Buku Amos

Amos ᯀᯔᯘᯬ᯲ 1

1:1 On ma angka hata ni si Amos * sada halak sian angka parmahan sian Tekoa, angka na niidana taringot tu Israel di angka ari ni ** si Usia, raja sian Juda, dohot di angka ari ni * si Jerobeam anak ni si Joas, raja sian Israel, dua taon jumolo ** sian lalo. ᯀᯉᯬ᯲ ᯔ ᯀᯰᯄ᯦ ᯂᯖ ᯉᯪ ᯘᯪ ᯀᯔᯘᯬ᯲ ᯘᯑ ᯂᯞ᯦ᯄ᯦᯲ ᯘᯪᯀᯉ᯲ ᯀᯄ᯦ ᯇᯒ᯲ᯔᯂᯉ᯲ ᯘᯪᯀᯉ᯲ ᯖᯩᯄ᯦ᯬᯀ ᯀᯰᯄ᯦ ᯉ ᯉᯪᯤᯑᯉ ᯖᯒᯪᯝᯖᯬ᯲ ᯖᯮ ᯀᯘᯪ᯲ᯒᯀᯞᯩ᯲ ᯑᯪ ᯀᯰᯄ᯦ ᯀᯒᯪ ᯉᯪ ᯘᯪ ᯥᯘᯪᯀ ᯒᯐ ᯘᯪᯀᯉ᯲ ᯐᯮᯑ ᯑᯬᯂᯖᯬ᯲ ᯑᯪ ᯀᯰᯄ᯦ ᯀᯒᯪ ᯉᯪ ᯘᯪ ᯐᯩᯒᯬᯅᯩᯀᯔ᯲ ᯀᯉᯄ᯦᯲ ᯉᯪ ᯘᯪ ᯐᯬᯀᯘ᯲ ᯒᯐ ᯘᯪᯀᯉ᯲ ᯀᯘᯪ᯲ᯒᯀᯞᯩ᯲ ᯑᯮᯀ ᯖᯀᯉᯬ᯲ ᯐᯮᯔᯬᯞᯬ ᯘᯪᯀᯉ᯲ ᯞᯞᯬ

1:2 Jadi didok ma: * Patungoromon do Jahowa sian Sion, jala dipangiar soarana sian Jerusalem. Jadi malos ma angka jampalan ni angka parmahan, jala hasang punsu ni Karmel.

1:3 Songon on do hata ni Jahowa: Ala ni tolu pangalaosion ni * Damaskus, jala ala ni opat ndang pasurutonku, ala naung * diluntak nasida Gilead marhitehite salosap bosi.

1:4 Alani tongosonku ma api tu bagasan bagas ni si Hasael, gabe suda panganonna angka bagas bolon ni si Benhadad.

1:5 Ponggolhononku dohot ransangransang ni pargumbangan ni Damaskus, jala siaphononku jolma pangisi ni rura ajiajian ro di sitiop tungkot harajaon sian huta Harorangan gabe tarbuang bangso Ram tu * Kir, ninna Jahowa.

1:6 Songon on do hata ni Jahowa: Ala ni tolu pangalaosion ni * Gasa, jala ala ni opat ndang pasurutonku, ala dibuangkon nasida hinagok ni angka na tarbuang laho pasahathon tu Edom.

1:7 Dibahen i tongosonku ma api tu bagasan angka parik ni Gasa, gabe suda panganonna angka bagas na bolon.

1:8 Jala siaphononku jolma pangisi ni Asdod, ro di sitiop tungkot harajaon sian Askelon; jala patoltolonku ma tanganku dompak Ekron, gabe mago ma pasipasi ni halak Palistim, ninna Tuhan Jahowa.

1:9 Songon on do hata ni Jahowa: Ala ni tolu pangalaosion ni * Tirus, jala ala ni opat ndang pasurutonku, ala dipasahat nasida hinagok ni angka na tarbuang tu Edom, jala ndang diingot nasida * padan pardongansabutuhaon.

1:10 Dibahen i tongosonku ma api tu bagasan angka parik ni Tirus gabe suda panganonna angka bagas na bolon.

