فيها نضام ديال لإجماع تيخلّي صعيب بزاف تتقرصن). هادشي ماكيمنعش أن لبيتكوين يقدر يتّشفر يلا قد شي حد يهاكي شركة ديال تبادل لكريپطوعملات، ؤ كان ديجا وقع ل شركة إم تي ݣوكس ف 2014.[3][4]

تّاريخ

[بدل | بدل لكود]
تّطور د لقيمة د لبيتكوين معا لوقت

لمصاوبة (2008 تال 2011)

[بدل | بدل لكود]

قبل مايبان بيتكوين، كانو ديجا أفكار ؤ قتيراحات غاديين ف نفس لتيجاه ديال لكريپطوصولديات، بحال لپروطوكول د إيكاش، لّي ختارعو ديڤيد تشاوم ؤ ستيفان براندز ف 1983، لّي عكس لبيتكوين كان كيحتاج ل سلطة مركزية (بحال بانكة) باش تجيري سّيستيم.[5] ف سّنوات لّي موراها بانو أفكار عندها علاقة معا لمفهوم د لپروڤ د لخدمة، ؤ لفوايد ديالو، متلا ف لحد من سپام ف لإيميلات. هاد لمفهوم كيلعب دور لوّلي (رئيسي) ف طّيكنولوجيا د لبيتكوين.

من بين أول قتيرحات ديال كريپطوصولدي كانو ديال لمهندس شّينوي ويي داي ف 1998،[6] ؤ ديال لأنفورماتيسيان لميريكاني نيك صابو، لّي ختارع لبيت ݣولد ف 2005. هاد لبيت ݣولد وخا داكشي ماكانش مأمن مزيان ضد لهجمات من نوع سيبيل.[5]

ف 18 غشت 2008، تسجّل ضّومين ديال bitcoin.org. ؤ ف 31 أكتوبر من نفس لعام، واحد لورقة علمية تنشرات ف ليستة د لمييلاج ديال لكريپطوݣرافيا، ب عنوان Bitcoin: A Peer-to-Peer Electronic Cash System (بيتكوين: سيستيم إلكتروني د لفلوس مبني علا لپيرتوپير)، مسنية ب سمية ساطوشي ناكاموطو.[7] ناكاموطو لونصا بيتكوين علا شكل سوفتوير ب مصدر محلول ف يناير 2009، ؤ بقا كيتبادل ميساجات ب لپسودو ديالو مرة مرة حتال 2011 ؤ موراها غبر. لهوية ديالو ل حد سّاعة مامعروفاش. شّركة د كوينبيز ديال لكريپطوعملات، علنات ف واحد رّاپور ف فبراير 2021 بلي يلا تعرفات لهوية د ناكاموطو غادي يأتر هادشي ب شكل سلبي علا لقيمة د بيتكوين.[7]

ف 3 يناير 2009، ناكاموطو ماينا أول بلوك ديال لبلوكتشين د لبيتكوين، لّي كيتسما لبلوك لأصلي ؤلا لبلوك زيرو. ف لكوينبيز ديال هاد لبلوك كانت هاد لجملة مكودية ب نضام سطّاشي The Times 03/Jan/2009 Chancellor on brink of second bailout for banks (جورنال ذ تايمز 03 يناير 2009، لمستشار علاين يعتق لبانكات من لأزمة ل لمرة تانية). هاد لجملة كتحيل ل لعنوان ديال أرتيكل د جورنال ذ تايمز، ؤ تعتابرات كا توقات (تحديد د لوقت) ؤ كومونطير علا لأزمة لقتيصادية ب سباب لبانكات.[8]

أول طرونصفير ديال لبيتكوين دّار ف 12 يناير 2009، ما بين ناكاموطو ؤ لأنفورماتيسيان هارولد فيني، لّي كان طوّر تقنية ديال لپروڤ د لخدمة لمعاودية ف 2004. ناكاموطو كان سيفط 10 بيتكوين ل فيني. هارولد فيني ؤ ناكاموطو تبادلو إيميلات، ؤ ناكاموطو زاد طوّر لپروطوكول ديال لبيتكوين علا حساب لفيدباك لّي كان كيعطيه فيني.[9] أول طروصفير ب غرض تيجاري دّار ف 22 ماي 2010، ملي لپروݣرامور لاصلو هينيتش شرا جوج پيتزات ب 10000 بيتكوين.[10]

