Lingua
- Esta es la article sur lingua. La categoria lingua conteni plu articles sur lingua.
|
| Petra Rosetta |
Lingua es la forma de comunica usada par umanas. Lo es la aplica de un sistem de regulas a un colie de sinias (como parolas) per produi posible un cuantia infinita de frases sinifiosa. La sinias pertine acaso a la cosas cual los indica: lo es par no razona otra ca costum ce la parlores de elefen usa la parola "can", la parlores de engles "dog", e la parlores de franses "chien".
Orijinal, lingua ia usa sola sona (e, en un modo limitada, jestis). Ma, en la tre milenios la plu resente, umanas ia inventa formas de scrive. Ance, on ia inventa linguas formal, como lojica e matematica e la linguas de computadores.
Linguistica es la studia siensal de linguas, e lo ave sucampos diversa:
- Fonetica es la studia de la sonas de linguas.
- Morfolojia es la studia de morfemes – elementos gramatical plu peti ca parolas – e la modo en cual los combina. Per esemplo, la parola gatos ave du morfemes: gato, cual indica la animal, e -s, cual indica pluralia.
- Sintatica es la studia de la regulas de combina parolas per formi frases.
- Semantica es la studia de la sinifias de morfemes, parolas e frases.
Multe varias de linguas esiste:
- Un dialeto es un varia de un lingua, parlada par un grupo de persones, usual en un area jeografial spesifada.
- Un sosioleto es un dialeto determinada par fatores sosial, como clase sosioeconomial.
- Un jergo es un varia definida par un vocabulo o stilo diferente de la normas de la sosia plu grande.
- Un jergo tecnical ave un vocabulo spesialida per un profesa o comersia spesifada.
- Un jergo secreta refere a un vocabulo usada par grupos secreta, comun intendeda per comunica en un modo noncomprendable a stranjeres.
- Un pijin es un lingua usada per comunica par grupos ci ave linguas nativa diferente. Cuando poplas ci parla linguas diferente nesesa comunica, los pote developa un media comun con un gramatica simple e un vocabulo limitada.
- Un creol es un lingua alga plu complicada ca un pijin, cual ia deveni la lingua nativa de un popla.