1:11 Songon on do hata ni Jahowa: Ala ni tolu pangalaosion ni * Edom, jala ala ni opat ndang pasurutonku, ala na nilelena anggina * patioptiop podang, jala diojoti angka asina jala tongtong manansani rimasna, jala martaronggop murukna salelenglelengna.

1:12 Dibahen i tongosonku ma api tu bagasan Teman, gabe suda panganonna angka bagas bolon * di Bosra.

1:13 Songon on do hata ni Jahowa: Ala ni tolu pangalaosion ni * halak Amon, jala ala ni opat ndang pasurutonku, ala * dilapa nasida angka na gabegabean di Gilead asa pabidang parbalohannasida.

1:14 Dibahen i pagalahonku ma api di bagasan angka parik ni Rabba, gabe suda panganonna angka bagas na bolon, mardongan suraksurak di ari tongtangan, mardongan habahaba di ari hamamasa ni halisungsung.

1:15 Tarboan dohot rajanasida tu habuangan, ibana rap dohot induk pinabangkitna i, ninna Jahowa.

Amos 2

2:1 Songon on do hata ni Jahowa: Ala ni tolu pangalaosion ni * Moab, jala ala ni opat ndang pasurutonku, ala tinutunganna i angka holiholi ni raja ni Edom bahen hapur.

2:2 Dibahen i tongosonku ma api tu bagasan Moab, gabe suda panganonna angka bagas bolon di Keriot, gabe mate Moab di hagunturon, marsoara toletole, marsoara sarune.

2:3 Jala siaphononku ma panguhum sian tongatongana, jala bunuonku sude indukna rap dohot ibana, ninna Jahowa.

2:4 Songon on do hata ni Jahowa: Ala ni tolu pangalaosion ni Juda, jala ala ni opat ndang pasurutonku ala ditoishon nasida patik ni Jahowa, jala ndang diradoti angka tonana, gabe gabusnasida, angka na niihuthon ni angka ompunasida dope paotootohon nasida.

2:5 Dibahen i tongosonku ma api tu bagasan Juda, gabe suda panganonna angka bagas bolon di Jerusalem.

2:6 Songon on do hata ni Jahowa: Ala ni tolu pangalaosion ni Israel, jala ala ni opat ndang pasurutonku, ala digadishon nasida partigor i tu perak dohot na pogos i * ali ni sipatu sapasang.

2:7 Nasida angka na mangkauashon orbuk ni tano i * ampe tu ulu ni halak na pogos, jala dipailingiling dalan ni halak na dangol; udur anak dohot amana laho tumopot sada parompuan, asa diramuni goarhu na badia.

2:8 Marbustangan nasida di angka * ulos gade di lambung ni saluhut langgatan, jala anggur ni angka na hona dando disobur nasida di bagas ni angka debatanasida.

2:9 Hape ahu nian mamansingkon halak * Amori maradophon nasida, atik pe nasa timbo ni hau ares timbona, jala songon hau hariara bolonna; ahu mamansingkon parbuena sian ginjang, jala uratna sian toru.

2:10 Jala ahu nian manogihon hamu ruar sian tano Misir, jala huiringiring hamu, di halongonan opatpulu taon lelengna laho manean tano ni halak Amori.

2:11 Jala ahu pabangkithon sian angka anakmuna bahen panurirang, jala sian dolidolimuna bahen halak * na pinapulik. Atehe, nda tongon do, hamu ale angka anak ni Israel! ninna Jahowa.

2:12 Hape dipainumhon hamu do anggur tu halak na pinapulik, jala ditonahon hamu tu angka panurirang: * Ndang jadi hamu manurirangi!

2:13 Ida ma ahu ma manipa hamu, songon panipa ni hureta, na gok tibalan.

2:14 Jadi * ndang marguna hapoporus ni halak na bontis, jala ndang targogohon halak na gogo gogona i, jala ndang tarpalua ulubalang hosana.

2:15 Halak sisintak sior pe, ndang manahan jongjong, jala halak na bontis mardalan ndang malua, halak parsihundul di hoda pe, ndang tarpaluasa hosana.

2:16 Jala halak na todos roha sian angka ulubalang, marsaemara ibana maporus di ari na sasada i, ninna Jahowa.

