Kavafis

Kavafis

Nome orixinal	(el) Κωνσταντίνος Πέτρου Καβάφης
Biografía
Nacemento	29 de abril de 1863 Alexandría, Exipto
Morte	29 de abril de 1933 (70 anos) Alexandría, Exipto
Causa da morte	cancro de larinxe
Residencia	Alexandría
Actividade
Lugar de traballo	Liverpool
Ocupación	poeta
Obra
Obras destacables (1966) The Cavafy Publications 1891-1934 (en)
Arquivos en	Fundação Alexander Onassis (pt)
Familia
Pais	Petros Ioannēs   e Xaríkleia Fotiádi
Sinatura
Descrito pola fonte	Dictionary of African Biography, Obálky knih,

Konstantinos Petrou Kavafis (en grego Κωνσταντίνος Πぱい. Καβάφης), nado en Alexandría o 29 de abril de 1863 e finado na mesma cidade o 29 de abril de 1933, foi un poeta grego que figura entre os autores máis relevantes do século XX. Traballou tamén como xornalista e funcionario.

Traxectoria

O seu pai era un importador e exportador acomodado. Ao morrer o pai en 1870, a familia trasladouse a Liverpool, aínda que retornaría a Alexandría en 1882. Por mor dos disturbios de 1885, a familia fuxiu a Constantinopla temporalmente. Kavafis permaneceu en Alexandría para o resto da vida, se ben visitou Grecia en tres ocasións (1901, 1903 e 1932) como para demostrar que era e se sentía grego: aprendera grego durante a adolescencia e esta foi a súa única lingua poética. Comezou traballando de xornalista, mais logo obtivo un posto no ministerio exipcio de Obras Públicas, onde permaneceu trinta anos.

Entre 1891 e 1904 publicou a súa poesía en panfletos que facía circular entre os amigos achegados e recibiu pouco recoñecemento durante a vida, se ben a isto contribuíu o seu modo de vida recluído. Os versos que compuxo durante a súa primeira época empregan unha lingua culta e depurada. Posteriormente virou cara ao demótico, a lingua grega falada, enriquecida con formas dialectais de Constantinopla e con vocábulos tirados da tradición clásica. Os poemas completos foron publicados en 1935 como Poemas de C.P. Kavafis (Ποιήματα, Piimata).

O mundo que Kavafis presenta é decadente, mais non o fai á moda da poesía europea da época, senón inspirándose no mundo pagán-cristián que esmorecía en Alexandría para mistificar ou sublimar as súas emocións persoais. Os seus poemas son retratos concisos mais íntimos de sociedades e personaxes, reais ou literarios. A homosexualidade e a saudade figuran entre os seus temas característicos: o amor homosexual, cantado ás veces con acentos violentamente sensuais ou con nostalxia e tristura, a imposibilidade de reter a beleza, a historia como terreo de enfrontamento entre o home e o destino, e a evocación mítica con tons de austeridade estoica.

Logo da morte de Kavafis, a súa reputación non deixou de medrar, e actualmente está considerado como un dos mellores poetas gregos modernos.

Traducións ao galego

Yolanda Vilarchao traduciu a súa poesía ao galego co título de Poemas canónicos que publicou en 2007 a Editorial Rinoceronte.

A Editorial Aira publicou en 2022 "Poesía completa anotada", traducida por Miguel A. Areses Martín.

Véxase tamén

Ligazóns externas

• Sitio completo sobre Kavafis Arquivado 06 de xuño de 2004 en Wayback Machine.
• Museo de Kavafis en Alexandría