لمحلّلين د لبلوكتشيين قدّرو بلي ناكاموطو غادي يكون ماينا مليون بيتكوين قبل ما يغبر ف مرة.[11] قبل من داكشي ناكاموطو عطا لاكصي ل لكود ديال بيتكوين ل ݣاڤين أندرسون. أندرسون غادي يولّي رئيس ديال لمبرمجين ف لمؤسسة د لبيتكوين. أندرسون غادي يحاول يديصونطراليزي لپروجي بحيت عطا أكصي ل پروجي ل 4 د دّيڤلوپورات خرين، مي هادشي غادي يخلق صراع ؤ شك علا لمستقبل ديال لبيتكوين، مقابل كون بقا ناكاموطو هوّا سّلطة لمركزية ف داكشي لّي متعلق بيه.[12]

دّيزاين

[بدل | بدل لكود]
لبلوك زيرو ديال بيتكوين، لي هوّا أول بلوك ف لبلوكتشيين ديالو لي تماينا ؤ تّطلق ب شكل عومومي

تّعدين

[بدل | بدل لكود]

لعدد د لبيتكوينات كيتزاد بشكل تدريجي ب واحد لپروصي كيتسما تّعدين Mining. هاد لپروصي كيخدمو فيه أفراد ؤلا شركات عندهوم سيرڤيرات قوية كدّير عمليات حسابية باش كتحل واحد لمسألة. فاش كتحلها، كتاخد واحد لمقدار ديال لبيتكوين كا مكافأة (هاد لبيتكوينات كيتصاوبو من والو، ماشي شي واحد كيعطيهم، بحال كيفما لبانكة تقدر تصايب فلوس من والو فاش كيدير بنادم ؤلا شركة شي سلف). هاد لمقدار كيتقسم علا جوج كولا 4 سنين تقريبا، مي لقيمة ديال لمكافأة كتزاد حيت لقيمة ديال بيتكوين غادية ؤ كتزاد بشكل كبر. أقصى عدد ممكن ديال لبيتكوينات هوّا 21 مليون، ؤ غادي نوصلو ليه ف عام 2140 علا أقصى تقدير.

لخصوصية

[بدل | بدل لكود]

وحدة من لخاصيّات ديال بيتكوين هيّا بلي كيحافض ب شكل عام علا لخصوصية ديال لأفراد لّي كيستعملوه، بحيت مبدئيا يقدر بنادم يتبادل لفلوس ف رّيزو د لبلوكتشيين د بيتكوين، بلا ما تّفرش لهوية ديالو. وخا داكشي كاينين نتيقادات علا بيتكوين من هاد نّاحية، متلا من طرف إدوارد سنودن لّي ݣال بلي دّيڤلوپورات لّي كيطورو بيتكوين ماعطاوش ل لخصوصية أهمية كافية.[13]

لبيتكوين كا سوفتوير

[بدل | بدل لكود]

لبيتكوين كور، لّي هوّا سّوفتوير علاياش مبني سّيستيم د لبيتكوين، مكتوب ف أغلبية د لكود ديالو ب لّونݣاج سي++، ؤ تحط ف أنترنيت ف يناير 2009 ب مصدر محلول، ب ترخيص د إم آي تي.[14] هاد سّوفتوير فاش كيطيليشارجيه ؤ كيخدّمو بنادم كيولّي عݣدة ف رّيزو ديال لبلوكتشيين ديال بيتكوين. هاد رّيزو مكوّن من بزاف د لعݣدات كولهوم خدّامين ب هاد سّوفتوير، ؤ كيتبادلو لمعلومات بيناتهم. لبيتكوين كور ف نفس لوقت كيلعب دّور ديال بزطام ديال لبيتكوين، لّي كاتراجع ؤ كاتڤاليدي لخلاص ب بيتكوين. لبيتكوين كور كان ف لّول سميتو بيتكوين، ولاكين تبدّلات ليه سّمية باش مايتخالطش معا سّمية ديال لعوملة ؤ ديال رّيزو.[15] كاينة عندو حتا سمية خرة متداولة هيّا لكليان د ساطوشي Satoshi Client.

