Catálogu Hipparcos

Los catálogos Hipparcos y Tycho (Tycho-1) son los productos primarios de la misión astrométrica Hipparcos de l'Axencia Espacial Europea (ESA). El satélite, que funcionó mientres cuasi cuatro años, llogró datos científicos d'alta calidá dende payares de 1989 a marzu de 1993. El catálogu Hipparcos, publicáu en 1997, tien 118.218 estrelles con un nivel astrométricu de 1 a 3 miliarcosegundos, mientres que'l catálogu Tycho tien daqué más de 1.050.000 estrelles. El primeru d'ellos ta completu hasta la magnitú +7,3.

Los catálogos contienen una gran cantidá de datos astrométricos y fotométricos de bien alta calidá. Amás lleven asociaos anexos qu'ufierten datos de variabilidá y d'estrelles dobles y múltiples, según midíes astrométriques y fotométriques del sistema solar. Les partes principales úfrense tanto en forma imprentada como en forma lleible por máquina.

La xera d'analís de los datos globales, procedentes de cerca de 125 Gigabytes de datos en crudo del satélite, foi un procesu llargu y complexu entamáu polos consorcios NDAC y FAST (en xunto responsables de la ellaboración del Catálogu Hipparcos) y el consorciu TDAC, responsable de la ellaboración del catálogu Tycho. Un cuartu consorciu científicu, el consorciu INCA, foi responsable de la construcción del programa d'observación del Hipparcos, compilando los meyores datos de les estrelles esbillaes antes d'incorporalos nel catálogu d'entrada de Hipparcos. La ellaboración de los catálogos Hipparcos y Tycho marca'l final formal de la participación de la misión de l'Axencia Espacial Europea colos cuatro consorcios científicos. Más tarde, el catálogu de datos Tycho foi analizáu de nuevu dando llugar al catálogu Tycho-2, que tien una precisión mayor. Esti últimu incorpora datos vinientes de 2.539.913 estrelles.

Una misión asemeyada a Hipparcos, GAIA, ta programada pa un futuru próximu y va dar llugar a un catálogu más ampliu y precisu.

Ver tamién

• Llista d'estrelles del catálogu Hipparcos
• Catálogu Henry Draper
• Bright Star Catalogue
• Catálogu SAO
• Boss General Catalogue
• Bonner Durchmusterung

Enllaces esternos

• The Hipparcos Space Astrometry Mission

• Datos: Q537199