Amos 3

3:1 Tangihon hamu ma hata on, na nidok ni Jahowa taringot tu hamu halak Israel, taringot tu sandok bangso, na hutogihon ruar sian tano Misir, songon on do:

3:2 Holan hamu do nian na hutanda sian * nasa bangso di tano on; dibahen i luluhononku ma tu hamu saluhut hajahatonmuna i.

3:3 Tung udur ma tagamon mardalan dua halak, nda jolo sian dos ni rohanasida?

3:4 Tung tagamon ma patungoromon babiat di tombak nda adong soroonna? Tung tagamon pangiaron ni anak ni babiat ma soarana sian liangna, nda adong na jumpangsa?

3:5 Tung tagamon ma tarjail pidong tu jorgong di tano, molo so jolo ditaon sambil? Tung tagamon ma bingkas jorgong i sian tano, nda adong dapotsa?

3:6 Tung tagamon ma mangkuling sarune di bagasan huta, so biahaton situan na torop? Tung adong ma tagamon * masa parmaraan di bagasan huta, so binahen ni Jahowa?

3:7 Ai ndang adong dibahen Tuhan Jahowa nanggo sada, nda jolo dipapatar sibunianna tu panurirang, angka naposona i.

3:8 Patungoromon babiat, tung ise ma na so mabiar? Mangkuling Tuhan Jahowa, tung ise ma na so manurirang?

3:9 Patubegehon hamu ma i tu angka bagas bolon di Asdod dohot tu angka bagas bolon di tano Misir, jala dok hamu ma: Marluhut ma hamu tu ginjang ni angka dolok Samaria, asa tung diida hamu angka halumlamon godang di tongatongana dohot angka pangarupaon di bagasan.

3:10 Ndang diboto nasida be mambahen uhum na tingkos, ninna Jahowa; nasida angka na pagukguk hajahaton dohot hadoboon di bagasnasida angka na bolon i.

3:11 Dibahen i songon on do didok Tuhan Jahowa: Musu humaliang tano on; jala paijuronna sian ho hagogoonmi jala pupusonna bagasmu angka na bolon i.

3:12 Songon on do hata ni Jahowa: Suang songon pangarampas ni parmahan sian baba ni babiat dua haehae, manang parsibongan ni pinggol sada, laos songon i do halulua ni halak Israel sogot, angka na hundul di Samaria, di suhi ni lage dohot di surta tutup ni podoman.

3:13 Tangihon jala hatindangkon hamu ma i di bagasan jabu ni si Jakkob, ninna Tuhan Jahowa Debata Zebaot.

3:14 Di ari uju marlulu ahu dompak angka pangalaosion ni Israel, marlulu ma ahu dohot dompak angka * langgatan ni Betel, jadi maponggol ma * angka tanduk ni langgatan i, jala angka dabu tu tano.

3:15 Rap lohaonku ma * bagas undungundung dohot bagas di huta; mago ma dohot * angka bagas gading, jala siap torop angka bagas, ninna Jahowa.

Amos 4

4:1 Tangihon ma hata on, hamu ale lombu sian Basan, angka na di * dolok ni Samaria, angka na mangarupa halak na pogos, jala dipapisatpisat halak na metmet, angka na mandok tu tuannasida: * Boan hamu tuson, asa husobur hami.

4:2 Nunga pola marmangmang Tuhan Jahowa tu habadiaonna, ida ma, ro do angka ari sogot tu hamu, saraton ni halak ma hamu marhitehite haithait, jala pinomparmuna marhitehite hail ni pardengke.

4:3 Jadi ruar ma hamu sian bungbung ni parik, masitondong dalanna di jolona be do, jala timpalhononmuna ma ajiajiani, ninna Jahowa.

4:4 Ro ma hamu tu Betel asa manjahati! Tu * Gilgal, patamba pangalaosion! Jala boan hamu manogotna i peleanmuna dohot saparsampulumuna * ganup patoluarihon.

4:5 Jala tutung hamu pelean hamauliateon sian * na niigaran, jala tingtingkon hamu pelean bagabaga, baritahon hamu! Ai i do lomo ni rohamuna, hamu ale anak ni Israel, ninna Tuhan Jahowa.

