Agriculture
![](https://upload.wikimedia.org/wikipedia/commons/thumb/3/3d/Tomb_of_Nakht_%282%29.jpg/220px-Tomb_of_Nakht_%282%29.jpg)
![](https://upload.wikimedia.org/wikipedia/commons/thumb/6/69/Ford_tractor%2C_Sweden.jpg/220px-Ford_tractor%2C_Sweden.jpg)
La agriculture e je une tecniche e une pratiche cul fin di trasformâ elements primaris (aghe, tiere, ossigjen, energjie, etc.) in gjenars alimentârs. Cualchidun la definìs ancje come sience dal sfrutament des risorsis naturâls organichis.
La storie de agriculture e je une vore vecje, e za tal 10000 prime di Crist a son olmis di selezion des plantis e piçulis coltivazions; lis areis di nassude a forin chês plui avanzadis in chel timp, la Mesopotamie e l'Egjit. Pe agriculture dai timps modernis a an vût une grande impuartance lis inovazions de Etât di Mieç (come la rotazion des culturis) e la discuvierte de Americhe, che puartà in Europe un grum di gnovis specis che cumò a son pandudis par dut (pomodoros, patatis, blave). E je stade ae base dal disvilup dai popui e dai imperis, e ancje se al dì di vuê e je pôc considerade intes economiis ocidentâls, si scugne notâ che, secont une stime dal 2002, il 42% de popolazion mondiâl e je ocupade in chest setôr (che però al prodûs dome il 4% di dutis lis ricjecis).
La agriculture moderne e je simpri plui fondade su la imission di energjie esterne tal sisteme, par mieç di fito farmacs, mecanizazion, fertilizants, inzegnerie gjenetiche, tecnologjie, base de cussì clamade agriculture intensive; chest al è dovût al continui aument des richiestis di produzion, la necessitât di tignî bas i presits, la riduzion dai terens dedicâts ae coltivazion a cause de urbanizazion e cussì indevant. La agriculture cui sistemis tradizionâi e sta però tornant di mode cul non di agriculture biologjiche.
Cul non di agriculture si definìs tecnichementri ancje l'arlevament di animâi, ancje se, in particolâr in Italie, agriculture e arlevament a son stâts par tant timp doi monts in contrast.
Il setôr agricul al è une vore impuartant in Friûl, soredut te planure e te zone prealpine.