Junon

Junon e je une divinitât de mitologjie romane, leiade al cicli lunâr dai prins popui italics. E jere la antighe divinitât dal matrimoni e dal part, rapresentade dispès intal at di dâ di tete, che e à assumût, po dopo, lis funzions di protetore dal Stât: dai antîcs Romans, di fat, e je stade soreponude in maniere graduâl a Ere de mitologjie greghe, deventant la femine di Jupitar, duncje la plui impuartante divinitât feminine.

E jere ancje la protetore dai animâi, in particolâr par jê al jere sacri il pavon. In so onôr a jerin stâts tirâts sù templis, che in chei e vignive venerade tant che Monete ("chê che e vise"), e in chest rûl si sarès distinte salvant i romans dilunc dal assalt puartât dai Gjai. Junon Lucine e difindeve lis nassitis e i fruts: in so onôr a vignivin celebradis lis Matronalia e lis fiestis Caprotinae ai 7 di Lui.

Si conte che Junon e fos nemie zurade dai Troians par trê motîfs, doi mitics: la ofese vude di Parit parcè che al veve dât il miluç de bielece a Venere impen che a jê; il rapiment di Ganimêt de bande di Jupitar che al fasè di lui il so amant e il copîr dai dius; la profezie che si conte inte Eneide, che la sô citât predilete e sarès distrute dai dissendents di Troie e duncje dai Romans.