4:6 Ahu pe antong, hulehon do tu hamu haiason ni ipon di saluhut hutamuna, jala hararapar di sagusagu di saluhut ingananmuna, alai laos so mulak hamu tu ahu, ninna Jahowa.

4:7 Ahu pe antong, * huontok do sian hamu udan, arga tolu bulan nari dope asa gotilon. Dung i huta nasada hupaudan, huta na sadanari ndang hupaudan; hauma santurpuk dapotan udan, na santurpuk nari, na so tininggang ni udan, marsik do.

4:8 Jadi madoado dua manang tolu huta tu huta na sada naeng minum aek nian, hape ndang sombu. Alai laos so mulak hamu tu ahu, ninna Jahowa.

4:9 Nunga nian * huhonahon tu hamu antingano dohot sirara, jala godangan porlakmuna nunga suda digagat * sihapor ro di porlak anggurmuna, hau antajau dohot hau jetunmuna. Alai laos so mulak hamu tu ahu ninna Jahowa.

4:10 Nunga nian hutongos tu tongatongamuna begu siherut marpangalaho * songon uju di Misir, huragehon angka dolidolimuna marhitehite podang, huhut tarboan hodamuna, jala nunga hupaanggohon angir ni parsaroanmuna tu bagasan igungmuna, laos so mulak hamu tu ahu, ninna Jahowa.

4:11 Nunga tung hupabalik hamu, songon * hababalik ni Sodom dohot Gumora, binahen ni Debata, jadi doshon * sipusipu na tinait sian api do hamu, hape laos so mulak hamu tu ahu, ninna Jahowa.

4:12 Dibahen i, songon i do bahenonku tu ho ale Israel! Antong ala huondam bahenonku songon i tu ho, marhobas ma ho manjumpangkon Debatam, ale Israel!

4:13 Ai ida ma, ibana do Sijadi angka dolok jala sitompa alogo, jala dipabotohon tu jolma manang aha sangkapna; ibana mambahen sibalik hunik gabe haholomon, jala didalani angka * buntulbuntul ni tano on: Jahowa, Debata Zebaot goarna.

Amos 5

5:1 Tangihon hamu ma hata on, asa hubahen sada andung taringot tu hamu, ale pinompar ni Israel!

5:2 Nunga tinggang boru Israel, ndang tarbahensa be hehe nunga bustang tu tanona, ndang adong nanggo sahalak na pahehe ibana.

5:3 Ai songon on do hata ni Tuhan Jahowa: Huta na paborhathon saribu, * tading na ma sian i saratus; jala na paborhat saratus, tading nama sian i sampulu sogot di pinompar ni Israel.

5:4 Ai songon on do hata ni Jahowa tu pinompar ni Israel: * Lulu i hamu ma ahu, asa mangolu hamu!

5:5 Unang tagonan lulu i hamu * Betel, jala unang laho hamu tu Gilgal, jala unang taripar hamu tu Berseba! Ai tarboan tu habuangan sogot ia Gilgal, jala ia Betel gabe sisoada.

5:6 Lulu i hamu ma Jahowa, asa mangolu hamu! Asa unang dirampok bagas ni si Josep, songon api, jala suda dipangan, hape ndang adong pangintopi di Betel nanggo sahalak.

5:7 Hamu angka na pahosing * uhum gabe pogu, jala diluntak hatigoran tu tano!

5:8 Jahowa do * sijadi bintang Poriama dohot bintang Sidongdong jala ibana pahosing linggoman ni hamatean gabe torang ni ari, jala dipaholom ari gabe borngin; ibana do * sijou angka aek ni laut, jala diusehon muse tu sisik ni tano on: Jahowa do Goarna!

5:9 Ibana do parohon hasiapon tu halak na gogo, gabe ro hasiapon tu huta na gonting.

5:10 Dihasomorhon nasida do jolma pamodai di partungkoan, jala marbiasbias nasida mida halak sidok na sintong.