تّقبل د لبيتكوين كا عملة

[بدل | بدل لكود]

بزاف ديال نّاس تينتاقدو لبيتكوين حيت فنضرهم هيّا فلوس ماشي مضمونة و لقيمة ديالها تاتبدّل بزاف (حيث ما كاينش شي مركز تيقرّر ف لقيمة ديالها) و تاضّيع تّريسينتي بزّاف ف لخدمة ديالها. ولاكين كاينين بانكات ؤ شركات بداو ديجا كيقبلو تّعامل ب لبيتكوين ؤ كريپطوعملات خرين، بحال پايپال لّي علنات ف أكتوبر 2020 بلّي غادي تعطي لإمكانية ل لكليانات ديالها باش يبيعو ؤ يشريو بيتكوين.[16] ف لمقابل، أندرو بييْلي، لمدير ديال لبانكة د نّݣليز حدّر من تّطايريت ديال لبيتكوين، ؤ عتابر بلي كتسبب ليه مخاوف.[16]

علا حساب راپّور صدراتو لبانكة د سنغافورة ف يناير 2021، لبيتكويْن ؤ لكريپطوعملات بشكل عام، يقدرو يرومپلاصيو دّهب كا ستيتمار بْعيد لأمد، يلا قدرو يتغلبو علا مجموعة د لمشاكيل بحال تّطايريت، لْقْبول من طرف لمؤسسات، ؤ رّيسك لمرتابط ب سّمعة (ب عتيبارهم كيتستعملو ل غراض ماشي تال لهيه بحال تبييض لفلوس ؤ نواع خرين د لإجرام).[17]

ف 4 ماي 2021، دخلو لكريپطوعملات ب شكل رسمي ل وولستريت، فاش تزاد أنديكس خاص ديالهم ف لمؤشر ديال داو دجونز. هاد لانديكس فيه جّوج عملات لكبار لّي هوما بيتكوين ؤ إيثيريوم. كريپطوعملات خرين باقيين غادي يتزادو من بعد هاد لعام.[18]

ف 5 ماي 2021، تّعلن بلّي لبيتكوين، ؤ كريپطوعملات خرين، غادي يوليو متوفرين ف خلال نفس لعام كا عملات يقدرو لكليانات ديال مياوات د لبانكات لميريكانية يشريوهم. لبانكات د لميريكان خداو هاد لقرار بعدما شافو عدد كبير د لكليانات ديالهم كيدوزو لفلوس لسيتات د تّبادل بحال كوينبييز ؤ كراكن.[19]

لوضعية لقانونية

[بدل | بدل لكود]

ف لمغريب

[بدل | بدل لكود]

لبيتكوين ممنوع ف لمغريب من نونبر 2017 حيت "تقدر تأتر سلبيا على لقتيصاد د لبلاد" ب سباب تّطاريت ديالها لي كاتخلي تّامان ديالها يتبدل بزاف. تّعامل ب لبيتكوين يقدر يعرّض شّخص ل عقوبات تقدر توصل ل لحبس ؤ غرامات.[20] وخا داكشي لمغريب تكلاصا ف سّيت د تّعاملات د لكريپطو لوكل بيتكوينز Local Bitcoins تّالت ف شمال إفريقيا ؤ شّرق لأوسط، ؤ 36 ف لعالام ف تّعامل ب لبيتكوين ف 2018.[21] ل حد سّاعة ف 2021 كاينين تقريبا 900،000 مغريبي كيمتالكو بيتكوين، شي لي كيمتل تقريبا 2،4% د سّكان د لمغريب، ب قيمة إجمالية ديال 6 د لمليون د دّولار، شّي لي كيجعلو لّول ف شمال إفريقيا ؤ رّابع ف إفريقيا، مورا نيجيريا، جنوب إفريقيا ؤ كينيا.[22]

ف شينوا

[بدل | بدل لكود]

شّينوا منعات لكريپطوصولديات، بما فيها بيتكوين، من 2019، ولاكين عمليا بقاو شّناوا كيتعاملو بيهوم ؤ كيعدّنو فيهوم.[23] ف 19 ماي 2021، شّينوا منعات لبانكات ؤ لمؤسسات لمالية شّينوية باش تدير تّعامل ؤلا لبيع ؤ شّرا ديال لكريپطوعوملات، شّي لّي أدى ل طّيحة ديال تّمن ديال بزاف منهوم، بما فيهوم بيتكوين لّي نزل ل قل من 40000 دولار ميريكاني. شّينوا كانت ديجا سنوات ؤهيّا كتحاول تحد من لستيعمال ؤ تّعامل ب لكريپطو. هاد لقرار وخا داكشي ماكيمنعش لأفراد يديرو بزطام ديال كريپطوعوملة، ؤ يتبادلو بيناتهم علا أساس فردي.[24] ف 24 شتنبر 2021، جا قرار د لمنع لكامل د لكريپطو ؤ تّعامل بيها حتا علا لأفراد، ؤ لي بقا مستامر ف هاد "لأنشطة لفينونسية لممنوعة" كايتّعتابر بلي كيمارس جريمة ؤ غادي تّم لمتابعة ديالو قضائيا.[23]

