Qualcuno volò sul nido del cuculo

 Miranduléś

C'l artìcul chè 'l è scrit in Miranduléś

One Flew Over the Cuckoo's Nest
Qualcuno volò sul nido del cuculo
La Fletcher e Jack Nicholson in na figùra dal film
Qualchidòṅ 'l è vulâ in sal gnał dal cuc 1975
Regìa: Miloš Forman
Scritōr: Lawrence Hauben Ken Kesey • Bo Goldman
Atōr: Jack Nicholson • Louise Fletcher • Brad Dourif Danny DeVito • Will Sampson • Christopher Lloyd Nathan George • Louisa Moritz • Anjelica Huston
Müsica: Jack Nitzsche
Léngua: Ingléś
Dürä dal film: 126 minüt
Nasiōṅ: Stat Unî

«

A n gh la caṿ pròpria minga a véd'r-al, al mè persunàǵ 'l è tròp catìṿ, spavintóś. A n pòs briśa védar un film acsè inumàṅ»

(Dichiarasiòṅ dla Louise Fletcher dal 2012)

Qualcuno volò sul nido del cuculo (Qualchidòṅ 'l è vulâ in sal gnał dal cuc) 'l è 'n film dramàtic dal 1975 ad Miloš Forman trat da 'n rumànś ad Ken Kesey.

'L è stâ òṅ di pôc film dla stòria a 'vér vins i sinc Prèmi Òscar più impurtànt tut insém.

Sunt

Al delinquènt Randle Patrick McMurphy (Jack Nicholson), cundanâ a pasàr soquànt an in parśòṅ, al vîṅ mandâ a 'l uśdàł psichiàtric dal Stat ad Sàlem (Òregun) par dascórar c'n al Dutōr John Spivey (Dean R. Brooks) par védar s'l è mat dabòṅ o al fà sōl finta. McMurphy al stà a 'l śōg e 'l taca a far di quèi minga nurmài cuma spudaciàr al madśìni in fàcia a 'n àtar e tōr in gir 'l indianòṅ Bromden, dit "Gran Cap" (Will Sampson). Quànd i n gh faṅ minga védar na partìda ad baseball a la televiśiòṅ al dvénta mat miténd-as cóntar la dóna ch'la cmanda 'l repàrt, la sgnōra Mildred Ratched (Louise Fletcher).

Ma Patrick al cuntìnua listés, dvintànd sèmpar più arvèrs, e 'l scapa via insìma a na barca rubàda insém a di àtar pasiènt. In séguit al vins tut al sigaréti di malâ a poker cauśànd na casutarìa ch'la gh cósta 'l èsar mis da na banda fra i scalmanâ e i gh fànan anc 'n elettroshock.

Tulénd eśèmpi da lò, i àtar pasiènt i impàran a cumpurtàr-as da parsòni dgénd liberamènt i sò biśógn, miténd anc al deciśiòṅ a i vōt par decìdar cuśa far, pròpria cuma la fava la Ratched quànd la gh'iva da custrìnś'r-i a patìr i sò vulēr, sénsa purtàr-ag rispèt par gnint.

McMurphy al dvénta amìg cun Billy Bibit (Brad Dourif), un śōvan timuróś ch'al tartàja, e cun 'l indiàṅ che però 'l à capî che Patrick 'l è òṅ ch'al fà sōl finta a èsar mat.

Arcgnusimènt

• Prèmi Òscar dal 1976:
  • Mijōr film a Michael Douglas e Saul Zaentz
  • Regìa mijōra a Miloš Forman
  • Atōr prutagunìsta mijōr a Jack Nicholson
  • Atōra prutagunìsta mijōra a la Louise Fletcher
  • Senegiadùra minga uriginàla mijōra a Lawrence Hauben e a Bo Goldman

Culegamènt estéran

• (EN) La schéda dal film in s'l IMDb
• (IT) La schéda dal film in sal FilmTV

Nòti