Porto de España
Coordenadas: 10°40′N 61°31′O / 10.667, -61.517 Modelo:Cidade Porto España[1][2][3] (en inglés: Port of Spain), é a capital de Trinidad e Tobago e o terceiro concello máis grande do país, logo de Chaguanas e San Fernando. A poboación do seu municipio é de 49.031 (censo de 2000), entanto a poboación metropolitana estimábase en 128.026 no ano 1990.
Xeografía
Porto España está situada ao noroeste da illa de Trinidad, entre o golfo de Paria, os outeiros do North Range e o pantano Caroni. Parte da cidade está sentada sobre terreos gañados ao mar.
Estrutura urbana
Porto España, oficialmente, ten pouca poboación, o que reflicte os estritos límites do seu concello, que inclúen o distrito central de negocios e algúns barrios economicamente deprimidos. Fronte a poboación oficial contrasta a conurbación do corredor leste-oeste que se achega aos 600.000 habitantes.[4]. O corredor é unha área edificada ao norte da illa de Trinidad que se estende desde a capital, Porto España, uns 15 km cara ao leste até Arima, e que inclúe as cidades de Barataria, San Juan, St. Joseph, Curepe, St. Augustine, Tunapuna, Tacarigua, Arouca e máis Five Rivers, nun tempo comunidades diferentes e actualmente distritos que conforman unha área urbana continua. Na súa maior parte espállase ao longo da Eastern Main Road, entre a Churchill-Roosevelt Highway e a base dos outeiros da Northern Range (Cordal Norte).[5]
Historia
Porto España foi fundada pos españois a mediados do século XVI sobre o antigo emprazamento indio de Cumucarapo ou Conquerabia. Foi denominado Puerto de los Españoles.
A fins do século XVIII, o último gobernador, José María Chacón, trasladou a capital da illa desde San José de Oruña (hoxe denominada Saint Joseph) para a cidade. Despois da conquista de Trinidad por Inglaterra, durante as Guerras Revolucionarias Francesas, en 1797, continuou sendo a capital da colonia, mais co novo nome de Port of Spain. Con a independencia do arquipélago (1962) pasou a ser a capital do novo estado.
Anos antes, entre 1958 e 1962, Porto España foi capital da Federación das Indias Occidentais, aínda que se pensara en facer capital federal a Chaguaramas, ao oeste da cidade.
Economía
Porto España é o centro comercial, financeiro e de negocios da maior parte do país. Dous dos maiores bancos do Caribe, Republic Bank, Trinidad and Tobago Limited e RBTT (antes Royal Bank de Trinidad e Tobago) teñen aquí a súa sede. Tamén a maioría das oficinas gobernativas están asentadas na cidade. en distintas localizacións: The Government Campus Plaza (en construción), Red House ou Eric Williams Plaza. O porto de Porto España é o maior porto de embarques con contedores e ten capacidade abondo para que amarren nos seus peiraos os maiores buques.
A economía de Trinidad baséase no gas natural e o petróleo. Aínda que ningunha industria pesada está situada no mesmo Porto España, si que unha importante refinería petroleira, moitas plantas petroquímicas, siderúrxicas e de aluminio sitúanse ou están planificadas en lugares do sur da cidade[6]. Os altos ingresos procedentes da exportación de gas natural serviron para que o país financiase o Port of Spain International Waterfront project. Porto España ten sona de ser o "eixo industrial" do Caribe, como a cidade máis desenvolvida do seu país.
Comunicacións
O tráfico automobilístico é extremadamente denso, sobre todo ás horas punta. A fin de facilitar o tránsito de entrada e saída a cidade, existen varios proxectos. Un deles é preparar a autovía Churchill-Roosevelt con vías rápidas; outro estender o servizo de buques transbordadores (que cargan vehículos) desde Port of Spain até os centros urbanos máis importantes da costa oeste.
Entretanto existe un importante servizo de transporte público de autobuses, e privado de minibuses, que serve City Gate, localizado en South Quay, xusto ao sur de Independence Square. O servizo actual de transbordador conecta Porto España con Scarborough, Tobago.
Para comunicacións aéreas, Porto España está atendido polo Aeroporto Internacional Piarco, situado na localidade de Piarco, que é o aeródromo internacional de todo o país.
Notas
- ↑ Anaír Rodríguez Rodríguez, Montserrat Davila Ventura. Área de Normalización Lingüística da Universidade de Vigo, ed. Lingua galega: dúbidas lingüísticas (PDF). p. 106. ISBN 84-8158-266-2.
- ↑ Goretti Sanmartín Rei et al. Servizo de Normalización Língüística, Universidade da Coruña, ed. Criterios para o uso da lingua (PDF). p. 133. ISBN 84-9749-199-8.
- ↑ Empregado tamén en: Mansilla, Roberto (15 de abril de 2009). "A Cuba de Obama". Galicia Hoxe.; "V Cumio das Américas". Igadi Paper (003-04). 2009.
- ↑ Trinidad and Tobago - Country overview, Location and size, Population, Industry, Oil and gas, Manufacturing, Services, Tourism
- ↑ Northern Range of Trinidad Travel Guide
- ↑ US State Department Background Notes - Trinidad and Tobago(11/07)
Véxase tamén
![]() |
Commons ten máis contidos multimedia sobre: Porto de España |