Francesch Melz
El Francesch Melz (it. Francesco Melzi; Milan, 1491 ca. - Vaver, 1568/1570) l'è staa on pitor lombard, vun di preferii del Leonardo da Vinci.
Vita
[Modifega | modifica 'l sorgent]Nassuu de vuna di famej pussee important de Milan (sò pader l'era el Ironem Melz, omm de fiducia del duca de Milan), el Melz l'è staa vun di aliev lombard del Leonardo (i "leonardesch"). L'ha scominciaa a lavorà cont el maester toscan quand che 'l gh'aveva sedes agn, e l'è andaa con lu anca in Francia fina a la soa mort (in del 1519). El Leonardo l'ha nominaa sò erede e 'l gh'ha lassaa tucc i sò oeuver, liber e dissegn. El Francesch l'è tornaa a Vaver, in de la villa de la famjea, e l'ha conservaa lì tucc i ben che 'l gh'aveva daa el Leonardo (come l'è regordaa anca del Giorgio Vasari).
In del 1520 l'è staa nominaa gentilomm de la cort de Francia. L'ha sposaa l'Angiola Landriana e 'l gh'ha 'vuu vott fioeu.
Oltra ai quader, el Melz l'ha curaa l'edizzion postuma del Trattaa de pitura del Leonardo.
El patrimoni leonardesch del Melz l'è staa ceduu al Pompeo Leoni del sò fioeu, l'Ottavi Melz. Quest chì l'è staa el principi de la dispersion de l'oeuvera grafega del Leonard.