5:11 Dibahen i, ala diluntak hamu halak na pogos, jala dijalo hamu eme silehonlehon manuruk sian ibana, gabe * ndang ingananmuna bagas, angka na pinaulimuna sian batu na nidakdak; disuani hamu pe angka porlak anggur hasoloan, hape ndang inumonmuna anggurna.

5:12 Ai huboto do torop ni pangalaosionmuna dohot hinadeak ni dosamuna, hamu angka na manosak halak partigor, angka na manjalo hasunan manuruk, jala dipatungki halak na pogos di partungkoan.

5:13 Dibahen i laos hohom do halak na marroha, ai tingki na jahat do on.

5:14 Lulu i hamu ma na denggan, unang tagonan na jat i, asa mangolu hamu! Asa tongon Jahowa, Debata Zebaot donganmuna, songon na nidokmuna i.

5:15 * Hagigihon hamu ma na jat i, jala haholongi hamu na denggan, jala hajongjongkon hamu uhum di partungkoan! Anggiat tung marpangulahi roha ni Jahowa Debata Zebaot mida pasipasi ni Josep.

5:16 Dibahen i, songon on do hata ni Jahowa, Debata Zebaot, Tuhan i: Di saluhut angka alaman masa andung, jala di saluhut dalan dohononnasida sogot: Oe, oe! Tole parumauma jouonnasida mandokkon tumatangis, tole angka siboto andung dohononna mangandungi.

5:17 Jala masa do andung di saluhut porlak anggur, molo mamolus ahu sian tongatongamu, ninna Jahowa.

5:18 Marjea ma nasida * angka na mangapian di ari ni Jahowa! Tung aha labamuna sian i? * Haholomon do ari ni Jahowa, ndada hatiuron.

5:19 Hira songon halak na maporus maradophon singa, gabe dijumpangkon babiat ibana; jala dung ro di jabu ibana, gabe mangunsande tanganna tu dorpi hape dipargut ulok ibana.

5:20 Nda haholomon tongon ari ni Jahowa, jala ndada hatiuron hagolapon do, ndang marsinondang?

5:21 * Huhagigihon, biasan ahu mida angka ari rayamuna, jala ndang dihalomohon rohangku angka luhutanmuna.

5:22 Ai nang pe dipelehon hamu tu ahu * angka pelean situtungon dohot pelean sipanganon, ndang lomo rohangku disi, pelean hamauliateon sian pinahanmuna pamuean pe, ndang parduli ahu disi.

5:23 Paholang ma sian ahu hagunturon ni angka endemu, jala ndang lomo roha ni pinggolhu umbege soara ni sordammu.

5:24 Jadi margilinggiling ma songon aek uhumi, jala hatigoran songon sunge na so olo marsik.

5:25 Tung adong ma angka pelean sipotongon dohot sipanganon dipasahat hamu tu ahu di halongonan saleleng siopatpulu taon, * hamu ale pinompar ni Israel?

5:26 Antong usungonmuna ma undungundung ni rajamuna ro di ojahan ni ganaganaanmuna, tole bintang ni debatamuna, angka na binahenmuna di hamu.

5:27 Jadi toguonku ma hamu tarbuang dao salpu sian Damaskus, ninna Jahowa, Debata Zebaot goarna.

Amos 6

6:1 Marjea ma jolma angka na pedem marroha di bagasan Sion dohot jolma angka * na marpangatauan tu dolok Samaria, angka ihutan parjolo ni angka bangso, jala tu nasida do ro angka pinompar ni Israel.

6:2 Taripar ma hamu maningkir tu * Kalne; dung i laho ma hamu sian i tu Hamat, huta na bolon i; dung i laho tuat ma hamu tu * Gat huta ni halak Palistim; tung dumenggan ma nasida sian angka harajaon on, manang tung lumambas parbalohannasida sian parbalohanmuna?

6:3 Hamu ale angka na marsurasurahon * holang dope ari hamagoan i, hape hamu do pajonokkon hundulan ni hadoboon.

6:4 Hamu angka na marpeahan * di atas podoman angka na sian gading, jala marbustangan di atas lagenasida, jala na manganhon angka anak ni birubiru pamuean dohot anak ni lombu na pinamokmok sian tongatonga ni bara.