ف روسيا

[بدل | بدل لكود]

روسيا مانعة تّاعامول ب لبيتكوين ؤ لكريپطوصولديات ف دّاخل، ولاكين مسموح تّعدين ديالو ؤ تّعامول بيه معا جيهات برا د روسيا. بسباب لعوقوبات لقتيصادية لي فرضاتها لميريكان عليها، لمسؤولين رّوس كيفكرو باش يحولو بعض تّعامولات ديالهوم، سيرتو ف لمجال د طّاقة، ل صولديات خرين بحال لبيتكوين، باش ينقصو لعتيماد ديالهوم علا دّولار.[25]

ف بلدان خرين

[بدل | بدل لكود]

كاينين بلدان خرين مانعين لبيتكوين، و خرين معتارفين بيه و تاتخلي ناس يخدّموه بحال لميريكان و لبلدان د لإتحاد لأوروپي.[26]

ف يونيو 2021، لجمعية التشريعية د صالڤادور دوزات قانون لي رد لبيتكوين عوملة قانونية ف لبلاد.[27] هاد لقانون بدا يتطبق من 7 شتنبر 2021.[28]

عيون لكلام

[بدل | بدل لكود]
  1. ^ "عملة «بيتكوين» المُشَفَّرة تلهب حماس المستثمرين وتتجاوز مستويات قياسية - القدس العربي (2021)". مأرشيڤي من لأصل ف 2022-08-15. تطّالع عليه ب تاريخ 2021-02-23.
  2. ^ "Bitcoin, ether hit record high, other cryptos also surge" (ب نڭليزية). 9 نونبر 2021. مأرشيڤي من لأصل ف 2022-06-29. تطّالع عليه ب تاريخ 2021-11-09.
  3. ^ "Can All Of Bitcoin Be Hacked" (ب نڭليزية). 16 فبراير 2020. مأرشيڤي من لأصل ف 2022-12-31. تطّالع عليه ب تاريخ 2021-04-27.
  4. ^ "Bitcoin surges to new high near $65,000 as all eyes turn to Coinbase direct listing" (ب نڭليزية). 14 أبريل 2021. مأرشيڤي من لأصل ف 2022-12-17. تطّالع عليه ب تاريخ 2021-04-26.
  5. ^ a b "Bitcoin and Beyond: A Technical Survey on Decentralized Digital Currencies" (PDF) (ب نڭليزية). مأرشيڤي (PDF) من لأصل ف 2023-05-29. تطّالع عليه ب تاريخ 2021-04-26.
  6. ^ "bmoney, Wei Dai" (ب نڭليزية). مأرشيڤي من لأصل ف 2023-10-10. تطّالع عليه ب تاريخ 2021-04-26.
  7. ^ a b "The many alleged identities of Bitcoin's mysterious creator, Satoshi Nakamoto" (ب نڭليزية). 26 فبراير 2021. مأرشيڤي من لأصل ف 2023-03-15. تطّالع عليه ب تاريخ 2021-04-26.
  8. ^ "لبلوك زيرو ديال بيتكوين". مأرشيڤي من لأصل ف 30 يناير 2013.
  9. ^ "Hal Finney received the first Bitcoin transaction. Here's how he describes it" (ب نڭليزية). 3 يناير 2014. مأرشيڤي من لأصل ف 2023-05-25. تطّالع عليه ب تاريخ 2021-04-30.
  10. ^ "10 Years After Laszlo Hanyecz Bought Pizza With 10K Bitcoin, He Has No Regrets" (ب نڭليزية). 22 ماي 2020. مأرشيڤي من لأصل ف 2021-08-24. تطّالع عليه ب تاريخ 2021-04-30.
  11. ^ "Bitcoin's value just passed $1 trillion" (ب نڭليزية). 19 فبراير 2021. مأرشيڤي من لأصل ف 2023-06-11. تطّالع عليه ب تاريخ 2021-04-30.
  12. ^ "A Solution To Bitcoin's Governance Problem" (ب نڭليزية). 21 شتنبر 2015. مأرشيڤي من لأصل ف 2023-06-13. تطّالع عليه ب تاريخ 2021-05-05.
  13. ^ "Bitcoin Privacy Feud Erupts After Edward Snowden Pans Long-Awaited Taproot Upgrade" (ب نڭليزية). 11 ماي 2021. مأرشيڤي من لأصل ف 2023-07-05. تطّالع عليه ب تاريخ 2021-05-20.
