Wiswamitra
Wiswamitra (Sanskerta: विश्वामित्र; Viśvā-mitra: "mitraning donya") yaiku jeneng salah sijiné Brahmaresi ing Agama Hindhu kang nampa wahyu Pangéran. Jeneng Wiswamitra uga ana ing kitab Ramayana, bebarengan karo Resi Wasista. Nanging ing Ramayana, Resi Wiswamitra asalé saka keturunan satriya lan biyèn minangka raja.
Raja Kaushika
Wiswamitra yaiku keturunan siji ratu ing jaman India Kuno, lan dhèwèké uga diundhang Kaushika ("keturunan Kusha"). Dhèwèké minangka satriya kang gagah prakasa kang minangka cicit saka ratu Kusha. Salah siji saka anak papate Kusha yaiku Kushanubha, kang nindakaké upacara Puthrakameshti lan éntuk anak kanthi aran Gadhi minangka asile. Kaushika utawa Wiswamitra, yaiku anaké Raja Gadhi. Kaushika nggantekake bapaké lan mréntah kanthi apik. Dhèwèké banget disenengi rakyate.
Saingan karo Wasista
Sawijining dina, Raja Kaushika (Wiswamitra) karo angkatan perange kang kuwat lèrèn ing asrama Resi Wasista. Kanthi kebak sopan santun, Resi Wasista nyugati Raja Kaushika. Resi Wasista nuduhake sekabehing kaendahan lan kemakmuran ing lingkungan pertapane, kalebu lembu sakti kang diduwèni yaiku Sabala. Lembu sakti mau bisa nyipta apa baé kang dipenginake déning bandharané, kaya déné luh kang ora tau garing. Ngerti kasaktene lembu mau, Kaushika kepéngin duwé. Banjur dhèwèké ngerahake angkatan perangnya supaya ngoyok Sabala. Minangkani babagan mau, Resi Wasista ngongkon Sabala supaya nyipta angkatan perang. Ora let suwé, pertempuran kedadeyan antarané wadyabala Kaushika karo wadyabala kang diciptakake Sabala. Nalika wadyabala Kaushika kadesek, wadyabala Sabala sansaya akèh. Pungkasané Kaushika ngakoni kalahe lan lunga saka asrama Resi Wasista.
Sawisé masrahake singgasana karajan marang salah sati anaké, Kaushika lunga menyang gunung Himalaya lan nindakaké tapa muja Déwa Siwa. Sawisé Siwa teka amarga gelem nampa tapane Kaushika, Kaushika njaluk supaya dhèwèké éntuk gegaman sekti. Siwa nuruti panjaluke mau lan mènèhi gegaman sakti marang Kaushika. Kanthi gegaman sekti mau, Kaushika teka manèh ing asrama Resi Wasista. Sawisé ngarahake sekabehing gegaman kang ditampa lumantar tapa, Kaushika durung bisa naklukake Wasista amarga mung nganggo siji tongkat kang jenenge Brahmadanda, Wasista bisa nglumpuhake kabèh gegaman sektine Kaushika kalebu Brahmastra kang dianggep gegaman paling sekti manawa kanggo matèni wong ing Mitologi Hindhu. Amarga ngrasa yèn anugerah kang diwènèhi Déwa Siwa siya-siya, Kaushika jaluk pamit lan lunga saka asrama Wasista kanthi rasa wirang.
Sawisé kalah ing asrama Wasista, Kaushika tapa muja Déwa Brahma saperlu éntuk gelar Brahmaresi supaya madani Resi Wasista. Sawisé tapa nganti pirang-pirang taun, Déwa Brahma teka, banjur mènèhi gelar Rajaresi marang Kaushika.