6:5 Hamu angka na umpiltik hasapi jala na patomutomu ende, songon si Daud mardongan parhinaloan.

6:6 Hamu angka na marsobur anggur sian panginuman, jala na marpangirhon miak angka na humushus, alai ndang dihabothon anggo habobola ni si Josep.

6:7 Dibahen i ingkon nasida ma nuaeng manguluhon angka na tarbuang tu habuangan: Jadi sohot ma ende ni angka pargadombus.

6:8 Nunga pola marmangmang Tuhan Jahowa tu dirina, ninna Jahowa Debata Zebaot: Marbiasbias do ahu mida hajungkaton ni Jakkob, jala huhagigihon bagasna angka na bolon, jadi pasahatonku ma huta i ro di pangisina.

6:9 Tung sura pe tading dope sampulu halak di bagasan sada jabu, marmatean do nasida.

6:10 Jadi ia adong tondongna na mangusung dohot na manambun nasida, laho paruarhon angka holiholi sian jabu, jala didok ma tu nasa halak na di jambur ni bagas i: Atehe, adong dope donganmu dison? Jadi dohononna ma: Nunga buriapus! Jadi dohononna ma: * Sip ma ho, ai ndang be jadi pajoujouon goar ni Jahowa.

6:11 Ai ida ma, Jahowa do na mandokkon jala diropuhi bagas na bolon i, ia bagas na metmet i ditahai do.

6:12 Tung marinjak ma tagamon hoda di atas dolok batu manang tung maninggala disi angka lombu? Ai nunga dipauba hamu * uhum gabe rasun, jala parbue ni hatigoran gabe pogu.

6:13 Hamu angka na mangkalashon na so adong, angka na mandok: * Nda nunga maruli angka tanduk hita marhitehite gogonta?

6:14 Ai ida ma ahu pahehehon dompak hamu, ale pinompar ni Israel, ninna Jahowa, Debata Zebaot, sada bangso laumonna ma hamu, olat ni Hamat sahat ro di sunge ni adaran.

Amos 7

7:1 Songon on do dipataridahon Tuhan Jahowa tu ahu, ida ma jumadihon sihapor ibana, di mulana martumbur duhutduhut ni panabian; jala ida ma sagak do i, dung ma nabi rajai.

7:2 Jadi dung sun siap digagat suansuanan ni tano i, ningku ma: Ale Tuhan Jahowa, sai marpamuati ma roham! Tung beha ma panahan ni Jakkob jongjong ai na metmet do ibana?

7:3 Jadi marpangulahi ma roha ni Jahowa taringot tusi; ndang jadi saut! ninna Jahowa.

7:4 Songon on do dipataridahon Tuhan Jahowa tu ahu, ida ma: Dipio Tuhan Jahowa ma api laho manorui, nunga pola disudahon lung bolon i, disudahon dohot partalian i.

7:5 Jadi ningku ma: Ale Tuhan Jahowa, ua pasadi ma! Tung beha

7:6 Jadi marpangulahi ma roha ni Jahowa taringot tusi; dohot i pe ndang jadi saut! ninna Tuhan Jahowa.

7:7 Songon on muse dipataridahon tu ahu, ida ma: Jongjong do Tuhan i di atas ni sada parik na rahis situtu sinasap, patioptiop * tali rambu na marpungga di bagasan tanganna.

7:8 Dung i ninna Jahowa ma tu ahu: Aha do na niidam, ale Amos? Jadi ningku ma: * Tali rambu na marpungga do! Jadi ninna Tuhan i ma: Ida ma pagistangonku ma sada tali rambu di tongatonga ni bangsongku Israel, * ndang be marsombusombu ahu mida ibana.

7:9 Ingkon saesae ma angka buntulbuntul ni Isak, jala tarulang angka bagas na badia ni Israel, jala hehe ma ahu dompak bagas ni si Jerobeam patioptiop podang.

7:10 Jadi disuru si Amasia, malim sian Betel, suruonna tu * si Jerobeam, raja sian Israel, ninna ma: Marjehejehe do si Amos dompak ho di tongatonga ni pinompar ni Israel; * ndang tartaon tano i hatahatana sudena.