  14. ^ "لبيتكوين كور ف ݣيتهاب". ݣيتهاب. مأرشيڤي من لأصل ف 2023-07-26. تطّالع عليه ب تاريخ 2021-04-27.
  15. ^ "Bitcoin Core version 0.9.0 released" (ب نڭليزية). 19 مارس 2014. مأرشيڤي من لأصل ف 2023-05-28. تطّالع عليه ب تاريخ 2021-05-19.
  16. ^ a b "Guide: What is Bitcoin and how does it work" (ب نڭليزية). 5 فبراير 2021. مأرشيڤي من لأصل ف 2023-04-07. تطّالع عليه ب تاريخ 2021-04-26.
  17. ^ "Bank of Singapore Says Crypto Could Replace Gold as Store of Value". كوينديسك (ب نڭليزية). 25 يناير 2021. مأرشيڤي من لأصل ف 2021-10-19. تطّالع عليه ب تاريخ 2021-04-19.
  18. ^ "S&P Dow Jones brings bitcoin, ethereum to Wall St with cryptocurrency indexes". رويترز (ب نڭليزية). 4 ماي 2021. مأرشيڤي من لأصل ف 2023-01-23. تطّالع عليه ب تاريخ 2021-05-06.
  19. ^ "Bitcoin will soon be available through hundreds of US banks" (ب نڭليزية). 5 ماي 2021. مأرشيڤي من لأصل ف 2021-06-25. تطّالع عليه ب تاريخ 2021-05-06.
  20. ^ "المغرب يجرم التعامل ب "البيتكوين" خشية على اقتصاده وعملته - وكالة لأناضول (2017)". مأرشيڤي من لأصل ف 2022-08-13. تطّالع عليه ب تاريخ 2021-02-23.
  21. ^ "المغرب يحتل مرتبة متقدمة بين الدول المتعاملة بـ"البيتكوين"" (ب لعربية). 5 شتنبر 2018. مأرشيڤي من لأصل ف 5 شتنبر 2021. تطّالع عليه ب تاريخ 5 شتنبر 2021.
  22. ^ "Cryptocurrency information about Morocco [معلومات د لكريپطوصولدي علا لمغريب]" (ب نڭليزية). مأرشيڤي من لأصل ف 2022-11-29. تطّالع عليه ب تاريخ 2021-09-05.
  23. ^ a b "China declares all crypto-currency transactions illegal" (ب نڭليزية). 24 شتنبر 2021. مأرشيڤي من لأصل ف 2023-10-01. تطّالع عليه ب تاريخ 2021-09-24.
  24. ^ "China bans financial, payment institutions from cryptocurrency business" (ب نڭليزية). 19 ماي 2021. مأرشيڤي من لأصل ف 2023-10-12. تطّالع عليه ب تاريخ 2021-05-20.
  25. ^ "Putin suggests openness to moving energy trade to crypto from dollar in the future" (ب نڭليزية). 14 أكتوبر 2021. مأرشيڤي من لأصل ف 2022-05-22. تطّالع عليه ب تاريخ 2021-10-23.
  26. ^ "ما هي الدول التي تحظر التعامل بعملة بتكوين؟ - العربي الجديد (2017)". مأرشيڤي من لأصل ف 2022-12-22. تطّالع عليه ب تاريخ 2021-02-23.
  27. ^ Ostroff، Caitlin (2021-06-09). "El Salvador Becomes First Country to Approve Bitcoin as Legal Tender". Wall Street Journal (ب نڭليزية). مأرشيڤي من لأصل ف 2023-09-26. تطّالع عليه ب تاريخ 2021-06-09.
  28. ^ Renteria، Nelson (25 يونيو 2021). "Bitcoin to become legal tender in El Salvador on Sept 7". Reuters. مأرشيڤي من لأصل ف 2023-01-27. تطّالع عليه ب تاريخ 25 يونيو 2021.
Wikimedia Commons تقدر تزيد شوف بزاف د تّصاور و لمعلومات ديال Bitcoin ف ويكيميديا كومنز.

لمزاود

[بدل | بدل لكود]
مرجّعة من "https://ary.wikipedia.org/w/index.php?title=بيتكوين&oldid=349796"