7:11 Ai songon on do didok si Amos: Ingkon mate si Jerobeam marhitehite podang, jala ingkon tarboan tu habuangan ianggo Israel sian tanona.

7:12 Dung i didok si Amasia ma tu si Amos: Laho ma ho * ale paralatan! Maporus ma ho tu tano Juda, jala disi ma ho mangan sagusagu, jala disi ma ho manurirangi!

7:13 Alai anggo di Betel * unang be datdati manurirangi! Ai huta habadiaon ni rajai do i, jala hundulan ni harajaon do i.

7:14 Jadi ninna si Amos ma mangalusi si Amasia: Ndang nian panurirang ahu, jala ndang anak ni panurirang ahu, * halak parmahan do ahu, jala na papungupungu parbue ni hau antajau.

7:15 Dung i dibuat Jahowa ma ahu sian na mangadu birubiru, jala didok Jahowa tu ahu: Laho ma ho manurirangi dompak bangsongku Israel!

7:16 On pe tangihon ma hata ni Jahowa! Nimmu do: Ndang jadi * ho manurirangi dompak Israel, jala ndang jadi pistikkononmu hatam dompak pinompar ni si Isak!

7:17 Dibahen i songon on do hata ni Jahowa: * Marmainan do jolmam di bagasan huta, jala marragean angka anakmu dohot borum marhitehite podang, jala bagion do tano on marhitehite rujiruji, jala mate di atas tano na ramun do ianggo ho jala tarboan tu habuangan ia Israel sian tanona.

Amos 8

8:1 Songon on do dipataridahon Tuhan Jahowa tu ahu, ida ma, sada hirang na marisi parbue naung malamun.

8:2 Jadi ninna ibana ma: * Aha do na niidam, ale Amos? Jadi ningku ma: Sada hirang marisi parbue naung malamun dung i ninna Jahowa ma tu ahu: Nunga jumpang hasisimpul ni bangsongku Israel, * ndang be marsombusombu ahu mida ibana.

8:3 Jadi di ari na sasada i andungkononnasida ma angka ende di joro i, ninna Tuhan Jahowa dibahen hinadeak ni bangke, * sip songon i ditimpalhon margugungugun.

8:4 Tangihon ma hata on, * hamu ale angka na mangarohai halak na pogos, jala disiaphon halak na dangol di tano on.

8:5 Angka na mandok: Andigan pe ulaning salpu poltak ni bulan asa manggadis eme hita? Andigan salpu dohot * ari Sabbat, asa tarungkap sopo paremean? Laho pametmethon solup, jala pabalgahon arga dohot mangansi marhite sian * hatian si paotooto.

8:6 Laho manuhor halak na parir ali ni perak dohot halak na pogos * ali ni sipatu sapasang, asa tagadis lapung singkat ni eme.

8:7 Nunga pola * marmangmang Jahowa tu hamuliaon ni si Jakkob: Molo tung halupahononku be salelenglelengna angka pambahenannasida sudena.

8:8 Tung so humuntal ma tano on taringot tusi, manang so margudompong nasa pangisina? Gabe binsat * songon batang aek Nil sandok tano i, jala margalumbang jala moru, songon Nil ni Misir.

8:9 Di ari na sasada i, ninna Tuhan Jahowa, * sundut ma mata ni ari di hos ni ari, jala paholomonku tano on arian.

8:10 Paubaonku ma ari rayamuna gabe pangandungan, jala saluhut endemuna gabe andung; jala * alithononku tu saluhut gontingmuna ulos hori, jala hapalpalon tu atas saluhut ulu; jala bahenonku do * songon hangaluton marhinamagohon anak sasada, jala ujungna songon ari hinamago.

8:11 Ida ma, ro do angka ari sogot, ninna Tuhan Jahowa, tongosonku ma haraparon tu tano on, ndada haraparon di sagusagu manang hauason di aek ingkon di angka hata ni Jahowa do, naeng begeonna nian.

8:12 Jadi madoado ma nasida sian laut na sada tu laut nasada nari, jala sian utara tu habinsaran diliati nasida mangalului hata ni Jahowa nian, hape * laos so jumpang nasida do.

8:13 Di ari na sasada i mandate ma boruboru namarbaju, angka na uli rupa ro di angka dolidoli dibahen uas.

8:14 Nasida angka na marmangmang tu hadosaon ni Samaria, angka na mandok; songon sintongna mangolu Debatam, ale Dan! Songon ngolu ni dalan tu Berseba! Ingkon marragean nasida sogot, jala ndang be hehe.

Amos 9

9:1 Huida do Tuhan i jongjong di atas ni langgatan, jala ninna do: Lotak ma pasina, asa * humuntal angka balok, jala ropuhi nasida di atas ni ulu ni saluhut nasida! Jala pinomparnasida bunuonku do marhitehite podang; ndang adong * na malua sian nasida angka na maporus i, ndang adong na malua tutu nanggo sada.

9:2 Tung sura pe ditondong nasida sahat tu bagasan parbeguan, alapon ni tanganku do nasida sian i; jala tung sura pe manaek nasida tu banua ginjang, paijuronku do nasida sian i.

9:3 Tung sura pe martabuni nasida di punsu ni Karmel hampunganku do nasida, huhut mamboan nasida sian i; tung sura pe martabuni nasida maradophon matangku di bagasan lung ni laut, dohononku do sian i naga i, asa dipargut nasida.

9:4 Tung sura pe laho nasida tu habuangan di jolo ni angka musu nasida, dohononku do sian i podang i, asa dibunu nasida. Sai * nolnol do matangku mangalo nasida mambahen marhinamago, ndang anggo na denggan.

9:5 Molo Tuhan Jahowa Zebaot manjama tano on * gabe malala ma jala margudompong sude pangisina i, * gabe binsat songon batang aek Nil sandok tano i jala moru muse songon Nil ni Misir.

9:6 Ibana do * paulihon angka bilutna parginjang di banua ginjang, jala punguanna diojakkon di atas tano on. * Ibana do na manjou angka aek ni laut, jala diusehon muse tu sisik ni tano on, Jahowa do goarna!

9:7 Nda * songon angka anak ni halak Kus, hamu ale halak Israel di ahu? ninna Jahowa. Nda ahu do na manogihon halak Israel ruar sian tano Misir, jala halak ** Palistim sian Kaptor, jala halak Ram * sian Kir?

9:8 Ida ma, sai nolnol do mata ni Tuhan Jahowa mangalo harajaon pardosaon i, sai siaphononku do i sian sisik ni tano on, * alai tahe ndatung sun siap bahenonku pinompar ni si Jakkob, ninna Jahowa.

9:9 Ai ida ma, ahu martona jala marsege sogot pinompar ni Israel di tongatonga ni saluhut bangso parbegu, songon na marsege di anduri, jala ndang mapisik tu tano na porngis, nanggo sangkamata.

9:10 Binahen ni podang marmatean sogot nasa pardosa ni bangsongki, * angka na mandok: Ndang tagamon sahat manang mangonai tu hita hinamago i.

9:11 Di ari na sasada i * pajongjongonku ma muse undungundung ni si Daud na malohai, jala paulionku parik angka na bungbung i, jala pajongjongonku muse angka na malohai, jala paulionku do i, suang songon di angka ari mulamula.

9:12 Asa nasida manean pasipasi ni Edom dohot saluhut bangso parbegu angka na targoar tu goarhu, ninna Jahowa, na pasauthon songon i.

9:13 Ida ma, na ro do sogot angka ari, ninna Jahowa: * Masijaloan ma paninggala dohot panggotil, pardege dohot panabur; jadi * manetekkon anggur angka dolok, jala binsat angka dolokdolok sudena.

9:14 Dung i * togihononku ma mulak angka na tarbuang sian bangso Israel; jala paulionnasida muse huta angka na tarulang, laos inganannasida ma, jala * pungkaonnasida ma angka porlak anggur, laos inumonna ma anggurna, jala pangkeonnasida ma angka porlak, laos panganonna dohot parbuena.

9:15 Jala * lopokhononku ma nasida tu tanonasida, jala ndang be pabalionku nasida sian tanonasida, na hulehon i tu nasida, ninna Jahowa Debatam.